ޔޫކްރެއިނުން އަލަށް އުފައްދާފައިވާ ދުރު ރާސްތާ ހަތިޔާރު އެ ޤައުމުގެ އަސްކަރިއްޔާއިން ބޭނުންކުރަން ފަށާފައިވާ ކަމަށާއި، އެއާ އެކު ރަޝިޔާއަށް އޮތް ނުރައްކާ ބޮޑުވެފައިވާ ކަމުގައި ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވެއްޖެއެވެ. އޭނާ މިހެން ވިދާޅުވެފައި މި ވަނީ، ރަޝިޔާގެ ހުޅަނގުތުރުގައި އޮންނަ ސްކޯފްގެ ވައިގެ ބަނދަރަކަށް އަމާޒުކޮށް ވަރުގަދަ ހަމަލަތަކެއް ދީފައިވާ ދަނޑިވަޅެއްގައެވެ.
ޒެލެންސްކީ ވިދާޅުވީ ޔޫކްރެއިންގެ މިނިސްޓްރީ އޮފް ސްޓްރެޓީޖިކް އިންޑަސްޓްރީޒުން 700 ކިލޯމީޓަރުގެ ރާސްތާއަކަށް ހަމަލަދިނުމުގެ ގާބިލުކަން ލިބިފައިވާ އައު ހަތިޔާރުތަކެއް އުފައްދާފައިވާ ކަމުގައެވެ. އޭނާގެ ވާހަކަފުޅުގައި ސްކޯފަށް ދީފައިވާ ހަމަލަތަކަށް އިޝާރާތް ކުރައްވާފައިވެއެވެ. އެ ހަމަލަތަކުގެ ޒިންމާ އުފުލާކަމަށް ޒެލެންސްކީ ވިދާޅުވެފައި ނުވި ނަމަވެސް، އެ ހަމަލަތަކުގެ ފަހަތުގައި އޮތީ ޔޫކްރެއިން ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ސްކޯފަކީ ޔޫކްރެއިންގެ ސަރަޙައްދީ ރޮނގާ 700 ކިލޯމީޓަރު ދުރުގައި އޮންނަ ރަށެކެވެ. ޑްރޯންތަކެއް ބޭނުންކޮށްގެން ސްކޯފްގެ ވައިގެ ބަނދަރަށް ދީފައިވާ ހަމަލަތަކުގައި އެ ތަނުގައި އޮތް "އިލްޔޫޝަން 76" މަރުކާގެ ހަތަރު މަތިންދާބޯޓެއްގައި އަލިފާން ރޯވެ، ބޮޑެތި ގެއްލުންތަކެއް ލިބުނެވެ.
"ޔޫކްރެއިންގައި އުފައްދާ އައު ހަތިޔާރު ބޭނުންކޮށްގެން މިހާރު 700 ކިލޯމީޓަރު ދުރުގައި އޮންނަ ސަރަޙައްދުތަކަށް ވެސް ހަމަލަދެވޭނެ. އަދި، އެއަށްވުރެ ދުރު ރާސްތާގެ ހަތިޔާރު އުފައްދަން މި ދަނީ މަސައްކަތް ކުރަމުން،" ޒެލެންސްކީ ވިދާޅުވިއެވެ. އޭނާ މިހެން ވިދާޅުވެފައި މި ވަނީ، ޔޫކްރެއިނުން ރަޝިޔާގެ ރަށްތަކަށް ހަމަލަދޭން ބޭނުންކޮށްފައިވާ ހަތިޔާރުތަކެއް ދިފާޢުކޮށްފައިވާ ކަމުގައި ރަޝިޔާގެ ދިފާޢީ ވުޒާރާއިން ބުނެފައިވާ ދަނޑިވަޅެއްގައެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ކުރަން ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައިގައި އެމެރިކާއާއި ނޭޓޯގެ މެންބަރު ޤައުމުތަކުން ދަނީ ޔޫކްރެއިނަށް އެންމެ ފަހުގެ ޒަމާނީ ހަތިޔާރު ފޯރުކޮށްދެމުންނެވެ. ނަމަވެސް، ސަރަޙައްދީ ރޮނގު ހުރަސްކޮށް ރަޝިޔާގެ ރަށްތަކަށް ހަމަލަދިނުމަށް އެ ހަތިޔާރުތައް ބޭނުން ނުކުރުމަށް އެ ޤައުމުތަކުން ވަނީ ޔޫކްރެއިނަށް ޝަރުޠުކޮށްފައެވެ.
