ޔޫކްރެއިނަށް އަރައި ހަނގުރާމަ ފަށާފައިވާ ރަޝިޔާއާ އެކު މަޝްވަރާ ކުރުން ހުއްޓައިލުމަށް އެމެރިކާގެ ދިފާޢީ އިދާރާ ކަމުގައިވާ ޕެންޓެގަނުން އުތުރު ކޮރެޔާއަށް ގޮވައިލައިފިއެވެ. ޕެންޓެގަނުން މި ކަމަށް ގޮވައިލާފައި މި ވަނީ، އުތުރު ކޮރެޔާއާއި ރަޝިޔާއާއި ދެމެދު އަސްކަރީ ގުޅުންތައް ހަރުދަނާކޮށް، ދެ ޤައުމުގެ ދެމެދުގައި ހަތިޔާރުގެ ވިޔަފާރި ފުޅާ ކުރަން މަސައްކަތް ކުރަމުންދާ ދަނޑިވަޅެއްގައެވެ.
މި ކަމާ ގުޅޭ ގޮތުން ވާހަކަފުޅު ދައްކަވަމުން ޕެންޓެގަންގެ ތަރުޖަމާނު ޕެޓްރިކް ރައިޑަރ ވިދާޅުވީ، ރަޝިޔާއިން ޔޫކްރެއިންގައި ކުރަމުންދާ ހަނގުރާމައަށް އަސްކަރީ ގޮތުން އެހީތެރިކަން ފޯރުކޮށްދިނުން ހުއްޓައިލުމަށް އުތުރު ކޮރެޔާއަށް ނަސޭހަތްތެރިވާ ކަމުގައެވެ. "ރަޝިޔާއަށް ހަތިޔާރު ފޯރުށްދޭ ނަމަ ކުށެއް ނެތް އެތަކެއް ސަތޭކަ ބަޔެއްގެ ފުރާނަ ގެއްލުމުގެ ފުރުޞަތު ބޮޑު،" ރައިޑަރ ވިދާޅުވިއެވެ.
ރަޝިޔާއަށް ހަތިޔާރު ފޯރުކޮށްދިނުމާ ދެކޮޅަށް ރައިޑަރ ވާހަކަފުޅު ދައްކަވާފައިވީ ނަމަވެސް، އެ ހަނގުރާމައިގެ އަނެއް ފަރާތުގައި އޮތް ޔޫކްރެއިނަށް އެމެރިކާއިންނާއި ނޭޓޯއިން ދަނީ ހަތިޔާރު ފޯރުކޮށްދެމުންނެވެ. އެމެރިކާއިން މިހާތަނަށް ޔޫކްރެއިނަށް ފޯރުކޮށްދީފައިވާ ހަތިޔާރުގެ އަގު އެތަކެއް ބިލިޔަން ޑޮލަރަކަށް އަރައެވެ. އޭގެ ތެރޭގައި އެންމެ ފަހުގެ ޒަމާނީ އަދި ނުރައްކާތެރި ހަތިޔާރު ވެސް ހިމެނެއެވެ.
އެމެރިކާއިން މި ވަގުތު ދަނީ ދެކުނު ކޮރެޔާއާ ގުޅިގެން އަސްކަރީ ތަމްރީނުތަކެއް ވެސް ބާއްވަމުންނެވެ. "އުލްޗީ ފްރީޑަމް ޝީލްޑް"ގެ ނަމުގައި ބާއްވަމުންދާ މި ތަމްރީނުތަކުގައި ދެ ޤައުމުގެ އެތަކެއް ހާސް ސިފައިން ބައިވެރިވަމުންދާއިރު، މި ތަމްރީނުތަކަކީ އުތުރު ކޮރެޔާގެ މިނިވަންކަމާއި ސިޔާދަތަށް އޮތް ނުރައްކަލެއްގެ ގޮތުގައި އެ ޤައުމުން ސިފަ ކުރެއެވެ.
