ރެފިއުޖީންތަކެއް ގޮވައިގެން ދަތުރު ކުރި ބޯޓެއް ތޫނިސްގެ އައްސޭރިފަށަށް ފެތި، އޭގައި ދަތުރު ކުރި މީހުންގެ ތެރެއިން ފަސް މީހުން މަރުވެއްޖެއެވެ. މި ހާދިސާ ހިނގާފައި ވަނީ ތޫނިސްގެ ރަށެއް ކަމުގައިވާ ޞަފާޤިސްގެ އައްސޭރިފަށުގައެވެ. މި ހާދިސާގައި ކަނޑުވި ކަމަށް ބެލެވޭ އިތުރު ބަޔަކު ހޯދަން ތޫނިސްގެ ކޯސްޓްގާޑުން މިހާރު ދަނީ މަސައްކަތް ކުރަމުންނެވެ.
ތޫނިސްގެ ކޯސްޓްގާޑުގެ ތަރުޖަމާނު ސައްޔިދީ މަޞްމޫދީ ވިދާޅުވީ ކަނޑުވެފައިވާ ކަމަށް ބެލެވޭ ހަތް މީހަކު ހޯދަން މަސައްކަތް ކުރަމުންދާ ކަމަށާއި، 23 މީހުން ސަލާމަތްކޮށް މިހާރު އެއްގަމަށް ގެންގޮސްފައިވާ ކަމުގައެވެ. މި ހާދިސާގައި މަރުވި މީހުންގެ ތެރޭގައި ކުޑަ ކުއްޖަކާއި ދެ އަންހެނުން ހިމެނޭ ކަމުގައި ވެސް އޭނާ ވިދާޅުވިއެވެ. އެ ބޯޓުގައި ތިވީ ޤަވާޢިދާ ޚިލާފަށް ވިލާތުގެ ޤައުމުތަކަށް ހިޖުރަކުރަން މަސައްކަތް ކުރި ރެފިއުޖީންނެވެ. އެއީ، އެފްރިކާ ބައްރުގެ ޤައުމުތަކަށް ނިސްބަތްވާ މީހުންނެވެ.
ތޫނިސްއަކީ ޤަވާޢިދާ ޚިލާފަށް ވިލާތުގެ ޤައުމުތަކަށް ހިޖުރަކުރާ ރެފިއުޖީން ބޭނުންކުރާ އެއް ބަނދަރެވެ. ތޫނިސް މެދުވެރިކޮށް މެޑިޓެރޭނިޔަން ކަނޑު ހުރަސްކޮށް ވިލާތުގެ ޤައުމުތަކަށް ހިޖުރަކުރާ ރެފިއުޖީންގެ ޢަދަދު ފާއިތުވި މަސްތަކުގެ ތެރޭގައި އިތުރުވެފައިވާ ކަން ފާހަގަ ކުރެވެއެވެ. މެޑިޓެރޭނިޔަން ކަނޑު ހުރަސްކޮށް ރެފިއުޖީން ކުރަނީ ނުރައްކަލުން ފުރިފައިވާ ދަތުރެކެވެ.
ހުސްވި ހަފުތާގައި ރެފިއުޖީންނާ އެކު ދަތުރު ކުރަމުންދިޔަ ބޯޓެއް ތޫނިސްގެ ޤާބިސްގެ އައްސޭރިފަށަށް ފެތި، އޭގައި ތިބި ރެފިއުޖީންގެ ތެރެއިން ދެ މީހުން ވަނީ މަރުވެފައެވެ. އެ ބޯޓު ފެތިފައި ވަނީ 20 މީހުންނާ އެކު ދަތުރު ކުރަމުން ދަނިކޮށް ޤާބިސާ 120 މީޓަރު ދުރަށެވެ. އެ ހާދިސާގައި މަރުވި މީހުންގެ ތެރޭގައި ވެސް ތުއްތު ކުއްޖަކު ހިމެނެއެވެ.
