މިސައިލް ފަދަ ހަތިޔާރު އުފައްދާ މިންވަރު އިތުރު ކުރަން އުތުރު ކޮރެޔާގެ ޒައީމު ކިމް ޖޮންގް އުން އެ ޤައުމުގެ އަސްކަރިއްޔާއަށް އަމުރު ކުރައްވައިފިއެވެ. އޭނާ މި ކަމަށް އަމުރު ކުރައްވާފައި މި ވަނީ ދެކުނު ކޮރެޔާއާއި އެމެރިކާއިން ގުޅިގެން ކޮންމެ އަހަރަކު ބާއްވާ އަސްކަރީ ތަމްރީނުތައް ފެށުމަށް ތައްޔާރުވަމުންދާ ދަނޑިވަޅެއްގައެވެ.
މިސައިލާއި އެހެން ހަތިޔާރު އުފައްދާ ކާރުޚާނާއަކަށް ކިމް ދާދިފަހުން ވަނީ ޒިޔާރަތް ކުރައްވާފައެވެ. ހަތިޔާރުގެ އިތުރުން އަސްކަރީ އުޅަނދުފަހަރާއި އާޓިލަރީ ބަޑީގެ ޝެލް ނުވަތަ ވަޒަން އުފެއްދުމަށް ކުރަމުންދާ މަސައްކަތްތައް ވެސް އޭނާ އެ ތަނަށް ކުރެއްވި ޒިޔާރަތުގައި ބައްލަވައިލެއްވިއެވެ.
އެ ތަނުގައި ހުންނަވައި އަސްކަރިއްޔާގެ އިސްވެރިންނަށް އިރުޝާދު ދެއްވަމުން ކިމް ވިދާޅުވީ އުތުރު ކޮރެޔާގެ އަސްކަރިއްޔާއިން އަބަދު ވެސް އޮންނަން ޖެހޭނީ ތައްޔާރީ ހާލަތުގައި ކަމުގައެވެ. އަދި، އެހެން ޤައުމަކުން ބައްދަލުނުކުރެވޭހާ ގިނަ ޢަދަދަކަށް މިސައިލާއި ހަތިޔާރު އުފައްދަން ޖެހޭ ކަމުގައި އޭނާ ވިދާޅުވިއެވެ.
އުތުރު ކޮރެޔާގެ އަސްކަރީ މަރުކަޒުތަކާއި ހަތިޔާރު އުފައްދާ ކާރުޚާނާތަކަށް ކިމް ކުރައްވާ މި ފަދަ ދަތުރުފުޅުތައް ފަހަކަށް އައިސް އިތުރު ކޮށްފައިވާ ކަން ފާހަގަކުރެވެއެވެ. އަދި، އުތުރު ކޮރެޔާގެ އަސްކަރީ ބާރުވެރިކަން އިތުރު ކުރަން އޭނާ ގެންދަވަނީ މަސައްކަތް ކުރައްވަމުންނެވެ.
ދެކުނު ކޮރެޔާއާއި އެމެރިކާއިން ގުޅިގެން ކޮންމެ އަހަރު ބާއްވަމުންދާ އަސްކަރީ ތަމްރީނުތަކަކީ އުތުރު ކޮރެޔާއަށް ވެރިވެގަންނަން ތައްޔާރުވުމުގެ ގޮތުން ހިންގާ ތަމްރީނުތަކެއްގެ ގޮތުގައި ކިމް ސިފަ ކުރައްވައެވެ. މިސައިލާއި އެހެން ހަތިޔާރު އުފައްދާ މިންވަރު އިތުރު ކުރަން އޭނާ ބޭނުންވާ ސަބަބަކީ އެމެރިކާއާއި ދެކުނު ކޮރެޔާއިން ގުޅިގެން ދީފާނެ ހަމަލައަކަށް ތައްޔާރުވުމެވެ.
