ޔޫކްރެއިންގެ އުތުރުގައިވާ ތާރީޚީ ރަށެއް ކަމުގައިވާ ޗަރްނީހިވަށް ރަޝިޔާއިން ދިން ނުރައްކާތެރި މިސައިލް ހަމަލަތަކެއްގައި ޢާންމުންގެ ހަތް މީހުން މަރުވެ، 90 އަށްވުރެ ގިނަ މީހުން ޒަޚަމުވެއްޖެއެވެ. ޗަރްނީހިވްގެ މައިދާނަކަށް ދިން މި ހަމަލާގައި މަރުވި މީހުންގެ ތެރޭގައި އުމުރުން ހަ އަހަރުގެ ކުޑަ ކުއްޖަކު ވެސް ހިމެނެއެވެ.
ޔޫކްރެއިންގެ ދާޚިލީ ވުޒާރާއިން ބުނީ ރަޝިޔާގެ މިސައިލް ހަމަލަ އަމާޒުކޮށްފައި ވަނީ ހަފުލާއެއްގައި ބައިވެރިވުމަށް ގިނަ ޢަދަދެއްގެ ބަޔަކު މައިދާނަށް އެއްވެފައި ތިބި ވަގުތެއްގައި ކަމުގައެވެ. މި ހާދިސާގައި ޒަޚަމުވި 90 މީހުންގެ ތެރޭގައި 12 ކުޑަކުދިން ހިމެނޭ ކަމަށާއި، ފުލުހުންގެ 10 މީހުން ހިމެނޭ ކަމުގައި ވެސް އެ ވުޒާރާއިން ބުންޏެވެ.
ރަޝިޔާގެ ހަމަލަތައް އަމާޒުކޮށްފައިވާ މައިދާން ކައިރީގައި ޕޮލިޓެކްނިކް ޔުނިވަރިސިޓީއަކާއި، ތިއޭޓަރެއް ހުންނަ ކަމުގައި ރައީސް ވޮލޮޑޮމީރް ޒެލެންސްކީ ވިދާޅުވިއެވެ. މި ހާދިސާގައި ލިބިފައިވާ ގެއްލުންތައް ފެންނަ ވީޑިޔޯއެއް ވެސް ޒެލެންސްކީ ވަނީ ޢާންމު ކުރައްވާފައެވެ. ޗަރްނީހިވަކީ ވެރިރަށް ކީވާ 145 ކިލޯމީޓަރު ދުރުގައި އޮންނަ ރަށެކެވެ.
ކީވަށް ވެސް ރަޝިޔާއިން ވަނީ ވަރުގަދަ ހަމަލަތަކެއް އަމާޒުކޮށްފައެވެ. ޔޫކްރެއިންގެ އަސްކަރިއްޔާއިން ބުނީ ކީވަށް ހަމަލަދޭން ބޭނުން ކުރި 15 ޑްރޯން ދިފާޢުކޮށް ވައްޓައިލާފައިވާ ކަމުގައެވެ. ޔޫކްރެއިންގެ ދިފާޢީ ވުޒާރާއިން ބުނީ ރަޝިޔާއިން ބޭނުންކޮށްފައި ވަނީ އީރާނުން އުފައްދާފައިވާ "ޝާހިދު" މަރުކާގެ ޑްރޯންތަކެއް ކަމުގައެވެ.
ޔޫކްރެއިންގެ ޢާންމުން ދިރިއުޅޭ ޢިމާރާތްތަކާއި ޢާންމު ޚިދުމަތްތައް ދިނުމަށް ބޭނުންކުރާ ޢުމްރާނީ ވަސީލަތްތަކަށް ރަޝިޔާއިން ގަސްދުގައި ހަމަލަދެމުންދާ ކަމަށް ޔޫކްރެއިނުން ދަނީ ތުހުމަތު ކުރަމުންނެވެ. ނަމަވެސް، ރަޝިޔާއިން އެ ތުހުމަތުތައް ދޮގު ކުރެއެވެ. އަދި، ހަމަލަތައް އަމާޒު ކުރަމުން ދަނީ ޔޫކްރެއިންގެ އަސްކަރިއްޔާ ފައުޖުތަކާއި އަސްކަރީ މަރުކަޒުތަކަށް ކަމުގައި ރަޝިޔާއިން ދަނީ ބުނަމުންނެވެ.
މި ހަނގުރާމައަށް 542 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.