އިންޑިޔާއިން ހަނދުގެ ދިރާސާކުރުމަށް ފޮނުވި ޖައްވީ އުޅަނދު "ޗަންދްރަޔާން-3" ހަނދުގެ ދެކުނު ތަނޑީގައި ކާމިބުކަމާ އެކު ޖައްސާފައި ވަނީ މީގެ ހަފުތާއެއްހާ ދުވަސް ކުރިންނެވެ. އެ ކާމިޔާބީއަށް ފަހު އިންޑިޔާގެ ނަޒަރު މި ވަނީ އިރުގެ ދިރާސާއަށް ހުއްޓިފައެވެ. އަދި، އިރާ ބެހޭ ދިރާސާތައް ކުރުމަށް އިންޑިޔާއިން ވަނީ "އާދިތްޔާ-އެލް1"ގެ ނަންދީފައިވާ ޖައްވީ އުޅަނދު އުދުއްސައިލާފައެވެ.
އިރަށް ކުރާ ދަތުރުގައި އާދިތްޔާ-އެލް1 އުޅަނދު އުދުއްސައިލާފައި ވަނީ އިންޑިޔާގެ ޝްރީހަރީކޯޓާގައި އޮންނަ ޖައްވީ މަރުކަޒުން "ޕީ.އެސް.އެލް.ވީ އެކްސް.އެލް" މަރުކާގެ ރޮކެޓެއްގައެވެ. ހަނދުގެ އެންމެ ބޭރު ފަށަލައާ ހަމައަށް އެ އުޅަނދު ދަތުރު ކުރަން ހަތަރު މަހެއްހާ ދުވަސް ހޭދަވާނެއެވެ. އަދިތްޔާ-އެލް1 އިރަށް ކުރާ މި ދަތުރުގައި އިރުގެ ފަށަލައިގެ ދިރާސާތައް ކުރުމަށް ބޭނުންވާ ގިނަ ސާމާނު ގެންދާ ކަމުގައި އިންޑިޔާގެ ޖައްވީ އިދާރާ، އިންޑިޔަން ސްޕޭސް ރީސަރޗް އޮގަނައިޒޭޝަން (އައި.އެސް.އާރް.އޯ)ން ބުނެއެވެ.
އާދިތްޔާ-އެލް1 އުދުއްސައިލި މަންޒަރު ބަލައިލުމަށް ޝްރީހަރީކޯޓާގައި އޮންނަ ޖައްވީ މަރުކަޒުގެ ކައިރިއަށް އެތަކެއް ހާސް ބަޔަކު ޖަމާވެފައިވާއިރު، އެ މަންޒަރު ޓީވީއާއި އޮންލައިން ވަސީލަތްތައް މެދުވެރިކޮށް 500,000 އެއްހާ މީހުން ވަގުތުން ބަލާފައިވެއެވެ. އައި.އެސް.އާރް.އޯން ބުނީ އާދިތްޔާ-އެލް1ގެ މި ދަތުރުގެ އެންމެ ބޮޑު މަޤުޞަދަކީ "ސޯލާ ވިންޑް" ނުވަތަ އިރުގެ ފަށަލައިގައި އުފެދޭ ވައިގެ ރޯޅިތަކުގެ ދިރާސާ ކުރުމެވެ.
އިރުގެ ދިރާސާތައް ކުރުމަށް އެމެރިކާއާއި ވިލާތުގެ ޖައްވީ އިދާރާ، ޔޫރަޕިއަން ސްޕޭސް އޭޖެންސީ (އީ.އެސް.އޭ)ން މީގެ ކުރިން ވެސް އުޅަނދުތައް ފޮނުވާފައިވެއެވެ. އިރުގެ ފަށަލައިގެ ދިރާސާތައް ކުރަން އުޅަނދުތައް ފޮނުވަން ފަށާފައި ވަނީ 1960ގެ އަހަރުތަކުގެ ތެރޭގައެވެ. ނަމަވެސް، އާދިތްޔާ-އެލް1 އިރަށް ކުރާ މި ދަތުރަކީ، އޭޝިޔާގެ ޤައުމަކުން އިރުގެ ދިރާސާތައް ކުރުމަށް އުޅަންދެއް ފޮނުވި ފުރަތަމަ ދަތުރެވެ.
