ފިލިޕީންސްގެ ވެރިރަށް މޭނީލާގައި ހުންނަ ގެއެއްގައި ހިނގި ނުރައްކާތެރި އަލިފާނުގެ ހާދިސާއެއްގައި 15 މީހުން މަރުވެއްޖެއެވެ. މި ހާދިސާ ހިނގާފައިވާ ޢިމާރާތަކީ އަންނައުނު އުފައްދާ ކާރުޚާނާއެއްގެ ގޮތުގައި ބޭނުން ކުރަމުންދިޔަ ޢިމާރާތެކެވެ. އެ ތަނުގައި އަލިފާން ރޯވެފައި ވަނީ ފަތިހުގެ ވަގުތުގައެވެ.
ދެ ބުރިއަށް ޢިމާރާތްކޮށްފައިވާ އެ ޢިމާރާތުގައި އަލިފާން ރޯވި ވަގުތު އެ ތަނުގެ ތެރޭގައި 18 މީހުން ތިބި ކަމުގައި މޭނީލާގެ އަލިފާން ނިއްވާ އިދާރާގެ ސީނިޔަރ ސުޕްރިންޓެންޑެންޓް އެރިސްޓޯޓްލަ ބަނާގާ ވިދާޅުވިއެވެ. އަލިފާން ރޯވުމާ އެކު ތިން މީހުން ވަނީ ސަލާމަތްވެގެން ޢިމާރާތުގެ ތެރެއިން ބޭރަށް ނިކުމެފައެވެ. ނަމަވެސް، ދެން ތިބި 15 މީހުން ވަނީ ޢިމާރާތުގެ ތެރޭގައި ތާށިވެފައެވެ.
މި ހާދިސާގައި މަރުވި މީހުންގެ ތެރޭގައި އެ ގޭގެ ވެރި ފަރާތް ވެސް ހިމެނެއެވެ. އޭނާއަކީ، އަންނައުނު އުފެއްދުމުގެ ވިޔަފާރީގެ އިސް މީހާ ވެސް މެއެވެ. އެ ގެއަކީ ބޫޓާއި ފައިވާން އަދި އަތްދަބަސް ފަދަ ތަކެތި އުފެއްދުމުގެ ހުއްދަ އޮތް ތަނެއް ނަމަވެސް، އެ ތަނުގައި ޓީ-ޝާޓް ފަދަ ތަކެތި ޕްރިންޓު ކުރުމުގެ މަސައްކަތް ކުރަމުން ގޮސްފައިވާ ކަމުގައި މައިނީލާގެ މޭޔަރު ވިދާޅުވިއެވެ.
ޢާންމުން ދިރިއުޅޭ ސަރަޙައްދެއްގައި ހުންނަ ޢިމާރާތުގައި ރޯވި އަލިފާންގަނޑު ގިނައިރުތަކެއް ނުވެ ނިއްވައިލެވިފައިވާ ކަމުގައި މޭނީލާގެ އަލިފާން ނިއްވާ އިދާރާއިން ބުނެއެވެ. މި ހާދިސާގައި އެ ގެއާ އިންވެގެން ހުރި އެހެން ޢިމާރާތްތަކަށް ގެއްލުން ލިބިފައެއް ނުވެއެވެ. އެ ތަނުގައި އަލިފާން ރޯވާން މެދުވެރިވި ސަބަބު ދެނެގަތުމަށް މޭނީލާގެ އޮފިޝަލުން މިހާރު ދަނީ ތަހުޤީޤު ކުރަމުންނެވެ.