އިރުމަތީ އޭޝިޔާގެ ސަރަޙައްދުގައި އުފެދިފައިވާ ބާރުގަދަ ތޫފާނެއް ކަމުގައިވާ ލާން ޖަޕާނުގެ ސަރަޙައްދުތަކަށް އެރުމާ ގުޅިގެން ރައްކާތެރި ކަމުގެ ފިޔަވަޅުތައް އަޅަން ފަށައިފިއެވެ. ޕެސިފިކް ކަނޑުގައި އުފެދިފައިވާ މި ތޫފާނުގެ އަސަރު އެންމެ ފުރަތަމަ ކޮށްފައި ވަނީ ވަކަޔަމާ ޕުރޮވިންސުގެ ހޮންޝޫއަށެވެ. އަދި، އޮސަކާއާއި ކޯބޭގެ ސަރަޙައްދުތަކަށް ވެސް ދަނީ ތޫފާނުގެ އަސަރު ކުރަމުންނެވެ.
ޖަޕާނުގެ މޫސުމާ ބެހޭ އިދާރާއިން ބުނީ މި ތޫފާނާ އެކު އޮސަކާއާއި ކޯބޭއަށް ވައިބާރުވެ ބޯކޮށް ވާރޭވެހެމުންދާ ކަމުގައެވެ. އެ ދެ ސަރަޙައްދަށް ގަޑިއަކު 144 ކިލޯމީޓަރުގެ ބާރުމިނުގައި ވައި ޖެހެމުންދާ ކަމަށް ބުނެ، ބޯކޮށް ވާރޭވެހުމާ އެކު ކޯރުތައް ފުރިގެން ބަންޑުންވެ، ބިންގަނޑު ކެނޑުމުގެ ހާދިސާތައް ހިނގާފާނެ ކަމުގެ އިންޒާރު އެ އިދާރާއިން ވަނީ ދީފައެވެ. އަދި، ކަނޑުތައް ގަދަވެ، އައްސޭރި ފަށުގެ ސަރަޙައްދުތައް އުދައަރަމުންދާ ކަމުގައި ރިޕޯޓުތައް ބުނެއެވެ.
ވައިބާރުވުމާ ގުޅިގެން ޖަޕާނުގެ އެކި ސަރަޙައްދުތަކުގައި ކަރަންޓުގެ ޚިދުމަތް ދިނުމަށް ބޭނުންކުރާ ޓަވަރުތަކާއި ހޮޅިދަނޑިތަކަށް ވަނީ ގެއްލުންވެފައެވެ. އަދި، ހަތް ސަރަޙައްދެއްގައިވާ 50,000 އަށްވުރެ ގިނަ ގޭބީސީން ކަރަންޓުގެ ޚިދުމަތް މެދުކެނޑިފައިވާއިރު، އެ ސަރަޙައްދުތަކަށް އަލުން ޚިދުމަތް ގުޅައިދޭން އޮފިޝަލުން ދަނީ މަސައްކަތް ކުރަމުންނެވެ. މި ތޫފާނާ އެކު އޮސަކާއާއި ކޯބޭގެ ސަރަޙައްދުތަކަށް 350 މިލިމީޓަރުގެ ވާރޭ ވެހޭނެ ކަމަށް އެ ޤައުމުގެ މޫސުމާ ބެހޭ އިދާރާއިން އަންދާޒާ ކުރެއެވެ.
ތޫފާން ލާނާ ގުޅިގެން ވަކަޔަމާ ޕްރިފެކްޗަރުގެ ބައެއް ސަރަޙައްދުތަކުގައި ރޭލު ދަތުރުތަކާއި ވައިގެ ދަތުރުތައް ވެސް މިހާރު ވަނީ މެދުކަނޑައިލާފައެވެ. ޖަޕާން އެއަރލައިންސުން ބުނީ 240 ފްލައިޓް ކެންސަލްކޮށްފައިވާ ކަމުގައެވެ. އަދި، އޭ.އެން.އޭއިން ވެސް ވަނީ 313 ފްލައިޓެއް ކެންސަލްކޮށްފައެވެ. ތޫފާނުގެ އަސަރު ކުރަމުންދާ ސަރަޙައްދުތަކުގައި ދިރިއުޅޭ 180,000 އެއްހާ މީހުންނަށް ރައްކާތެރި ހިސާބުތަކަށް ބަދަލުވުމަށް އިރުޝާދު ދީފައިވާއިރު، ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދޭން އޮފިޝަލުން މިހާރު ދަނީ މަސައްކަތް ކުރަމުންނެވެ.