މަޞްމޫދީ ވިދާޅުވީ މި ދެ ހާދިސާ ހިނގަން މެދުވެރި ސަބަބު ދެނެގަތުމަށް ތަހުޤީޤު ކުރަން ފަށާފައިވާ ކަމުގައެވެ. އަދި، އެ ބޯޓުތައް އޮޕަރޭޓް ކޮށްފައި ވަނީ ކޮން ބަޔެއް ކަން ދެނެގަތުމަށް މަސައްކަތް ކުރަމުންދާ ކަމުގައެވެ. ޤަވާޢިދާ ޚިލާފަށް ވިލާތުގެ ޤައުމުތަކަށް ރެފިއުޖީން ގެންގޮސް ދިނުމަކީ މިހާރު ފުޅާ ދާއިރާއެއްގައި ކުރާ ވިޔަފާރިއެވެ.
ހިޖުރަކުރާ މީހުންނާ ބެހޭ ބައިނަލްއަޤުވާމީ ޖަމުޢިއްޔާ، އިންޓަރނޭޝަލް އޮގަނައިޒޭޝަން ފޯ މައިގްރޭޝަން (އައި.އޯ.އެމު)ން ބުނީ މެޑިޓެރޭނިޔަން ކަނޑު ހުރަސްކޮށް ވިލާތުގެ ޤައުމުތަކަށް ހިޖުރަ ކުރަން މަސައްކަތް ކުރުމުގެ ތެރޭގައި މި އަހަރު މަރުވެފައިވާ މީހުންގެ ޢަދަދު 1,800 އަށް އަރާ ކަމުގައެވެ. މެޑިޓެރޭނިޔަން ކަނޑުގައި އޮންނަ އެ މަގަކީ މިހާރު އޮތް އެންމެ ނުރައްކާތެރި މަގު ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
މި އަހަރުގެ ފުރަތަމަ ހަ މަސް ދުވަހުގެ ތެރޭގައި ތޫނިސުން ފުރައިގެން ވިލާތުގެ ޤައުމުތަކަށް ހިޖުރަކުރަން މަސައްކަތް ކުރި 32,290 މީހުން ތޫނިސްގެ ކޯސްޓްގާޑުން ވަނީ ހުއްޓުވާފައެވެ. ހުސްވި އަހަރުގެ އެ މުއްދަތުގެ ތެރޭގައި ހުއްޓުވާފައިވާ މީހުންގެ ޢަދަދު 9,217 އަށް އަރައެވެ. އެހެންކަމުން، ވިލާތުގެ ޤައުމުތަކަށް ހިޖުރަކުރަން މަސައްކަތް ކުރާ މީހުންގެ ޢަދަދު އެތައް ގުނައެއް އިތުރުވެފައިވާ ކަން ފާހަގަކުރެވެއެވެ.
ތޫނިސްގެ އިޤުތީޞާދީ ހާލަތު މި ވަގުތު އޮތީ ވަރަށް ދަށު ދަރަޖައިގައެވެ. އެ ޤައުމަށް ހިޖުރަކޮށްފައިވާ އެފްރިކާ ބައްރުގެ ޤައުމުތަކަށް ނިސްބަވްތާ ރެފިއުޖީންގެ މައްސަލަ ހައްލު ކުރަން ވަނީ ނުކުޅެދިފައެވެ. ވިލާތުގެ އިއްތިހާދު (އީ.ޔޫ)ން ވަނީ އެ ކަމުގައި ތޫނިސްގެ ސަރުކާރަށް އެހީތެރިކަން ފޯރުކޮށްދޭން ނިންމާފައެވެ. އަދި، އެ މަސައްކަތަށް 109 މިލިޔަން އެމެރިކާ ޑޮލަރު ޚަރަދު ކުރަން ނިންމައި، ތޫނިސްގެ ސަރުކާރާ އެކު އެއްބަސްވުމެއް އެކުލަވައިލާފައެވެ.