ރަޝިޔާގެ ދެކުނުގައިވާ ދަޖިސްތާނުގައި ހުންނަ ޕެޓްރޯލާއި ޑީސަލް ވިއްކާ ތެޔޮ އިސްޓޭޝަނެއްގައި ހިނގި ނުރައްކާތެރި އަލިފާނުގެ ހާދިސާއެއްގައި 30 މީހުން މަރުވެ، ގިނަ ޢަދަދެއްގެ ބަޔަކު ޒަޚަމުވެއްޖެއެވެ. ދަޖިސްތާނުގެ ވެރިރަށް މަހަޗްކަލާގައި ހިނގި މި ހާދިސާގައި މަރުވި މީހުންގެ ތެރޭގައި ތިން ކުޑަކުދިން ވެސް ހިމެނެއެވެ. އަދި. 150 އެއްހާ މީހުން ވަނީ ޒަޚަމުވެފައެވެ.
ރަޝިޔާގެ ކުއްލި ހާލަތްތަކާ ގުޅޭ ޚިދުމަތްތަކާ ބެހޭ ވުޒާރާއިން ބުނީ ފުރަތަމަ އަލިފާން ރޯވެފައި ވަނީ ޕެޓްރޯލް އިސްޓޭޝަނާ އިންވެގެން ހުރި ދުއްވާ އުޅަނދުފަހަރު މަރާމާތުކުރާ ޖަރާޖެއްގައި ކަމަށެވެ. އަދި، ބާރުގަދަ ގޮވުމެއް ގޮވައި، އަލިފާންގަނޑު ޕެޓްރޯލް އިސްޓޭޝަނަށް ފެތުރިފައިވާ ކަމަށް ވެސް އެ ވުޒާރާއިން ބުންޏެވެ.
އެ ތަނުގައި ރޯވި އަލިފާންގަނޑު ކޮންޓްރޯލް ކުރެވިފައި ވަނީ އެތައް ގަޑިއިރެއްގެ މަސައްކަތުންނެވެ. މި ހާދިސާގައި އެ ތަނާ އިންވެގެން ހުރި އެހެން ޢިމާރާތެއްގައި ވެސް ރޯވެފައިވާ ކަމުގައި އޮފިޝަލުން ވިދާޅުވިއެވެ. އަދި، މަރުވެފައިވާ އިތުރު މީހުންގެ ހަށިތައް ފެންނަމުންދާ ކަމަށާއި، މި ހާދިސާގައި މަރުވެފައިވާ މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައި ވެސް އެ ޤައުމުގެ ކުއްލި ހާލަތުގެ ޚިދުމަތްތަކާ ބެހޭ ވުޒާރާއިން ބުންޏެވެ.
މި ހާދިސާގައި ޒަޚަމުވެފައިވާ މީހުންގެ ތެރޭގައި 13 ކުޑަކުދިން ހިމެނޭ ކަމުގައި ދަޖިސްތާނުގެ ޞިއްޙަތާ ބެހޭ ވުޒާރާއިން ބުނެއެވެ. އެ ތަނުގައި ރޯވި އަލިފާންގަނޑު ނިއްވައިލެވިފައި ވަނީ ގާތްގަނޑަކަށް ހަތަރު ގަޑިއިރުގެ މަސައްކަތުންނެވެ. އަލިފާންގަނޑު ނިއްވައިލެވިފައި ވަނީ 600 އަކަފޫޓުގެ ސަރަޙައްދަކަށް އަލިފާންގަނޑު ފެތުރުނު ފަހުންނެވެ.