އީރާނުގެ އަސްކަރިއްޔާއިން އަލަށް އުފައްދާފައިވާ އަސްކަރީ ޑްރޯން ދައްކައިލައިފިއެވެ. މިއީ، މިހާރު ބޭނުން ކުރަމުންދާ ޑްރޯންތަކަށް ވުރެ އުހުން ދަތުރުކުރުމާއި، ގިނަ ވަގުތު އުދުހުމުގެ ގާބިލުކަން ލިބިފައިވާ އައު ޑްރޯނެއް ކަމުގައި އެ ޤައުމުގެ ދަޢުލަތު މީޑިޔާއިން ރިޕޯޓު ކުރެއެވެ. އީރާނުން އައު ޑްރޯނަށް ދީފައިވާ ނަމަކީ "މުހާޖިރު-10"އެވެ.
އީރާނުގެ އައު ޑްރޯން އިފުތިތާހު ކުރުމަށް ވެރިރަށް ޠަހްރާންގައި ބޭއްވި ރަސްމިއްޔާތުގައި އެ ޤައުމުގެ ރައީސް އިބްރާހީމް ރައީސީ ބައިވެރިވެ ވަޑައިގެންނެވިއެވެ. މި ރަސްމިއްޔާތުގައި އޭނާ ވަނީ އެ ޤައުމުގެ އަސްކަރިއްޔާއަށް ވަރަށް ބޮޑަށް ތަޢުރީފު ކުރައްވާފައެވެ. އީރާނުގެ އައު ޑްރޯނަކީ ފަހުގެ ޒަމާނީ ހަތިޔާރު ބޭނުންކޮށް ހަމަލަ ދިނުމުގެ ގާބިލުކަން ލިބިފައިވާ ޑްރޯނެއް ކަމުގައި އީރާނުން ބުނެއެވެ.
މުހާޖިރު-10ގެ ނަން ދީފައިވާ އައު ޑްރޯނަކީ އީރާނުން މިހާރު ބޭނުން ކުރަމުންދާ މުހާޖިރު-6 މަރުކާގެ ޑްރޯން އަސްލަކަށް ބަލައިގެން ފަރުމާ ކޮށްފައިވާ އުޅަނދެކެވެ. އައު ޑްރޯން އިފުތިތާހު ކޮށްފައި މި ވަނީ އީރާނުން މުހާޖިރު-6 މަރުކާގެ ޑްރޯންތައް ރަޝިޔާއަށް ވިއްކާފައިވާ ކަމަށް އެމެރިކާއިން ތުހުމަތު ކުރަމުންދާ ދަނޑިވަޅެއްގައެވެ.
ރަޝިޔާއިން ޔޫކްރެއިންގައި ކުރަމުންދާ ހަނގުރާމައިގައި އެ ޑްރޯންތައް ބޭނުން ކުރަމުންދާ ކަމުގައި ވެސް އެމެރިކާއިން ބުނެއެވެ. ޠަހްރާނުން މި ތުހުމަތުތައް ދޮގު ކުރެއެވެ. ނަމަވެސް، ރަޝިޔާއަށް ހަތިޔާރު ވިއްކާ ކަމުގެ ތުހުމަތުކޮށް، އެމެރިކާއިން ވަނީ އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކޮށްފައެވެ.
އީރާނުގެ ދަޢުލަތުގެ މީޑިޔާ އައި.އާރް.އެން.އޭން ބުނީ އެ ޤައުމުގެ އަސްކަރިއްޔާއިން އަލަށް އުފައްދާފައިވާ ޑްރޯނަކީ 24 ގަޑިއިރު ވަންދެން އުދުހުމުގެ ގާބިލުކަން ލިބިފައިވާ ޑްރޯނެއް ކަމުގައެވެ. އަދި، އެ ޑްރޯނަށް 23,000 ފޫޓު މަތިން ދަތުކުރުމާއި، 2,000 ކިލޯމީޓަރު ދުރަށް ދަތުރު ކުރުމުގެ ގާބިލުކަން ލިބިފައިވާ ކަމަށް ވެސް އައި.އާރް.އެން.އޭން ބުނެއެވެ.
އެއީ ގަޑިއަކު 210 ކިލޯމީޓަރުގެ ބާރުމިނުގައި ދަތުރުކުރެވޭ އުޅަނދެކެވެ. އަދި، 300 ކިލޯގެ ހަތިޔާރު އުފުލުމުގެ ގާބިލުކަން ލިބިފައިވާ ޑްރޯނެކެވެ. އެއީ މުހާޖިރު-6 މަރުކާގެ ޑްރޯންތަކާ އަޅައިބަލާއިރު ދެގުނަ އިތުރު ޢަދަދެކެވެ. އައު ޑްރޯނަށް އެކި ވައްތަރުތަކުގެ ޒަމާނީ ހަތިޔާރު އުފުލުމުގެ ގާބިލުކަން ލިބިފައިވާ ކަމުގައި ވެސް އައި.އާރް.އެން.އޭން ރިޕޯޓު ކުރެއެވެ.