މެލޭޝިޔާގެ ސެލަންގޯ ސްޓޭޓްގެ ރަށެއް ކަމުގައިވާ ޝާ އަލާމްގެ ހައިވޭއެއްގެ މައްޗަށް ކުޑަ މަތިންދާބޯޓެއް ވެއްޓި 10 މީހުން މަރުވެއްޖެއެވެ. މި ހާދިސާގައި މަރުވި މީހުންގެ ތެރޭގައި މަތިންދާބޯޓުގައި ތިބި ހަ ފަސިންޖަރުންނާއި، ދެ ފަޅުވެރިންގެ އިތުރުން މަގުމަތީގައި ދަތުރު ކުރަމުންދިޔަ ދެ މީހުން ހިމެނެއެވެ. އޭގެ ތެރޭގައި ސެލަންގޯ ސްޓޭޓްގެ ޤާނޫނު ހަދާ މަޖިލީހުގެ މެންބަރެއް ވެސް ހިމެނެއެވެ.
ޝާ އަލާމްގެ ފުލުހުންގެ އިސްވެރިޔާ މުޙައްމަދު އިޤްބާލް އިބްރާހީމް ވިދާޅުވީ މި ހާދިސާގައި 10 މީހުން މަރުވެފައިވާ ކަން ކަށަވަރު ކުރެވިފައިވާ ކަމުގައެވެ. އޭގެ ތެރޭގައި ބޯޓު ވެއްޓުނު ވަގުތު މަގުމަތީގައި ދުއްވާފައި ދިޔަ ކާރެއްގައި އިން މީހަކާއި، ސައިކަލެއް ދުއްވާފައި ދިޔަ މީހެއް ހިމެނޭ ކަމުގައި އޭނާ ވިދާޅުވިއެވެ. މަތިންދާބޯޓުގައި ތިބީ އަށް މީހުންނެވެ. އެއީ ކޮން ޤައުމެއްގެ ބަޔެއް ކަން އަދި ސާފެއް ނޫނެވެ.
ވެއްޓުނު މަތިންދާބޯޓަކީ މެލޭޝިޔާގެ ރިސޯޓު ރަށެއް ކަމުގައިވާ ލަންކާވީން ފުރައިގެން ސެލަންގޯގައި އޮންނަ ސުބާންގ ވައިގެ ބަނދަރަށް ދަތުރުކުރި ބޯޓެކެވެ. އެ ބޯޓު ވެއްޓިފައި ވަނީ ސުބާންގ ވައިގެ ބަނދަރުގައި ޖައްސަން ތައްޔާރުވަމުން ދިޔަ ވަގުތުގައި ކަމަށް އޮފިޝަލުން ވިދާޅުވިއެވެ. މި ހާދިސާ ހިނގާފައި ވަނީ މެންދުރުގެ ވަގުތުގައެވެ.
ސެލަންގޯގެ ފުލުހުންގެ އިސްވެރިޔާ ޙުސައިން އުމަރު ޚާން ވިދާޅުވީ ހައިވޭއަށް ބޯޓު ވެއްޓި، ހައިވޭގައި ދަތުރު ކުރަމުންދިޔަ އުޅަނދުތަކެއްގައި ޖެހިފައިވާ ކަމުގައެވެ. އަދި، އެއަށްފަހު ބޮޑު ގޮވުމެއް ގޮވައި، މަތިންދާބޯޓުގައި އަލިފާން ރޯވި ކަމުގައި ވެސް އޭނާ ވިދާޅުވިއެވެ. މި ހާދިސާ ހިނގުމުގެ ކުރިން އެއްވެސް ކުއްލި ހާލަތެއް ހިނގާފައިވާ ކަން އެއަރޓްރެފިކް ކޮންޓްރޯލަށް ބޯޓުގެ ޕައިލެޓުން އަންގާފައި ނުވާ ކަމުގައި ވެސް އޭނާ ވިދާޅުވިއެވެ.