ހަނދުގެ ދެކުނު ތަނޑިއަށް ޖައްވީ އުޅަނދެއް ފޮނުވައިގެން މީގެ ހަފުތާއެއްހާ ދުވަސް ކުރިން އިންޑިޔާއިން ވަނީ ތާރީޚުގެ ތެރެއަށް ވަދެފައެވެ. އެއީ، އައި.އެސް.އާރް.އޯގެ އިތުރުން ހަނދުގެ ދިރާސާއަށް ވެސް ލިބުނު ކުރިއެރުމެކެވެ. އެއް ސަބަބަކީ، މިއީ ހަނދުގެ ދެކުނު ތަނޑިއަށް ޖައްވީ އުޅަނދެއް ކާމިޔާބުކަމާ އެކު ފޮނުވާފައިވާ ފުރަތަމަ ފަހަރު ކަމަށް ވުމެވެ.
ހިންދީ ބަހުންނާއި ސާކްސްކުރިތު ބަހުން ޗަންދްރާޔަންގެ މާނައަކީ ހަނދުގެ އުޅަނދެވެ. އައި.އެސް.އާރް.އޯއިން މީގެ ކުރިން ހަނދަށް ޖައްވީ އުޅަނދެއް ފޮނުވަން މަސައްކަތް ކޮށްފައި ވަނީ 2019 ވަނަ އަހަރުއެވެ. އެ އަހަރު ފޮނުވި ޗަންދްރަޔާން-2 ވަނީ ހަނދަށް ވެއްޓިފައެވެ. ޗަންދްރަޔާން-3 ކާމިޔާބުކަމާ އެކު ހަނދުގައި ޖެއްސުމުން ދުނިޔޭގެ އެކި ކަންކޮޅުތަކުން މޯދީއާއި އިންޑިޔާގެ ރައްޔިތުންނަށް މަރުޙަބާ ކިޔަމުންނެވެ.
މީގެ ކުރިން ހަނދަށް ޖައްވީ އުޅަނދުތައް ފޮނުވާފައިވާ ޤައުމުތަކަކީ ރަޝިޔާ، އެމެރިކާ އަދި ޗައިނާއެވެ. 2014 ވަނަ އަހަރުގެ މޭ މަހުގެ ތެރޭގައި އިންޑިޔާއިން ވަނީ މާރސްގެ އޯބިޓަށް ވެސް ޖައްވީ އުޅަނދެއް ފޮނުވާފައެވެ. އަދި، އަންނަ އަހަރުގެ ތެރޭގައި އިންސާނުންނާ އެކު އުޅަނދެއް ޖައްވަށް ފޮނުވަން އިންޑިޔާއިން މިހާރު ދަނީ މަސައްކަތް ކުރަމުންނެވެ.
އެހެން ޤައުމުތަކުގެ ޖައްވީ ޕުރޮގުރާމުތަކާ އަޅައިބަލާއިރު، އިންޑިޔާގެ ޖައްވީ އުޅަނދުތައް އުފައްދާފައި ވަނީ ވަރަށް ހެޔޮ އަގުގައި ކަން މަސްރަޙު ދިރާސާކުރާ ފަރާތްތަކުން ފާހަގަކުރެއެވެ. ހަނދުގެ ދެކުނު ތަނޑިއަށް އިންޑިޔާއިން ޖައްވީ އުޅަނދެއް ފޮނުވަން ހޭދަކޮށްފައި ވަނީ 75 މިލިޔަން އެމެރިކާ ޑޮލަރެވެ.