ޔަހޫދީ އިސްރާޢީލުގެ ސިފައިން އަޅުވެތިކޮށްފައިވާ ހުޅަނގު އައްސޭރީގެ އަރީޙާއަށް އަރައި ހިންގި އިންސާނިއްޔަތާ ޚިލާފު ޖަރީމާތަކެއްގައި ފަލަސްޠީނުގެ ދެ މީހުން ޝަހީދުކޮށްލައިފިއެވެ. ޔަހޫދީ ޓެރެރިސްޓު ސިފައިންގެ އުދުވާންތައް ހިންގާފައި ވަނީ އަރީޙާގައި ހުންނަ ރެފިއުޖީ ކޭމްޕެއްގައެވެ.
އަރީޙާގެ ހޮސްޕިޓަލުގެ ޑިރެކްޓަރު ވިދާޅުވީ ޝަހީދުކޮށްލާފައި ވަނީ ދެ ޒުވާނުން ކަމުގައެވެ. އަދި، އެ ދެ މީހުންގެ މެޔަށް ވަޒަން އަރާފައިވާ ކަމުގައި އޭނާ ވިދާޅުވިއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ވެސް ވަނީ ޔަހޫދީންގެ ހަމަލަތަކެއްގައި ދެ ޒުވާނުން ޝަހީދުވެފައިވާ ކަން ކަށަވަރު ކޮށްދީފައެވެ.
ޔަހޫދީ ޖައްބާރު ސިފައިންގެ ޝިކާރައަކަށްވެ ޝަހީދުވެފައި ވަނީ އުމުރުން 16 އަހަރުގެ ޤުޞައްޔު އަލް-ވަލްޖީއާއި 25 އަހަރުގެ މުޙައްމަދު ނުޖޫމް ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުންޏެވެ. ޔަހޫދީ ސިފައިން އަރީޙާގެ ރެފިއުޖީ ކޭމްޕަށް ވަދެގަނެފައި ވަނީ ފަތިހުގެ ވަގުތުގައެވެ. އަދި، އެ މީހުންނާއި ފަލަސްޠީނުގެ މިނިވަން ކަމަށް ޖިހާދު ކުރާ މުޖާހިދުންގެ ޖަމާޢަތްތަކާ ދެމެދު ހަމަލަ ބަދަލުކޮށްފައިވާ ކަމުގައި ރެފިއުޖީ ކޭމްޕުގައި ދިރިއުޅޭ ރައްޔިތުން ބުނެއެވެ.
ޔަހޫދީ ޓެރެރިސްޓު ސިފައިން ހުޅަނގު އައްސޭރީގެ ބިންތަކަށް އަރައި ހިންގާ ލާއިންސާނީ އުދުވާންތަކުގެ ޢަދަދު ފާއިތުވި މަހެއްހާ ދުވަހުގެ ތެރޭގައި ވަނީ އިތުރުކޮށްފައެވެ. ޔަހޫދީ ސިފައިންގެ އިތުރުން، ފަލަސްޠީނުގެ ބިންތަކުގައި ވަޒަންވެރި ކޮށްފައިވާ ޔަހޫދީން ވެސް ދަނީ ފަލަސްޠީނުގެ މުސްލިމުންނަށް ހަމަލަދީ އެ މީހުން ގަތުލު ކުރަމުންނެވެ. އަދި، އެ މީހުންގެ ގެދޮރާއި މުދަލުގައި ހުޅުޖަހައި ގެއްލުން ދެމުންނެވެ.
ޔަހޫދީ އިސްރާޢީލުގެ ޖައްބާރު ސިފައިން މި އަހަރުގެ މިހާތަނަށް ހިންގާފައިވާ ލާއިންސާނީ ޖަރީމާތަކުގައި ޝަހީދުކޮށްލާފައިވާ ފަލަސްޠީން މީހުންގެ ޢަދަދު މިހާރު ވަނީ 216 އަށްވުރެ މައްޗަށް އަރާފައެވެ. އޭގެ ތެރޭގައި ގިނައީ ކުށެއް ނެތް ޢާންމުންނާއި ކުޑަކުދިންނެވެ. ޖުލައި މަހުގެ ކުރީކޮޅު ޔަހޫދީ ސިފައިން ޖިނީން ރެފިއުޖީ ކޭމްޕުގައި ހިންގި އުދުވާންތަކެއްގައި ވެސް ފަލަސްޠީނުގެ 12 މީހުން ޝަހީދުކޮށްލިއެވެ. އަދި، އެ ކޭމްޕު ސުންނާފަތިކޮށްލިއެވެ.
ޔަހުދީ އިސްރާޢީލުގެ އިސްތިޢުމާރީ ސިފައިން ފަލަސްޠީނުގެ ބިންތަކަށް އަރައި ހުޅަނގު އައްސޭރި އަޅުވެތިކޮށްފައި ވަނީ 1967 ވަނަ އަހަރުއެވެ. އޭގެ ފަހުން ފަލަސްޠީނުގެ ރައްޔިތުން ދިރިއުޅެމުން ދަނީ ޔަހޫދީންގެ އަޅުވެތިކަމުގެ ދަށުގައެވެ. އަދި، ފަލަސްޠީނުގެ ބިންތަކުގައި ވަޒަންވެރިކޮށްފައިވާ ޔަހޫދީންގެ ޢަދަދު މިހާރު 490,000 އަށް އަރައެވެ.