ތިން އަހަރުގެ މެދުކެނޑުމަކަށް ފަހު އުތުރު ކޮރެޔާއިން ބައިނަލްއަޤުވާމީ ވައިގެ ދަތުރުތައް ފަށައިފިއެވެ. އުތުރު ކޮރެޔާގެ ދަޢުލަތުން ހިންގާ އެއަރލައިން ކަމުގައިވާ އެއަރ ކޯރިޔާގެ ވައިގެ ދަތުރުތައް ފަށާފައި ވަނީ ޗައިނާގެ ވެރިރަށް ބެއިޖިންގއަށެވެ. އުތުރު ކޮރެޔާގެ ވެރިރަށް ޗޮންޔަންގުން ފުރައިގެން ޗައިނާއަށް ދަތުރު ކޮށްފައި ވަނީ އެއަރ ކޯރިޔާގެ ފްލައިޓް ޖޭއެސް151އެވެ.
އެއަރ ކޯރިޔާއިން އެންމެ ފަހުން ބޭރު ޤައުމަކަށް ދަތުރު ކޮށްފައި ވަނީ 2020 ވަނަ އަހަރުއެވެ. އުތުރު ކޮރެޔާއިން ބައިނަލްއަޤުވާމީ ވައިގެ ދަތުރުތައް މެދުކަނޑައިލާފައި ވަނީ ކޮވިޑް-19ގެ ބަލިމަޑުކަމާ ގުޅިގެން އެ ޤައުމުގެ ސަރަޙައްދީ ރޮނގު ބަންދުކުރުމާ އެކުއެކީގައެވެ. އެ އެއަރލައިނުން ބައިނަލްއަޤުވާމީ ދަތުރުތައް އަލުން ފަށާފައިވީ ނަމަވެސް، މި ކަމާ ގުޅޭ އިތުރު މަޢުލޫމާތު ހާމަކުރަން ވަނީ ދެކޮޅު ހަދާފައެވެ.
މީގެ ކުރިން ވެސް އެއަރ ކޯރިޔާގެ ބައިނަލްއަޤުވާމީ ދަތުރުތައް ފަށަން މަސައްކަތް ކޮށްފައިވެއެވެ. ނަމަވެސް، އެ ފްލައިޓް ވަނީ ކެންސަލް ކޮށްފައެވެ. އަދި، ފްލައިޓް ކެންސަލް ކޮށްފައިވާ ސަބަބު ހާމަކުރަން އުތުރު ކޮރެޔާއިންނާއި އެއަރ ކޯރިޔާއިން ވަނީ ދެކޮޅު ހަދާފައެވެ.
އެ އެއަރލައިންގެ ދަތުރުތައް އަލުން ފެށުމާ އެކު، އުތުރު ކޮރެޔާއަށް ދަތުރު ކުރުމަށް އޮތް ހުރަސްތަކަށް ކޮންމެވެސް ވަރެއްގެ ލުޔެއް ދީފާނެ ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. އުތުރު ކޮރެޔާގެ އެއަރލައިނަކުން ޗައިނާއަށް ދަތުރުތައް ފަށާފައި މި ވަނީ، ޗައިނާއާއި ރަޝިޔާގެ އިސް އޮފިޝަލުންތަކެއް އެ ޤައުމަށް ދާދިފަހުން ކުރި ދަތުރަކާ ދިމާކޮށް ކަން ފާހަގަކުރެއެވެ.
ހުސްވި ޖުލައި މަހު ޗޮންޔަންގަށް ވަޑައިގެންނެވި ބޭފުޅުންގެ ތެރޭގައި ރަޝިޔާގެ ދިފާޢީ ވަޒީރު ސަރްޖޭ ޝޮއިގޫއާއި ޗައިނާގެ ވެރިކަންކުރާ ކޮމިޔުނިސްޓު ޕާޓީގެ އިސް އޮފިޝަލެއް ކަމުގައިވާ ލީ ހޮންގްސޮންގ ހިމެނެއެވެ. އެ ދެ ބޭފުޅުން ޗޮންޔަންގަށް ވަޑައިގަންނަވާފައި ވަނީ ކޮރެޔާ ހަނގުރާމަ ނިމުނުތާ 70 އަހަރު ފުރުން ފާހަގަކުރުމަށް އެ ރަށުގައި ބޭއްވި އިހުތިފާލުތަކުގައި ބައިވެރިވެ ވަޑައިގަންނަވާށެވެ.
އުތުރު ކޮރެޔާގެ ޒައީމް ކިމް ޖޮންގް އުން ވަނީ އެ ދެ ބޭފުޅުންނާ ބައްދަލު ކުރައްވާފައެވެ. އަދި، އަސްކަރީ ޕެރޭޑެއް ބާއްވާ، އެ ޤައުމުން އެންމެ ފަހުން އުފައްދާފައިވާ "ހާސޮންގް-17" އަދި "ހާސޮންގް-18" މަރުކާގެ އައި.ސީ.ބީ.އެމްތަކުގެ އިތުރުން އަސްކަރީ ޑްރޯންތައް ވެސް އެ ދެ ބޭފުޅުންނަށް ދައްކައިލާފައެވެ.
"ހާސޮންގް" މަރުކާގެ އައި.ސީ.ބީ.އެމަކީ ނިއުކްލިޔަރ ބޮން އުފުލުމުގެ ގާބިލުކަން ލިބިފައިވާ މިސައިލެކެވެ. އަދި، އެއީ އެހެން ބައްރެއްގައި އޮންނަ ޤައުމަކަށް ހަމަލަދިނުމަށް ވެސް ބޭނުން ކުރެވޭނެ، ދުރު ރާސްތާގެ މިސައިލެކެވެ. އެ މަރުކާގެ މިސައިލާ އެކު އެމެރިކާއަށް ހަމަލަދިނުމުގެ ގާބިލުކަން އުތުރު ކޮރެޔާއިން ހޯދާފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.