ރަޝިޔާގެ ކުރްސްކް ސަރަޙައްދަށް ޔޫކްރެއިނުން ދިން ކަމަށް ބުނާ ޑްރޯން ހަމަލަތަކެއްގައި ޢާންމުންގެ ފަސް މީހުން ޒަޚަމުވެއްޖެއެވެ. ކުރްސްކަށް ދިން ޑްރޯން ހަމަލާގައި ގެއްލުން ލިބިފައި ވަނީ އެ ރަށުގައި އޮންނަ ރޭލު އިސްޓޭޝަނަކަށެވެ. ކުރްސްކަށް ހަމަލަ ދިން ވަގުތު ރަޝިޔާގެ ބައެއް އެހެން ރަށްތަކަށް ވެސް ޑްރޯން ހަމަލަތަކެއް ދީފައިވާ ކަމުގައި އެ ޤައުމުން ބުނެއެވެ.
ކުރްސްކަކީ ރަޝިޔާއާއި ޔޫކްރެއިން ގުޅޭ ސަރަޙައްދީ ރޮނގު ކައިރީގައިވާ އޮންނަ ސަރަޙައްދެކެވެ. މި ހާދިސާގައި ރޭލު އިސްޓޭޝަނަށް ބޮޑެތި ގެއްލުންތަކެއް ލިބުނު ކަމަށް ރަޝިޔާއިން ބުނާއިރު، އެ އިސްޓޭޝަންގައި އަލިފާން ރޯވެފައިވާ މަންޒަރު ފެންނަ ވީޑިޔޯތަކެއް ވަނީ ޢާންމުވެފައެވެ. މި ހާދިސާގައި އެ ތަނުގެ ފާރާއި، ފުރާޅާއި، ޕްލެޓްފޯމަށް ވެސް ބޮޑެތި ގެއްލުންތަކެއް ލިބިފައިވާ ކަމުގައި ރަޝިޔާގެ އޮފިޝަލުން ވިދާޅުވެއެވެ.
ސަރަޙައްދީ ރޮނގު ކައިރީގައި އޮންނަ އެހެން ސަރަޙައްދެއް ކަމުގައިވާ ރަސްތޯފަށް ވެސް ޑްރޯން ހަމަލަތަކެއް ދީފައިވެއެވެ. ނަމަވެސް، އެ ހަމަލަތަކުގައި އެއްވެސް މީހެއްގެ ފުރާނައަށް ނުރައްކާވެފައެއް ނުވެއެވެ. ރަޝިޔާގެ ޚާރިޖީ ވުޒާރާއިން ވަނީ ޑްރޯން ހަމަލަތައް އެންމެ ހަރުކަށި އިބާރާތުން ކުށްވެރިކުރާ ކަމަށް ބުނެފައެވެ.
ރަޝިޔާގެ ދިފާޢީ ވުޒާރާއިން ބުނީ ވެރިރަށް މޮސްކޯއަށް ހަމަލަދޭން ބޭނުންކުރި ޑްރޯނެއް ދިފާޢުކޮށް ވައްޓައިލާފައިވާނެ ކަމުގައެވެ. އެ ޑްރޯން ވެއްޓިފައި ވަނީ މީހުން އާބާދުވެފައި ނުވާ ހިސާބަކަށް ކަމަށާއި، މި ހާދިސާގައި އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި އެ ވުޒާރާއިން ބުނެއެވެ. ނަމަވެސް، ވުނޫކަވާ ވައިގެ ބަނދަރާއި ޑަމާދިއެޖަވާ ވައިގެ ބަނދަރުގެ އުދުހުންތައް ވަގުތީ ގޮތުން މެދުކަނޑައިލަން ޖެހުނެވެ.
މޮސްކޯގެ އިތުރުން ރަޝިޔާގެ އެހެން ރަށްތަކަށް އަމާޒުކޮށް ދެމުންދާ ޑްރޯން ހަމަލަތަކުގެ ޢަދަދު ފާއިތުވި މަސްތަކުގެ ތެރޭގައި އިތުރު ކޮށްފައިވާ ކަން ފާހަގަކުރެވެއެވެ. ޑްރޯން ހަމަލަތަކުގެ ފަހަތުގައި އޮތީ ޔޫކްރެއިން ކަމަށާއި، އެމެރިކާއާއި ނޭޓޯގެ މެންބަރު ޤައުމުތަކުން ޔޫކްރެއިނަށް އެހީތެރިކަން ފޯރުކޮށްދެމުންދާ ކަމަށް ރަޝިޔާއިން ދަނީ ތުހުމަތު ކުރަމުންނެވެ. ނަމަވެސް، ޔޫކްރެއިނުން އެއްވެސް ޑްރޯން ހަމަލައެއްގެ ޒިންމާ އުފުލާފައެއް ނުވެއެވެ.
ރަޝިޔާގެ ރަށްތަކަށް އަމާޒުކޮށް ޑްރޯން ހަމަލަތަކެއް ދީފައި މި ވަނީ، ޔޫކްރެއިންގެ އުތުރުގައިވާ ތާރީޚީ ރަށެއް ކަމުގައިވާ ޗަރްނީހިވަށް ރަޝިޔާއިން ދިން ނުރައްކާތެރި މިސައިލް ހަމަލަތަކެއްގައި ޢާންމުންގެ ހަތް މީހުން މަރުވެ، 150 އެއްހާ މީހުން ޒަޚަމުކޮށްލާފައިވާ ދަނޑިވަޅެއްގައެވެ. މަރުވި މީހުންގެ ތެރޭގައި ހަ އަހަރުގެ ކުޑަކުއްޖެއް ވެސް ހިމެނެއެވެ.
މި ހަމަލާގައި ޒަޚަމުވި މީހުންގެ ޢަދަދު 148 އަށް އަރާފައިވާއިރު، އޭގެ ތެރޭގައި 15 ކުޑަކުދިން ހިމެނޭ ކަމުގައި ޔޫކްރެއިނުން ބުނެއެވެ. ޗަރްނީހިވަށް ދިން ހަމަލާގެ ބަދަލުހިފާނެ ކަމުގައި ރައީސް ވޮލޮޑޮމީރް ޒެލެންސްކީ ވަނީ ވިދާޅުވެފައެވެ.
ރަޝިޔާ-ޔޫކްރެއިން ހަނގުރާމައަށް 543 ދުވަސް ފުރިފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.