އެމްޑަބްލިއުއެސީ ދިވެހި ޕްރިމިއަރ ލީގުގައި ބުރު ސްޕޯޓްސް ކްލަބް ބަލިކޮށް ޓީސީން ގަދަ ހަތަރެއްގައި ހަމަޖެހިލައިފިއެވެ.
ގައުމީ ފުޓްބޯޅަ ދަނޑުގައި ރޭ ކުޅުނު މި މެޗު ޓީސީން ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ. ޓީސީގެ ލަނޑު 32 ވަނަ މިނެޓްގައި ޖެހީ ޒަޔާން ނަސީރެވެ. މި ދެ ޓީމު ފުރަތަމަ ބުރުގައި ކުޅުނު މެޗު 1-0 އިން ކާމިޔާބުކުރީ ބުރެވެ.
މި ލަނޑަށްފަހު ވެސް ޓީސީއަށް ވަނީ ލީޑު ފުޅާކުރަން ގިނަ ފުރުސަތުތަކެއް ލިބިފައެވެ. އަދި ބުރު ސްޕޯޓްސްއަށް ވެސް ފުރުސަތުތަކެއް ލިބުނެވެ.
މި މެޗާއެކު ލީގުގެ ކުޅުން ވަނީ ދެމަހެއްހާ ދުވަހަށް މެދުކަނޑާލާފައެވެ. އެއީ އޭއެފްސީ ކަޕުގައި މާޒިޔާ ކުޅޭ މެޗުތަކާއި ވޯލްޑް ކަޕް ކޮލިފައިންގެ ޕްރިލިމިނަރީ ބުރުގެ މެޗަށް ތައްޔާރުވުމުގެ ގޮތުންނެވެ.
ލީގު ބްރޭކަށްފަހު ދެން އެންމެ އަވަހަށްވެސް މެޗެއް ކުޅޭނީ އޮކްޓޯބަރު 28 ގައެވެ. އެ ދުވަހު ހަވީރު ކުޅޭ މެޗުގައި ކްލަބް އީގަލްސް ނުކުންނާނީ ޔުނައިޓެޑް ވިކްޓަރީއާ ދެކޮޅަށެވެ. އެ ރޭ ކުޅޭ މެޗުގައި ސުޕަ ޔުނައިޓެޑް ސްޕޯޓްސް އާއި ސަސް ވާދަކުރާނެ އެވެ.
މި މޮޅާއެކު ޓީސީ ހަތަރުވަނައިގައި އޮތީ 19 ޕޮއިންޓާއެކު އެވެ. ތާވަލުގެ ތިންވަނައިގައި ސަސް އޮތީ 21 ޕޮއިންޓާ އެކުއެވެ. އަދި ދެވަނައިގައި މާޒިޔާ އޮތީ 22 ޕޮއިންޓާއެކު އެވެ. އީގަލްސް އެއްވަނައިގައި އޮތީ 23 ޕޮއިންޓާ އެކު އެވެ.