ޕޮލެންޑުގެ ސަރަޙައްދީ ރޮނގު ކައިރީގައި އޮންނަ ޔޫކްރެއިންގެ ދެ ސަރަޙައްދަކަށް ރަޝިޔާއިން ވަރުގަދަ ވައިގެ ހަމަލަތަކެއް ދީފިއެވެ. ޕޮލެންޑަކީ ޔޫކްރެއިންގެ ހުޅަނގު ފަރާތުގައި އޮންނަ ނޭޓޯގެ މެންބަރު ޤައުމެކެވެ. ރަޝިޔާގެ ހަމަލަތަކުގައި ތިން މީހުން މަރުވެފައިވާ ކަމުގައި ޔޫކްރެއިނުން ބުނެއެވެ.
ރަޝިޔާގެ ވައިގެ ހަމަލަތައް އަމާޒުކޮށްފައި ވަނީ ލްވިވްގެ އިތުރުން ޔޫކްރެއިންގެ ހުޅަނގުއުތުރުގައި އޮންނަ ވޯލިނަށެވެ. މިއީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ޔޫކްރެއިނަށް އަރައި ރަޝިޔާއިން ފެށި ހަނގުރާމައިގައި ލްވިވަށް ދީފައިވާ އެންމެ ވަރުގަދަ ހަމަލަތައް ކަމުގައި ޔޫކްރެއިންގެ މީޑިޔާތަކުން ރިޕޯޓު ކުރެއެވެ.
ވޯލިނަށް ދީފައިވާ ހަމަލަތައް އަމާޒުކޮށްފައި ވަނީ އެ ސަރަޙައްދުގެ ވެރިރަށް ލުތްސްކަށެވެ. ވޯލިންގެ ގަވަރުނަރު ޔޫރީ ޕުހުލެއިކޯ ވިދާޅުވީ ރަޝިޔާގެ ހަމަލަތަކުގައި ތިން މީހުން މަރުވެފައިވާ ކަމަށާއި، ގިނަ ޢަދަދެއްގެ ބަޔަކު ޒަޚަމުވެފައިވާ ކަމުގައެވެ. އަދި ޒަޚަމުވި މީހުންނަށް ހޮސްޕިޓަލުގައި އެޑްމިޓުކޮށްގެން ފަރުވާ ދޭން ޖެހުނު ކަމުގައި ވެސް އޭނާ ވިދާޅުވިއެވެ.
ލްވިވްގެ ގަވަރުނަރު މަކްސިމް ކޯޒެޓްސްކީ ވިދާޅުވީ ރަޝިޔާގެ ހަ މިސައިލް ހަމަލައެއް އެ ރަށުގެ އެކި އަމާޒުތަކަށް އަރާފައިވާ ކަމުގައެވެ. އަދި، އެ ހަމަލަތަކުގައި ޢާންމުން ދިރިއުޅޭ އެޕާޓްމަންޓް ޢިމާރާތްތަކުގެ އިތުރުން ކުޑަކުދިންގެ ސްކޫލެއްގެ ކުޅޭ ސަރަޙައްދަށް ވަނީ ގެއްލުން ލިބިފައެވެ. މި ހަމަލަތަކުގައި 15 މީހުން ޒަޚަމުވެފައިވާއިރު، އޭގެ ތެރޭގައި 10 އަހަރުގެ ކުޑަކުއްޖަކު ވެސް ހިމެނޭ ކަމުގައި އޭނާ ވިދާޅުވިއެވެ.