މި ހާދިސާގައި މަރުވެފައިވާ މީހުންގެ ތެރޭގައި ހިމެނެނީ ސެލަންގޯގެ ޤާނޫނު ހަދާ މަޖިލީހުގައި ޕަހާންގގެ ޕެލާންގާއީ ތަމްޞީލު ކުރައްވާ މެންބަރު ޖޮހަރީ ހާރޫނެވެ. އޭނާއަކީ ޔުނައިޓެޑް މެލޭސް ނޭޝަނަލް އޮގަނައިޒޭޝަން (ޔޫ.އެމް.އެން.އޯ) ޕާޓީއަށް ނިސްބަތްވާ މެންބަރެކެވެ. އެ ޕާޓީން ވަނީ މި ހާދިސާގައި މަރުވި މީހުންގެ ޢާއިލާތަކަށް ތަޢުޒިޔާ ފޮނުވާފައެވެ.
މެލޭޝިޔާގެ ސިވިލް އޭވިއޭޝަން އޮތޯރިޓީ (ސީ.އޭ.އޭ.އެމު)ން ބުނީ ވެއްޓިފައި ވަނީ ޖެޓް ވެލޭގެ މަތިންދާބޯޓެއް ކަމުގައެވެ. އެއީ، އަމިއްލަ ކުންފުންޏަކުން އޮޕަރޭޓްކުރާ މަތިންދާބޯޓެކެވެ. އެ މަތިންދާބޯޓަކީ އުދުހުގެ ހުއްދަ އޮތް، ޤަވާޢިދާ އެއްގޮތަށް އޮޕަރޭޓް ކުރަމުން ދިޔަ މަތިންދާބޯޓެއް ކަމުގައި ވެސް ސީ.އޭ.އޭ.އެމުން ބުންޏެވެ. އަދި، މަތިންދާބޯޓު ދުއްވަން ތިބީ ވަރަށް ތަޖުރިބާކާރު ދެ ޕައިލެޓުން ކަމުގައި ވެސް އެ އިދާރާއިން ބުންޏެވެ.
މެލޭޝިޔާގެ ދަތުރުފަތުރާ ބެހޭ ވަޒީރު އެންތޮނީ ލޯކް ވިދާޅުވީ ވެއްޓުނު މަތިންދާބޯޓުގެ ދަތުރާ ގުޅޭ މަޢުލޫމާތު ރައްކާކޮށްފައިވާ ކަޅު ފޮށި ހޯދުމުގެ މަސައްކަތް އަދިވެސް ކުރަމުންދާ ކަމުގައެވެ. އަދި، މި ހާދިސާ ހިނގަން މެދުވެރިވި ސަބަބު ދެނެގަތުމަށް ތަހުޤީޤު ކުރަމުންދާ ކަމަށް ވިދާޅުވެ، ބޯޓު ވެއްޓެން މެދުވެރިވި ސަބަބާ ގުޅޭ ގޮތުން ވާހަކަފުޅު ދައްކަވަން އޭނާ ވަނީ ދެކޮޅު ހައްދަވާފައެވެ.
މި ހާދިސާގައި މަރުވި މީހުންގެ ހަށިތައް މިހާރު ވަނީ ސެލަންގޯގެ ކްލާންގް ހޮސްޕިޓަލަށް ގެންގޮސްފައެވެ. މަތިންދާބޯޓުގައި ތިބި ފަސިންޖަރުންނާއި ފަޅުވެރިންގެ ވަނަވަރު ދެނެގަނެވިފައިވީ ނަމަވެސް، ކާރާއި ސައިކަލުގައި ތިބި ދެ މީހުންނަކީ ކޮން ބަޔެއް ކަން އަދި މިހާތަނަށް ދެނެގަނެވިފައި ނުވާ ކަމުގައި އޮފިޝަލުން ވިދާޅުވެއެވެ.