ކެޓެގަރީ 3ގެ ބާރުގަދަ ތޫފާނެއް ކަމުގައިވާ "އިޑާލިޔާ" އެމެރިކާގެ އިރުދެކުނުގައިވާ ފްލޮރިޑާ ސްޓޭޓްގެ ސަރަޙައްދުތަކަށް އެރުމުގެ ސަބަބުން ބޮޑެތި ގެއްލުންތަކެއް ލިބިއްޖެއެވެ. ފްލޮރިޑާގެ ގަލްފް ކޯސްޓުގެ ސަރަޙައްދުތަކަށް ތޫފާން އިޑާލިޔާ އަރާފައި ވަނީ ބޯ ވިއްސާރައާއި، ގަދަވަޔާއި، ބިޔަ ރާޅުތަކާ އެކުގައެވެ. އެއަށްފަހު ޖޯޖިޔާގެ ސަރަޙައްދުތަކަށް އެރުމުގެ ސަބަބުން ގިނަ ހިސާބުތަކެއްގައި ވަނީ ފެންބޮޑުވެފައެވެ.
އިޑާލިޔާގެ އަސަރު އެންމެ ފުރަތަމަ ކޮށްފައި ވަނީ ފްލޮރިޑާގެ ބިގް ބެންޑް ސަރަޙައްދުގައި އޮންނަ ކީޓަން ބީޗްގެ ސަރަޙައްދުތަކަށެވެ. ތޫފާނާ އެކު ގަޑިއަކު 201 ކިލޯމީޓަރުގެ ބާރުމިނުގައި ވައިޖެހެމުން ދިޔަ ކަމުގައި އެމެރިކާގެ މޫސުމީ އިދާރާއިން ބުނެއެވެ. މި ތޫފާނާ އެކު ފްލޮރިޑާގެ ސަރަޙައްދުތަކަށް ލިބިފައިވާ ގެއްލުން އަންދާޒާ ކުރަން މަސައްކަތް ކުރަމުންދާ ކަމުގައި އޮފިޝަލުން ވިދާޅުވިއެވެ.
ފެންބޮޑުވުމާ ގުޅިގެން ގެދޮރުގައި ތާށިވެފައިވާ މީހުން ސަލާމަތް ކުރަން އޮފިޝަލުން ދަނީ މަސައްކަތް ކުރަމުންނެވެ. އަދި، އެމެރިކާގެ ނޭޝަނަލް ގާޑުން މިހާރު ދަނީ އެ މަސައްކަތުގައި އެހީތެރިކަން ފޯރުކޮށްދެމުންނެވެ. ފްލޮރިޑާގެ ސެއިންޓް ޕީޓަރސްބަރގުގައި ހާލުގައި ޖެހިފައިވާ 75 މީހަކު ސަލާމަތްކޮށްގެން ރައްކާތެރި ހިސާބުތަކަށް ގެންގޮސްފައިވާ ކަމުގައި އޮފިޝަލުން ވިދާޅުވިއެވެ.
ތޫފާން އެރި ވަގުތު ނަގާފައިވާ މަންޒަރުތަކުން ފެންނަނީ ބިޔަ ރާޅުތަކާ އެކު އުދަ އަރައި، މަގުތަކާއި ހައިވޭތަކުގައި ފެންބޮޑުވެފައިވާ މަންޒަރެވެ. ބައެއް ސަރަޙައްދުތަކުން ވަނީ ކަރަންޓުގެ ޚިދުމަތް ވެސް މެދުކެނޑިފައެވެ. ކަރަންޓުގެ ޚިދުމަތް ކެނޑިފައިވާ ގޭބީސީތަކާއި ވިޔަފާރިތަކުގެ ޢަދަދު 565,000 އަށް އަރައެވެ. މި ތޫފާނާ އެކު ޖެހެމުންދިޔަ ބާރު ވައިގެ ސަބަބުން ޕެރީ ކިޔާ ކުޑަ ރަށެއްގައި ހުންނަ ތެޔޮ ސްޓޭޝަނެއްގެ ފުރާޅު ވެސް އެއްލައިލާފައިވެއެވެ. އެއީ، 7,000 އެއްހާ މީހުންގެ އާބާދީއެއް ދިރިއުޅޭ ރަށެކެވެ.
ފްލޮރިޑާގެ ގަވަރުނަރު ރޮން ޑި ސެންޓިސް ވިދާޅުވީ މި ތޫފާނާ ގުޅިގެން އެ ސްޓޭޓްގައި އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައެވެ. އަދި، ތޫފާން އެރުމުގެ ކުރިން، ތޫފާނުގެ އަސަރު އެންމެ ބޮޑަށް ކުރާނެ ކަމަށް ބެލެވޭ ހިސާބުތަކުގައި ދިރިއުޅޭ ޢާންމު ރައްޔިތުން ރައްކާތެރި ހިސާބުތަކަށް ބަދަލުވެފައިވާ ކަމުގައި ވެސް އޭނާ ވިދާޅުވިއެވެ.
ނަމަވެސް، ތޫފާނާ އެކު ކުރަމުންދިޔަ ވިއްސާރައާއި ޖެހެމުންދިޔަ ވަޔާ ގުޅިގެން މަގުމަތީގެ ނުރައްކާތެރި އެކްސިޑެންޓެއް ހިނގައި ދެ މީހަކު މަރުވެފައިވާ ކަމުގައި ފްލޮރިޑާގެ ހައިވޭ ޕެޓްރޯލްގެ ފުލުހުން ވިދާޅުވިއެވެ. މި ކަމާ ގުޅޭ ގޮތުން ޑި ސެންޓިސް ވިދާޅުވީ، އެ ހާދިސާ ތަހުޤީޤު ކުރަމުންދާ ކަމުގައެވެ. އޭނާއަކީ 2024 ވަނަ އެމެރިކާގައި ބާއްވާ ރިޔާސީ އިންތިޚާބުގައި ވާދަކުރެއްވުމަށް ރިޕަބްލިކަން ޕާޓީގެ ޓިކެޓަށް ވާދަ ކުރައްވަމުން ގެންދަވާ ކެނޑިޑޭޓެކެވެ.
ފްލޮރިޑާގެ އިންވެސްޓްމެންޓް ބޭންކެއް ކަމުގައިވާ ޔޫ.ބީ.އެސްއިން ބުނީ، އިންޝުއަރ ކޮށްފައިވާ މުދަލަށް ތޫފާނާ އެކު ލިބިފައިވާ ގެއްލުމުގެ އަގު 9.36 ބިލިޔަން އެމެރިކާ ޑޮލަރަށް އަރާނެ ކަމުގައެވެ. ނަމަވެސް، އިޑާލިޔާއަކީ 2022 ވަނަ އަހަރުގެ ސެޕްޓެންބަރު މަހު ފްލޮރިޑާގެ ސަރަޙައްދުތަކަށް އެރި ކެޓެގަރީ 5ގެ ތޫފާނެއް ކަމުގައިވާ އިއަންއާ އަޅައިބަލާއިރު، ގެއްލުން ކުޑަ ތޫފާނެއް ކަމުގައި އެ ސްޓޭޓުން ބުނެއެވެ. ތޫފާން އިއަންއާ އެކު ކުރިމަތިވި އެކި ހާދިސާގައި ފްލޮރިޑާއިން 150 މީހުން މަރުވިއެވެ. އަދި، 112 ބިލިޔަން އެމެރިކާ ޑޮލަރުގެ ގެއްލުން ލިބުނެއެވެ.