ޕެސިފިކް ކަނޑުގައި އުފެދިފައިވާ ބާރުގަދަ ތޫފާނެއް ކަމުގައިވާ ހިލަރީ މެކްސިކޯގެ ބާހާ ކެލިފޯނިޔާގެ ސަރަޙައްދުތަކުގެ އިތުރުން އެމެރިކާގެ ހުޅަނގުދެކުނުގެ ސަރަޙައްދުތަކަށް އަރައިފިއެވެ. މި ތޫފާނާ އެކު އެ ސަރަޙައްދަށް ބޮޑެތި ގެއްލުންތަކެއް ލިބި، ގިނަ ޢަދަދެއްގެ މީހުންގެ ފުރާނައަށް ނުރައްކާވާނެ ކަމަށް ބެލެވޭ ކަމުގައި މޫސުމާ ބެހޭ އިދާރާތަކުން ދަނީ އިންޒާރު ކުރަމުންނެވެ.
ސަފަޔަރ-ސިމްޕްސަން މިންގަޑުން ކެޓެގަރީ 4ގެ ބާރުގަދަ ތޫފާނެއްގެ ގޮތުގައި ކުރިން ކަނޑައަޅާފައިވާ ހިލަރީގެ ބާރު ދަށްވެ، މިހާރު ކެޓެގަރީ 2ގެ ތުފާނަކަށް ބަދަލުވެފައިވާ ކަމުގައި އެމެރިކާގެ ނޭޝަނަލް ހަރިކޭން ސެންޓަރ (އެން.އެޗް.ސީ)ން ބުނެއެވެ. ނަމަވެސް، ބާހާ ކެލިފޯނިޔާގެ ސަރަޙައްދުތަކަށް ބޮޑެތި ގެއްލުންތަކެއް ލިބޭނެ ކަމަށް ބަލައި، އެ ސަރަޙައްދުގައި ރައްކާތެރި ކަމުގެ ފިޔަވަޅުތައް ވަނީ އަޅާފައެވެ.
މި ތޫފާނާ އެކު ބާހާ ކެލިފޯނިޔާގެ ސަރަޙައްދުތަކަށް ގަޑިއަކު 175 ކިލޯމީޓަރުގެ ބާރުމިނުގައި ވައި ޖެހެމުންދާ ކަމުގައި އެން.އެޗް.ސީން ބުނެއެވެ. އަދި، ބާހާ ކެލިފޯނިޔާގެ އިތުރުން އެމެރިކާގެ ހުޅަނގުދެކުނު ސަރަޙައްދުތަކަށް ބޯކޮށް ވާރޭވެހެމުންދާއިރު، ފެންބޮޑުވުމާ ގުޅިގެން ގިނަ ޢަދަދެއްގެ މީހުންގެ ފުރާނައަށް ނުރައްކާވާނެ ކަމަށް ބެލެވެއެވެ. ތޫފާން މިހާރު ދަތުރުކުރަމުންދަނީ އެމެރިކާގެ ކެލިފޯނިޔާގެ ދެކުނާއި ނެވާޑާގެ ދެކުނު ފަރާތާ ދިމާލަށެވެ.
މި ތޫފާނާ ގުޅިގެން ރައްކާތެރި ކަމުގެ ފިޔަވަޅުތައް އެޅުމުގެ ގޮތުން މެކްސިކޯގެ ރިސޯޓު ރަށެއް ކަމުގައިވާ ކާބޯ ސާން ލޫކާސްގައި ޢިމާރާތްތަކުގެ ދޮރުތަކާއި ކުޑަދޮރުތަކުގައި ފިލާ ޖަހައި ބަންދު ކުރުން ފަދަ ފިޔަވަޅުތައް އަޅަމުންދާ ކަމުގައި ރިޕޯޓުތައް ބުނެއެވެ. އަދި، ތޫފާނާ އެކު ކަނޑުތައް ގަދަވެ، އުދައަރަން ފެށުމުން ޢިމާރާތްތަކުގެ ބޭރުގައި ވެލި ބަސްތާ ޖެހުމުގެ މަސައްކަތް ވެސް ވަނީ ފަށާފައެވެ.
