އިރުމަތީ ވިލާތުގެ ޤައުމެއް ކަމުގައިވާ ރޮމޭނިޔާގައި ތެޔޮ އިސްޓޭޝަނެއްގައި ބާރުގަދަ ގޮވުމެއް ގޮވައި އެކަކު މަރުވެ، ގިނަ ޢަދަދެއްގެ ބަޔަކު ޒަޚަމުވެއްޖެއެވެ. މި ހާދިސާ ހިނގާފައި ވަނީ ރޮމޭނިޔާގައި ދެކުނުގައި ވެރިރަށް ބުކުރޭޝްޓް ކައިރީގައި އޮންނަ މޫންޓޭނިޔާގެ ރަށެއް ކަމުގައިވާ ކްރެވެދިޔާގައެވެ. މި ހާދިސާގައި 46 މީހުން ޒަޚަމުވިއެވެ.
ތެޔޮ އިސްޓޭޝަނުގައި ބާރުގަދަ ދެ ގޮވުމެއް ގޮވާފައިވެއެވެ. ފުރަތަމަ ގޮވުމާއެކު އެ ތަނުގައި ބޮޑު އަލިފާންގަނޑެއް ރޯވުމުން، އަލިފާން ނިއްވާ ޓީމުތަކުން ވަނީ އެ ސަރަޙައްދުގައި ހަރަކާތްތެރިވާން ފަށާފައެވެ. ދެވަނަ ގޮވުން ގޮވާފައި ވަނީ އަލިފާން ނިއްވައިލުމަށް މަސައްކަތް ކުރަމުން ދަނިކޮށެވެ. ދެވަނަ ގޮވުމުގައި ޒަޚަމުވި މީހުންގެ ތެރޭގައި އަލިފާން ނިއްވާ އިދާރާގެ 26 މީހުން ހިމެނެއެވެ.
މި ހާދިސާގައި ޒަޚަމުވި މީހުންގެ ތެރެއިން އަށް މީހެއްގެ ހަށިގަނޑު ވަރަށް ބޮޑަށް ފިހިފައިވާ ކަމަށާއި، އެ މީހުންގެ ހާލު ސީރިޔަސް ކަމުގައި ރޮމޭނިޔާގެ އޮފިޝަލުން ވިދާޅުވިއެވެ. އޭގެ ތެރެއިން ހަތަރު މީހަކަށް އިތުރު ފަރުވާ ދިނުމަށް ޚާއްޞަ ހޮސްޕިޓަލަކަށް ގެންދިޔުމަށް މަސައްކަތް ކުރަމުންދާ ކަމުގައި ވެސް އޮފިޝަލުން ވިދާޅުވިއެވެ.
އަލިފާނުގެ ހާދިސާއާ ގުޅިގެން ތެޔޮ އިސްޓޭޝަން ވަށައިގެން 700 މީޓަރުގެ ސަރަޙައްދެއް ވަނީ ހުސްކޮށްފައެވެ. އަދި، އެ ސަރަޙައްދުގައި ދިރިއުޅޭ ޢާންމު ރައްޔިތުން ވަނީ ރައްކާތެރި ހިސާބުތަކަށް ބަދަލުކޮށްފައެވެ. ރޮމޭނިޔާގެ ރައީސް ކްލައުސް ޔޯހާނިސް ވަނީ މި ހާދިސާގައި މަރުވި މީހާގެ ޢާއިލާއަށް ތަޢުޒިޔާ ދަންނަވާފައެވެ. މިއީ، ވަރަށް ހިތާމަވެރި ހާދިސާއެއްގެ ގޮތުގައި އޭނާ ސިފަކުރެއްވިއެވެ. މި ހާދިސާ ހިނގަން މެދުވެރިވި ސަބަބު ދެނެގަތުމަށް މިހާރު ތަހުޤީޤު ކުރަމުންދާ ކަމުގައި އެ ޤައުމުގެ އޮފިޝަލުން ވިދާޅުވިއެވެ.