ހުޅުމާލެ ހޮސްޕިޓަލް ހިންގުން އާސަންދަ ކުންފުންޏާއި ހަވާލުކުރުމަށްޓަކައި ކަމާއިބެހޭ ފަރާތްތަކާއެކު މަޝްވަރާ ކުރައްވަމުންދާކަމަށް ހެލްތް މިނިސްޓަރ އިރުތިޝާމް އާދަމް ވިދާޅުވެއްޖެއެވެ.
ހުޅުމާލެ ހޮސްޕިޓަލްގެ މެނޭޖްމަންޓް އާސަންދަ ކުންފުންޏާއި ހަވާލުކުރެއްވުމަށް ރައީސުލްޖުމްހޫރިއްޔާ އަބްދުﷲ ޔާމީން ވަނީ ނިންމަވާފައެވެ. އެހޮސްޕިޓަލް ހިންގަވަމުން ދަނީ އައިޖީއެމްއެޗްގެ ބޯޑުންނެވެ.
ހެލްތް މިނިސްޓަރ އިރުތިޝާމް އާދަމް ވިދާޅުވީ ހުޅުމާލެ ހޮސްޕިޓަލްގެ މެނޭޖްމަންޓް ބަދަލުކުރުމާއި ގުޅޭގޮތުން ހެލްތް މިނިސްޓްރީއާއި، އާސަންދަ ކުންފުނި، އެންސްޕާ އަދި އައިޖީއެމްއެޗްގެ ބޯޑާއިއެކު މަޝްވަރާކުރައްވަމުންދާކަމަށެވެ. މިނިސްޓަރ ވިދާޅުވީ މަސައްކަތްކުރައްވަމުންދަނީ ޚިދުމަތްމެދުނުކެނޑި ރައްޔިތުންނަށް ދަތިކަމެއް ނުފޯރާނެގޮތަށް ޚިދުމަތްދެއްވުމަށްކަމަށެވެ. އަދި މެނޭޖްމަންޓް ބަދަލުކުރެއްވުމަށް ނިންމެވީ އައިޖީއެމްއެޗްގެ ބޯޑުގެ މައްސަލައެއް ހުރެގެންނޫންކަމަށާއި، މިއީޚިދުމަތް އިތުރަށް ފުޅާކުރައްވާ ތަރައްޤީކުރެއްވުމުގެ މަޤްސަދުގައި ނިންމެވި ނިންމެވުމެއްކަމަށް ހެލްތް މިނިސްޓަރ ވިދާޅުވިއެވެ.