ކުލަބު މޯލްޑިވްސް ކްލަސިކް 2023 ގެ ފައިނަލް މެޗުގައި ކުލަބު 220 ބަލިކޮށް، މުބާރާތުގެ ޗެމްޕިއަންކަން ޓީމު ޑީޖޭއޭއިން ހޯދައިފިއެވެ.
ހުޅުމާލޭ ރެހެންދި ފުޓްސަލް ދަނޑުގައި ރޭ ކުޅުނު ފައިނަލް މެޗު ޑީޖޭއޭއިން ކާމިޔާބުކުރީ 7-2 ގެ ނަތީޖާއަކުންނެވެ.
ކުލަބު މޯލްޑިވްސްއިން މުޅިން އަލަށް ތައާރަފުކުރި ކްލަސިކް ޑިވިޝަނުގެ ފިރިހެން މުބާރާތުގައި 24 ޓީމު ވާދަކުރިއިރު، ޑީޖޭއޭއިން ޗެމްޕިއަންކަން ހޯދީ ކުޅުނު ހަތް މެޗުންވެސް މޮޅުވެ، ސައްތައިން ސައްތަ ރިކޯޑަކާއެކުއެވެ.
ރޭގެ މެޗުގައި ޑީޖޭއޭގެ ލަނޑުތައް ޖަހައިދިނީ މުޙައްމަދު އަޖުވަދު ސޮލާހާއި، ސައުދުﷲ އަޙްމަދު އަދި އަބްދުﷲ ރިމާހެވެ. މީގެ ތެރެއިން ސޮލާހާއި ސައުދުﷲ ވަނީ ކޮންމެ ކުޅުންތެރިއަކު ހެޓްރިކެއް ހަދާފައެވެ.
މި މެޗުގައި ކުލަބު 220 ގެ ދެ ލަނޑުވެސް ޖަހައިދިނީ އަޙްމަދު ސާމިހެވެ. އެއާއެކު ކުޅުނު ހަތް މެޗުން 14 ލަނޑު ކާމިޔާބުކޮށް، ސާމިހު ވަނީ މި މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަޤާމު ހޯދާފައެވެ.
ކްލަސިކް ޑިވިޝަނުގެ ފިރިހެން މުބާރާތުގެ ޗެމްޕިއަންކަން ޑީޖޭއޭއިން ހޯދިއިރު، މިރޭ ކުޅުމަށް ހަމަޖެހިފައިވަނީ 18/30 ވިމެންސް ފުޓްސަލް ފިއެސްޓާގެ ފައިނަލް މެޗެވެ. މި މެޗުގައި ބައްދަލުކުރާނީ ޓީމު ފެނަކަ އާއި ޕޮލިސް ކުލަބެވެ.