އިރުމަތީ އޭޝިޔާގެ ސަރަޙައްދުގައި އުފެދިފައިވާ ބާރުގަދަ ތޫފާނެއް ކަމުގައިވާ "ސައޮލާ" ހޮންގ ކޮންގާއި ޗައިނާގެ ސަރަޙައްދުތަކަށް އެރުމާ ގުޅިގެން ބޮޑެތި ގެއްލުންތަކެއް ލިބިއްޖެއެވެ. ޗައިނާގެ ސަރަޙައްދެއް ކަމުގައިވާ ހޮންގ ކޮންގަށް އެރުމަށް ފަހު ތޫފާން ސައޮލާ މި ވަގުތު އޮތީ ޗައިނާގެ ދެކުނު ފަރާތު އައްސޭރިފަށުގެ ސަރަޙައްދެއް ކަމުގައިވާ ގުއަންގދޮންގާ ހިސާބުގައެވެ.
މި ތޫފާނާ ގުޅިގެން ހިނގާފައިވާ އެކި ހާދިސާތަކުގައި މިހާތަނަށް އެކަކުގެ ފުރާނަ ގެއްލިފައިވާ ކަން ކަށަވަރު ކުރެވިފައިވާއިރު، ތޫފާނުގެ އަސަރު ޝެންޖެނާއި މަކާއޫގެ ސަރަޙައްދުތަކަށް ވެސް ދަނީ ކުރަމުންނެވެ. ތޫފާނާ އެކު ބޯކޮށް ވާރޭވެހި، ވައިބާރުވެފައިވާއިރު ހޮންގކޮންގާއި ގުއަންގދޮންގުގެ ބައެއް ހިސާބުތަކުގައި ވަނީ ފެންބޮޑުވެފައެވެ. އަދި، ގަސްގަހާގެހި ވެއްޓި، ބޮޑެތި ގެއްލުންތަކެއް ވަނީ ލިބިފައެވެ.
މި ތޫފާނާ އެކު ގަޑިއަކު 200 ކިލޯމީޓަރަށް ވައިބާރުވެފައިވާއިރު، ހޮންގ ކޮންގާއި ގުއަންގދޮންގުގައި ސްކޫލްތަކާއި ވިޔާފާރިތައް ވަނީ ބަންދުކޮށްފައެވެ. އަދި، އެ ސަރަޙައްދުތަކުގެ ވައިގެ ދަތުރުފަތުރުތައް ވަނީ މެދުކަނޑައިލާފައެވެ. ތޫފާނުގެ ނުރައްކާ ބޮޑުވުމާ ގުޅިގެން ގުއަންގދޮންގާއި ފުޖިއަން ޕުރޮވިންސުގައި ދިރިއުޅޭ 900,000 ހާހަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.
ހޮންގކޮންގުގެ ސަރަޙައްދުތަކަށް އެރުމަށް ފަހު މިހާރު ތޫފާނުގެ ބާރު ކެނޑެމުންދާ ކަމުގައި ޗައިނާގެ މޫސުމާ ބެހޭ އިދާރާއިން ބުނެއެވެ. ނަމަވެސް، ގުއަންގދޮންގުގެ ޖޫހާއި ސިޓީއަށް ގަޑިއަކު 160 ކިލޯމީޓަރުގެ ބާރުމިނުގައި އަދިވެސް ވައިޖެހެމުންދާ ކަމުގައި އެ އިދާރާއިން ބުނެއެވެ. މި ތޫފާނާ ގުޅިގެން މީހަކު މަރުވެފައި ވަނީ ގުއަންގދޮންގުގެ ޝެންޖެން ސިޓީންނެވެ. އެ މީހާ މަރުވީ، އޭނާ ދަތުރުކުރަމުންދިޔަ ކާރުގެ މައްޗަށް ބިޔަ ގަހެއް ވެއްޓުމާ ގުޅިގެންނެވެ.
މި ތޫފާނާ އެކު ގުއަންގދޮންގުގައި ރޭލު ދަތުރުފަތުރުގެ ޚިދުމަތް މެދުކަނޑައިލި ނަމަވެސް، އެ ޚިދުމަތް މިހާރު ވަނީ ފަށާފައެވެ. ނަމަވެސް، ކުރިއަށް އޮތް ދުވަސްތަކުގައި ވެސް ޗައިނާގެ ދެކުނު ފަރާތު އައްސޭރިފަށުގެ ސަރަޙައްދުތަކަށް ބޯކޮށް ވާރޭވެހި، ވައިބާރުވާނެ ކަމަށް އެ ޤައުމުގެ މޫސުމާ ބެހޭ އިދާރާއިން ލަފާކުރެއެވެ. އަދި، ޒަރޫރީ ބޭނުންތަކަށް މެނުވީ ބޭރަށް ނިކުމެ އުޅުން ވެސް ބައެއް ސަރަޙައްދުތަކުގައި ވަނީ މަނާކޮށްފައެވެ.
ތޫފާން ސައޮލާގެ ސަބަބުން އެންމެ ބޮޑަށް ގެއްލުން ލިބިފައި ވަނީ ހޮންގ ކޮންގަށެވެ. އެ ސިޓީގެ ކޯޒްވޭ ބޭ ޑިސްޓްރިކްޓުގައި ގިނަ ޢަދަދެއްގެ ގަސްތައް ވެއްޓުނެވެ. އަދި، މަގުމަތީގައި ހަރުކޮށްފައިވާ ނިޝާންތަކަށް ބޮޑެތި ގެއްލުންތަކެއް ވަނީ ލިބިފައެވެ. މަކާއޫގައި ވެސް ގިނަ ވިޔަފާރިތައް ވަނީ ބަންދުކޮށްފައެވެ.
ސައޮލާގެ ނުރައްކަލުން ސަލާމަތްނުވެވެނީސް، ބާރުގަދަ އެހެން ތޫފާނެއް ކަމުގައިވާ "ހައިކުލީ" މިހާރު ދަނީ ޗައިނާއާއި ތައިވާން އޮންނަ ސަރަޙައްދާ ދިމާލަށް ދަތުރު ކުރަމުންނެވެ. މި ތޫފާނުގެ އަސަރު އެންމެ ފުރަތަމަ ކުރާނެ ކަމަށް ބެލެވެނީ ތައިވާނުގެ އިރުދެކުނުގެ ސަރަޙައްދުތަކަށެވެ. އަދި، ކުރިއަށް އޮތް ހަފުތާއެއްހާ ދުވަހުގެ ތެރޭގައި އެ ސަރަޙައްދަށް ބޯކޮށް ވާރޭވެހޭނެ ކަމަށް މޫސުމާ ބެހޭ އިދާރާތަކުން ލަފާ ކުރެއެވެ. ހައިކުލީއާ ގުޅިގެން ތައިވާނުގެ އެތެރޭގެ އުދުހުންތައް ވެސް ވަނީ ވަގުތީގޮތުން މެދުކަނޑިލާފައެވެ.