ދެކުނު ކޮރެޔާއާއި އެމެރިކާ ގުޅިގެން އުލްޗީ ފްރީޑަމް ގާޑިޔަންގެ ނަމުގައި ބާއްވާ އަސްކަރީ ތަމްރީނުތައް ފެށުމަށް ހަމަޖެހިފައި ވަނީ އޮގަސްޓު 21 ވަނަ ދުވަހުއެވެ. އަދި، މި މަހުގެ ނިޔަލަށް އެ ތަމްރީނުތައް ކުރިއަށް ދާނެއެވެ. އެ ތަމްރީނުތަކުގެ މައިގަނޑު ބޭނުމަކީ އުތުރު ކޮރެޔާގެ ނުރައްކަލުން ދިފާޢުވުމުގެ ގާބިލުކަން އިތުރު ކުރުން ކަމުގައި ދެކުނުންނާއި އެމެރިކާއިން ބުނެއެވެ.
އެހެން އަހަރުތަކާ ޚިލާފަށް މި އަހަރުގެ ތަމްރީނުތަކުގައި އެތަކެއް ސަތޭކަ ހާސް ސިފައިން ބައިވެރިވާނެ ކަމަށް ދެކުނު ކޮރެޔާގެ ޖޮއިންޓް ޗީފްސް އޮފް ސްޓާފް (ޖޭ.ސީ.އެސް)އިން ވަނީ އިޢުލާނު ކޮށްފައެވެ. އޭގެ ތެރޭގައި އ.ދގެ ކޮމާންޑުގައި ހިމެނޭ މެންބަރު ޤައުމުތަކުގެ ސިފައިން ވެސް ހިމެނޭ ކަމުގައި އެ އިދާރާއިން ބުނެއެވެ.
ޖޭ.ސީ.އެސްގެ ތަރުޖަމާނު ލީ ސޮންގް-ޖުން ވިދާޅުވީ މި ތަމްރީނުތަކަކީ އުތުރު ކޮރެޔާގެ ފުށުން އަންނަ ނުރައްކާތަކުން ދިފާޢުވުމަށް ދެކުނަށް މުހިންމު ތަމްރީނުތަކެއް ކަމުގައެވެ. އަދި، ސަރަޙައްދީ ސުލްޙަމަސަލަސް ކަން ދެމެހެއްޓުމަށް މުހިންމު ތަމްރީނުތަކެއް ކަމުގައެވެ. އަސްކަރީ ތަމްރީނުތައް ބޭއްވުމުގެ ތައްޔާރީތައް ކުރަމުން މި ދަނީ އުތުރު ކޮރެޔާއިން މިސައިލް ޓެސްޓުތައް ހެދުން އިތުރު ކޮށްފައިވާ ދަނޑިވަޅެއްގައެވެ.
މި އަހަރުގެ ތެރޭގައި އެ ޤައުމުން ވަނީ ރެކޯޑު ޢަދަދަކަށް މިސައިލް ޓެސްޓުތައް ހަދާފައެވެ. އޭގެ ތެރޭގައި އެހެން ބައްރުތަކުގައި އޮންނަ ޤައުމުތަކަށް ހަމަލަދޭން ބޭނުން ކުރެވޭނެ އިންޓަރކޮންޓިނެންޓަލް ބެލިސްޓިކް މިސައިލް (އައި.ސީ.ބީ.އެމް) ފަދަ ނުރައްކާތެރި ހަތިޔާރު ވެސް ހިމެނެއެވެ.
އުތުރު ކޮރެޔާއިން ފަހަކަށް އައިސް ވަނީ ހަތިޔާރު އުފެއްދުން އިތުރު ކޮށްފައެވެ. އަދި، އެ ޤައުމުން މިހާރު ރަޝިޔާއަށް ހަތިޔާރު ފޯރުކޮށްދެމުންދާ ކަމުގައި އެމެރިކާއިން ދަނީ ތުހުމަތު ކުރަމުންނެވެ. އޭގެ ތެރޭގައި އާޓިލަރީ ބަޑީގެ ޝެލްއާއި ރޮކެޓް އަދި މިސައިލް ހިމެނޭ ކަމުގައި އެމެރިކާއިން ބުނެއެވެ. ރަޝިޔާއިން ދަނީ އެ ހަތިޔާރުތައް، އެ ޤައުމުން ޔޫކްރެއިނަށް އަރައި ކުރަމުންދާ ހަނގުރާމައިގައި ބޭނުން ކުރަމުންނެވެ.