މަސްރަޙު ދިރާސާކުރާ އެމެރިކާގެ ތިންކް ޓޭންކެއް ކަމުގައިވާ އިންސްޓިޓިއުޓް ފޯ ދަރ ސްޓަޑީ އޮފް ވޯޒް (އައި.އެސް.ޑަބްލިޔު)އިން ބުނީ ރަޝިޔާއިން އަތްގަދަ ކޮށްފައިވާ ކްރައިމިޔާގައި އޮންނަ ރަޝިޔާގެ އަސްކަރިއްޔާގެ އަމާޒަކަށް ޔޫކްރެއިނުން އައު ވައްތަރެއްގެ މިސައިލެއް ބޭނުންކޮށްގެން ހަމަލަދީފައިވާ ކަމުގައެވެ. އަދި، އޮގަސްޓު 23 ވަނަ ދުވަހު ދީފައިވާ ހަމަލަތައް ޔޫކްރެއިންގެ ދިފާޢާއި ޤައުމީ ސަލާމަތާ ބެހޭ ކައުންސިލްގެ ސެކްރެޓަރީ އޮލެކްސީ ދަނިއެލޯ ކަށަވަރު ކޮށްދެއްވާފައިވާ ކަމުގައެވެ.
ޔޫކްރެއިންގެ އަސްކަރިއްޔާގެ ޖާސޫސީ އިދާރާގެ އިސްވެރިޔާ ކިރިލޯ ބުދަނޮވާ ހަވާލާދީ އައި.އެސް.ޑަބްލިޔުން ބުނީ، ކްރައިމިޔާގެ ހުރިހާ ސަރަޙައްދަކަށް ހަމަލަދިނުމުގެ ގާބިލުކަން ޔޫކްރެއިންގެ އަސްކަރިއްޔާއިން ހޯދާފައިވާ ކަމުގައެވެ. ކްރައިމިޔާއަކީ ޔޫކްރެއިންގެ އެންމެ ދެކުނުން އޮންނަ ސަރަޙައްދެވެ. ރަޝިޔާއިން އެ ސަރަޙައްދަށް އަތްގަދަކޮށްފައި ވަނީ 2014 ވަނަ އަހަރުއެވެ.
ސަރަޙައްދީ ރޮނގު ހުރަސްކޮށް ޔޫކްރެއިނުން ރަޝިޔާއަށް ދެމުންދާ ހަމަލަތަކުގެ ޢަދަދު ފާއިތުވި މަހެއްހާ ދުވަހުގެ ތެރޭގައި އިތުރު ކޮށްފައިވާ ކަން ފާހަގަކުރެވެއެވެ. އޮގަސްޓު 30 ވަނަ ދުވަހު ޔޫކްރެއިނުން ވަނީ ރަޝިޔާގެ ހަ ސަރަޙައްދަކަށް އަމާޒުކޮށް ވަރުގަދަ ޑްރޯން ހަމަލަތަކެއް ދީފައެވެ. މީގެ ތެރެއިން ބައެއް ހަމަލަތައް ވެރިރަށް މޮސްކޯއަށް އަމާޒުކޮށްފައިވާއިރު، މި ހަމަލަތައް ހަތަރު ގަޑިއިރަށް ދެމިގެން ދިޔަ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ރަޝިޔާ-ޔޫކްރެއިން ހަނގުރާމައަށް 556 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.