އަދި، މި ތަމްރީނުތަކަށް ޖަދަލުކުރުމުގެ ގޮތުން އުތުރު ކޮރެޔާއިން ވަނީ ކުރު ރާސްތާގެ ދެ ބެލިސްޓިކް މިސައިލް ވެސް ޓެސްޓުކޮށްފައެވެ. މިސައިލް ޓެސްޓުތަކުގެ ބޭނުމަކީ، އެމެރިކާއާއި ދެކުނު ކޮރެޔާއިން ގުޅިގެން ދީފާނެ ނިއުކްލިޔަރ ހަމަލައަކަށް ރައްދުދިނުމަށް ތައްޔާރުވުން ކަމުގައި އުތުރުން ބުނެއެވެ. ދެކުނު ކޮރެޔާއާއި އެމެރިކާ ގުޅިގެން ބާއްވާ އަސްކަރީ ހަރަކާތްތަކާ ދެކޮޅު ހެދުމުގެ ގޮތުން އުތުރުން ދަނީ މި ފަދަ ޓެސްޓުތައް ހަދަމުންނެވެ.
އުތުރު ކޮރެޔާއިން ބެލިސްޓިކް މިސައިލް ޓެސްޓުތަކެއް ހަދާފައި މި ވަނީ، އުލްޗީ ފްރީޑަމް ޝީލްޑް ތަމްރީނުތަކުގެ ތެރެއިން އެމެރިކާގެ އަސްކަރިއްޔާގެ "ބީ-1ބީ" މަރުކާގެ ބޮންއަޅާ މަތިންދާބޯޓުތައް ދެ ކޮރެޔާ ގުޅޭ ސަރަޙައްދުގައި ހަރަކާތްތެރިވާން ފެށުމުންނެވެ. މި ކަމާ ދެކޮޅަށް ހަދާފައިވާ މިސައިލް ޓެސްޓުތަކުގެ ބޭނުމަކީ ދެކުނު ކޮރެޔާގެ އަސްކަރީ މަރުކަޒުތަކާއި ކޮމާންޑު ސެންޓަރުތަކަށް ހަމަލަދޭން ފަރިތަކުރުން ކަމުގައި އުތުރު ކޮރެޔާއިން ބުނެއެވެ.
އުތުރު ކޮރެޔާގެ މިސައިލްތައް އުދުއްސައިލާފައި ވަނީ ވެރިރަށް ޗޮންގްޔަންގުގެ ބައިނަލްއަޤުވާމީ ވައިގެ ބަނދަރު ކައިރިންނެވެ. މިސައިލްތައް އަމާޒުކޮށްފައި ވަނީ ޗޮންގްޔަންގުގެ އިރުއުތުރުގެ ކަނޑުގެ ސަރަޙައްދަށެވެ. މި ޓެސްޓުތައް ވަރަށް ކާމިޔާބުކަމާ އެކު ނިންމައިލެވުނު ކަމަށާއި، ދެކުނު ކޮރެޔާއާއި އެމެރިކާއަށް ވަރުގަދަ އިންޒާރެއް ދީފައިވާނެ ކަމުގައި އުތުރު ކޮރެޔާގެ އަސްކަރިއްޔާއިން ބުނެއެވެ.
އުތުރު ކޮރެޔާއިން ދެ ބެލިސްޓިކް މިސައިލް ޓެސްޓު ހަދާފައިވާ ކަން ދެކުނުގެ އަސްކަރިއްޔާގެ ޖޮއިންޓް ޗީފްސް އޮފް ސްޓާފުން ވެސް ވަނީ ކަށަވަރު ކޮށްދީފައެވެ. އެ ދެ މިސައިލް ވެއްޓިފައި ވަނީ އިރުމަތީ ކަނޑު ނުވަތަ ޖަޕާނު ކަނޑުގެ ސަރަޙައްދަށެވެ. މިސައިލް ޓެސްޓުތައް ހަދާފައި ވަނީ ދަންވަރުގެ ވަގުތުގައެވެ. ޗޮންގްޔަންގުން ފެށިގެން 360 ކިލޯމީޓަރު ދުރަށް މިސައިލްތައް ދަތުރު ކޮށްފައިވާ ކަމުގައި ވެސް އެ އިދާރާއިން ބުނެއެވެ.