ސަޢޫދީ ޢަރަބިއްޔާގައި އޮންނަ މުސްލިމުންގެ އެންމެ މުޤައްދަސް ބިން ކަމުގައިވާ މައްކާއަށް ބޯކޮށް ވާރޭވެހި ފެންބޮޑުވެއްޖެއެވެ. މޫސުން ގޯސްވެ، ވައިބާރުވުމުގެ އިތުރުން ބޯކޮށް ވާރޭވެހުމާ ގުޅިގެން މައްކާގައި ހުންނަ މުގައްދަސްވެގެންވާ މަސްޖިދް އަލް-ޙަރަމްގައި ޠަވާފު ކުރުމާއި ނަމާދު ކުރުމަށް ވެސް ވަނީ ހުރަސް އެޅިފައެވެ. އަދި، މައްކާގެ ސްކޫލްތަކާއި ޢާންމު ޚިދުމަތްދޭ ގިނަ ތަންތަނެއް ވަނީ ބަންދުކޮށްފައެވެ.
ޙަރަމްފުޅުގައި ނަގާފައިވާ ވީޑިޔޯތަކުން ފެންނަނީ ވައިބާރުވެ ޠަވާފް ކުރާށާއި ނަމާދުކުރަން ތިބި މީހުން ވަޔާ އެއްލައިލާ މަންޒަރެވެ. އަދި، ބޯކޮށް ވާރޭވެހުމާ ގުޅިގެން ކައްސައިލައިގެން ވެއްޓޭ މަންޒަރެވެ. މިއީ މަދުން ނޫނީ ފެނިފައި ނުވާ މަންޒަރެކެވެ. އަދި، ޙަކަމްފުޅާ އިންވެގެން ހުންނަ ފެއަރމޮންޓް މައްކާ ކްލޮކް ރޯޔަލް ޓަވަރ ހޮޓަލުގެ އެންމެ މައްޗަށް މެދުކެނޑުމެއް ނެތި ހޮނު އަޅަމުން ދިޔަ މަންޒަރުތައް ފެނިގެން ދިޔައެވެ.
ސަޢޫދީ ޢަރަބިއްޔާގެ މޫސުމާ ބެހޭ އިދާރާގެ އިސް އޮފިޝަލެއް ކަމުގައިވާ ޙުސައިން އަލް-ޤަހްތާނީ ވިދާޅުވީ މޫސުން ގޯސް މައްކާއަށް ގަޑިއަކު 80 ކިލޯމީޓަރުގެ ބާރުމިނުގައި ވައި ޖެހެމުން ގޮސްފައިވާ ކަމުގައެވެ. އަދި، މައްކާގެ އަލް-ކާކިއްޔާއަށް 24 ގަޑިއިރުގެ ތެރޭގައި 45 މިލިމީޓަރުގެ ވާރޭވެހި، ބޮޑު ސަރަޙައްދެއްގައި ފެންބޮޑުވެފައިވާ ކަމުގައެވެ. މަގުތަކުގައި ފެންބޮޑުވެ ގިނަ ޢަދަދެއްގެ އެންގަމު އުޅަނދުފަހަރަށް ވަނީ ގެއްލުން ލިބިފައެވެ.
2015 ވަނަ އަހަރު ވެސް ޙަރަމްފުޅުގައި ހިތާމަވެރި ހާދިސާއެއް ހިނގާފައިވެއެވެ. ޙަރަމްފުޅު ބޮޑު ކުރުމުގެ މަޝްރޫޢެއްގެ ދަށުން ބޭނުން ކުރަމުންދިޔަ ބިޔަ ކެރޭނެއް ވެއްޓިގެން ހިނގި އެ ހާދިސާގައި 100 އަށްވުރެ ގިނަ މީހުން މަރުވިއެވެ. އަދި، އެތަކެއް ސަތޭކަ މީހުން ޒަޚަމުވިއެވެ. ނަމަވެސް، މޫސުން ގޯސްވުމާ ގުޅިގެން އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި ސަޢޫދީ ޢަރަބިއްޔާގެ އޮފިޝަލުން ވިދާޅުވެއެވެ.
ކުރިއަށް އޮތް ހަފުތާއެއްހާ ދުވަހު މައްކާގެ އިތުރުން ސަޢޫދީ ޢަރަބިއްޔާގެ ހުޅަނގުގެ ސަރަޙައްދުތަކަށް މޫސުން ގޯސްވެ، ވައިބާރުވާނެ ކަމަށް އެ ޤައުމުގެ މޫސުމާ ބެހޭ އިދާރާއިން ލަފާ ކުރެއެވެ. އަދި، ބައެއް ހިސާބުތަކަށް ގުގުރުމާ އެކު ބޯކޮށް ވާރޭވެހޭނެ ކަމަށް އެ އިދާރާއިން ބުނެއެވެ. މި ކަމާ ގުޅިގެން މައްކާގެ ގިނަ ސްކޫލްތަކުގައި ކިޔައިދިނުން ވަގުތީ ގޮތުން ވަނީ މެދުކަނޑައިލާފައެވެ.