ލްވިވާއި ވޯލިނަކީ ޕޮލެންޑާ ސަރަޙައްދީ ރޮނގު ހިއްސާ ކުރާ ދެ ސަރަޙައްދެވެ. އަދި، އެއީ ހަނގުރާމައިގެ ކުރީ ސަފާ މާ ދުރުގައި އޮތް ދެ ސަރަޙައްދު ކަން ފާހަގަކުރެވެއެވެ. ޖުލައި މަހުގެ ތެރޭގައި ވެސް ރަޝިޔާއިން ވަނީ ލްވިވަށް މިސައިލް ހަމަލަތަކެއްދީ ޢާންމުންގެ ހަތް މީހުން މަރައިލާފައެވެ. އެ މީހުން މަރުވީ އެ މީހުން ދިރިއުޅެމުން ދިޔަ އެޕާޓްމަންޓް ޢިމާރާތަށް ހަމަލަތައް އެރުމުގެ ސަބަބުންނެވެ.
ލްވިވަކީ ޔޫކްރެއިން ސަރުކާރުގެ ބައެއް އޮފީސްތައް ހިންގާ ރަށެއް ކަން ފާހަގަ ކުރެވެއެވެ. އަދި، ޔޫކްރެއިންގެ ރައްޔިތުންނަށް އިންސާނީ އެހީތެރިކަން ފޯރުކޮށްދޭން މަސައްކަތްކުރާ ބައިނަލްއަޤުވާމީ ޖަމުޢިއްޔާ ޖަމާޢަތްތަކުގެ އޮފީސްތައް ވެސް ލްވިވްގައި ހުރެއެވެ.
ލްވިވާއި ވޯލިންގެ އިތުރުން ޔޫކްރެއިންގެ އިރުދެކުނުގައިވާ ދްނިޕްރޯއަށް ވެސް ރަޝިޔާއިން ވަނީ ވަރުގަދަ ހަމަލަތަކެއް ދީފައެވެ. މީގެ ތެރެއިން އެއް ހަމަލަ އަމާޒުކޮށްފައި ވަނީ ވިޔަފާރިކުރާ މަރުކަޒަކާއި ކުޅިވަރު ކުޅޭ ކޮމްޕްލެކްސްއަކަށް ކަމުގައި އެ ސަރަޙައްދުގެ ގަވަރުނަރު ސަރްހީ ލިޔުސަކް ވިދާޅުވިއެވެ. މި ހަމަލަތަކުގައި ދެ މީހުން ޒަޚަމުވި ކަމުގައި ވެސް އޭނާ ވިދާޅުވިއެވެ.
އޮގަސްޓު 15 ވަނަ ދުވަހު ރަޝިޔާއިން ޔޫކްރެއިންގެ އެކި ސަރަޙައްދުތަކަށް ދިން ހަމަލަތައް އަމާޒުކޮށްފައި ވަނީ ޢާންމުންގެ ގެދޮރާއި، ޢާންމު ޚިދުމަތްތައް ދިނުމަށް ބޭނުންކުރާ ޢިމާރާތްތަކާއި ވަސީލަތްތަކަށް ކަމުގައި ޔޫކްރެއިންގެ ބޮޑުވަޒީރު ޑެނިސް ޝްމިހާލް ވިދާޅުވިއެވެ. އޭގެ ތެރޭގައި ސްކޫލްތަކާއި ހޮސްޕިޓަލްތައް ހިމެނޭ ކަމުގައި ވެސް އޭނާ ވިދާޅުވިއެވެ.
ޔޫކްރެއިންގެ ރަށްތަކަށް ހަމަލަދޭން ރަޝިޔާއިން 28 ކްރޫޒް މިސައިލް ބޭނުންކޮށްފައިވާ ކަމުގައި ޔޫކްރެއިނުން ބުނެއެވެ. އޭގެ ތެރެއިން 16 މިސައިލެއް ދިފާޢުކޮށް ވައްޓައިލާފައިވާ ކަމުގައި އެ ޤައުމުގެ އަސްކަރިއްޔާއިން ބުނެއެވެ. ދިފާޢުކޮށް ވައްޓައިލާފައިވާ މިސައިލްތަކާ ގުޅިގެން އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި ވެސް އޮފިޝަލުން ވިދާޅުވެއެވެ.
މި ހަނގުރާމައަށް 538 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.