މެދުތެރޭ އޭޝިޔާގެ ޤައުމެއް ކަމުގައިވާ ތަޖިކިސްތާނަށް ބޯކޮށް ވާރޭވެހި ފެންބޮޑުވުމާ ގުޅިގެން ހިނގި އެކި ހާދިސާތަކުގައި މަރުވި މީހުންގެ ޢަދަދު 21 އަށް އަރައިފިއެވެ. ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ ވެރިރަށް ދުޝާމްބޭއާއި އެ ރަށް ކައިރީގައި އޮންނަ ސަރަޙައްދުތަކަށެވެ.
ބޯކޮށް ވާރޭވެހުމާ ގުޅިގެން ބައެއް ސަރަޙައްދުތަކުގައި ފެންބޮޑުވެފައިވާއިރު ދުޝާމްބޭ ކައިރީގައި އޮންނަ ފަރުބަދަމަތީ ބައެއް ސަރަޙައްދުތަކުގެ ބިންގަނޑު ކަނޑައިގެން ގޮސް ކިސަޑު ފޭބުމުގެ ހާދިސާތައް ހިނގާފައިވެއެވެ. ތަޖިކިސްތާނުގެ އެމަރޖެންސީ ޚިދުމަތްތަކާ ބެހޭ އިދާރާއިން ކުރިން ބުނެފައި ވަނީ މި ހާދިސާތަކުގައި މަރުވެފައި ވަނީ 13 މީހުން ކަމުގައެވެ. ނަމަވެސް، މަރުވެފައިވާ އިތުރު މީހުންގެ ހަށިތައް ފެނި، މަރުވި މީހުންގެ ޢަދަދު 21 އަށް އަރާފައިވާ ކަމުގައި އޮފިޝަލުން ވިދާޅުވެއެވެ.
ފެންބޮޑުވުމާއި، ބިންގަނޑުގެ ކެނޑުމާއި، ކިސަޑު ފޭބުމާ ގުޅިގެން ގިނަ ބަޔެއްގެ ގެދޮރާއި ޢިމާރާތްތަކަށް ވަނީ ގެއްލުން ލިފައެވެ. އަދި، ޢުމްރާނީ ވަސީލަތްތައް ވަނީ ހަލާކުވެފައެވެ. ސެޕްޓެންބަރު 1 ވަނަ ދުވަހު ތަޖިކިސްތާނުގެ ދިރާސީ އައު އަހަރުގެ ކިޔެވުން ފެށުމަށް ތައްޔާރުވަމުންދާއިރު، ބޯކޮށް ވާރޭވެހި މަގުތަކަށް ގެއްލުން ލިބުމާ ގުޅިގެން ސްކޫލްތައް ހުޅުވޭނެ ކަމާމެދު ވަނީ ސުވާލު އުފެދިފައެވެ.
ތަޖިކިސްތާނަކީ ކުރީގެ ރޫސީ ވިލާތުން ވަކިވި ޤައުމުތަކުގެ ތެރެއިން އެންމެ ފަޤީރު އެއް ޤައުމެވެ. އަދި، ޤުދުރަތީ ކާރިސާތައް ވަރަށް ގިނައިން ކުރިމަތިވާ ޤައުމެކެވެ. އެ ޤައުމުގައި ކޮންމެ އަހަރަކު މަރުވާ މީހުންގެ ތެރެއިން 40 އިންސައްތަ މީހުންގެ ފުރާނަ ގެއްލެނީ ޤުރުދަތީ ކާރިސާތަކުގައި ކަމަށް ތަފާސްހިސާބުތަކުން ހާމަވެއެވެ. އޭގެ ތެރެއިން ވެސް ގިނަ މީހުން މަރުވެފައި ވަނީ ކިސަޑު ފޭބުމުގެ ހާދިސާތަކުގައެވެ.