އައްސޭރިފަށުގައި ތިބި މީހުން ރައްކާތެރި ހިސާބުތަކަށް ބަދަލު ކުރަން މެކްސިކޯގެ އަސްކަރިއްޔާއިން ވެސް މިހާރު ދަނީ މަސައްކަތް ކުރަމުންނެވެ. މި ކަމުގައި 19,000 އަށްވުރެ ގިނަ ސިފައިން ދަނީ ހަރަކާތްތެރިވަމުންނެވެ. މިހާރު ވެސް ގިނަ ޢަދަދެއްގެ ބަޔަކު ރައްކާތެރި ހިސާބުތަކަށް ބަދަލުކޮށްފައިވާ ކަމުގައި އޮފިޝަލުން ވިދާޅުވެއެވެ. އަދި، ކަރަންޓުގެ ޚިދުމަތް ކެނޑިފައިވާ ސަރަޙައްދުތަކަށް އެ ޚިދުމަތް ގުޅައިދިނުމަށް 800 އަށްވުރެ ގިނަ އޮފިޝަލުން ދަނީ މަސައްކަތް ކުރަމުންނެވެ.
އެން.އެޗް.ސީން ބުނީ ކެލިފޯނިޔާއާއި ނެވާޑާގެ ދެކުނުގެ ސަރަޙައްދުތަކަށް 150 މިލިމީޓަރުގެ ވާރޭ ވެހޭނެ ކަމަށް އަންދާޒާ ކުރެވޭ ކަމުގައެވެ. އަދި، ބައެއް ސަރަޙައްދުތަކަށް 255 މިލިމީޓަރުގެ ވާރޭ ވެހޭނެ ކަމަށް ބެލެވޭ ކަމުގައި ވެސް އެ އިދާރާއިން ބުންޏެވެ. މި ކަމާ ގުޅިގެން ބޮޑު ސަރަޙައްދެއްގައި ފެންބޮޑުވާނެ ކަމުގެ އިންޒާރު އެން.އެޗް.ސީން ވަނީ ކޮށްފައެވެ.
ކެލިފޯނިޔާގެ ގަވަރުނަރުގެ ކުއްލި ހާލަތްތަކުގެ ޚިދުމަތްތަކާ ބެހޭ އޮފީހުގެ ޑިރެކްޓަރ ނޭންސީ ވޯޑް ވިދާޅުވީ ހިލަރީއަކީ ފާއިތުވި 10 ވަރަކަށް އަހަރުގެ ތެރޭގައި އެ ސަރަޙައްދަށް އަރާ އެންމެ ބާރުގަދަ ތޫފާން ކަމުގައެވެ. އަދި، މި ތޫފާނާ އެކު މީހުންގެ ފުރާނައަށް ނުރައްކާވާނެ ކަމަށް ބެލެވޭ ކަމަށް ވިދާޅުވެ، އޭނާ ވަނީ ރައްކާތެރި ކަމުގެ ފިޔަވަޅުތައް އެޅުމަށް އެ ސަރަޙައްދުތަކުގައި ދިރިއުޅޭ ޢާންމު ރައްޔިތުންނަށް އިރުޝާދު ދެއްވާފައެވެ.
ހިލަރީގެ އަސަރު ކުރާނެ ކަމަށް ބެލެވޭ ސަރަޙައްދުތަކުގައި އެމެރިކާގެ ފެޑެރަލް އެމަރޖެންސީ މެނޭޖްމަންޓް އޭޖެންސީ (ފީމާ)ގެ އޮފިޝަލުން ވެސް މިހާރު ދަނީ ހަރަކާތްތެރިވަމުންނެވެ. އަދި، ކެލިފޯނިޔާގެ ހާލަތާ ބެހޭ އެންމެ ފަހުގެ މަޢުލޫމާތު ރައީސް ޖޯ ބައިޑަނަށް ވަގުތުން އަރުވަމުންދާ ކަމުގައި އެ އިދާރާއިން ބުންޏެވެ.