ސަޢޫދީ ޢަރަބިއްޔާއިން ފުރަތަމަ ފަހަރަށް ފަލަސްޠީނަށް ސަފީރަކު ޢައްޔަންކޮށްފިއެވެ. މިއީ، ޔަހޫދީ އިސްރާޢީލުގެ އަޅުވެތިކަމުން ސަލާމަތްވެ ފަލަސްޠީނުގެ މިނިވަން ދަޢުލަތެއް ގާއިމުކުރަން ކުރަމުންދާ ޖިހާދަށް ސަޢޫދީ ޢަރަބިއްޔާގެ ފުރިހަމަ ތާޢީދުއޮތް ކަން ހާމަކޮށްދޭ މިސާލެއް ނަމަވެސް، ފަލަސްޠީނަށް ސަޢޫދީގެ ސަފީރަކު ކަނޑައަޅާފައި މި ވަނީ ޔަހޫދީ އިސްރާޢީލާ އެކު ސަޢޫދީން ގުޅުން ބަދަހިކުރުމާ މެދު ވިސްނަމުންދާ ކަމުގެ އަޑުތައް ފެތުރެމުންދާ ދަނޑިވަޅެއްގައެވެ.
ފަލަސްޠީނުގެ މުސްލިމުން ޔަހޫދީންގެ އަޅުވެތިކަމުން ސަލާމަތް ކުރުމަށް ސަޢޫދީ ޢަރަބިއްޔާއިން މެދުކެނޑުމެއް ނެތި ވަނީ ވަކާލާތު ކޮށްފައެވެ. އަދި، އިސްރާޢީލާ އެކު ރަސްމީކޮށް ސިޔާސީ ގުޅުން ގާއިމުކުރަން ވެސް ވަނީ ދެކޮޅު ހަދާފައެވެ. ނަމަވެސް، ސަޢޫދީ ޢަރަބިއްޔާއާއި އިސްރާޢީލާ ދެމެދު ގުޅުން ގާއިމުކުރުވަން އެމެރިކާއިން އޮތީ ފައިވިއްދައިލާފައެވެ. އަދި، އެމެރިކާއިން ދަނީ ސަޢޫދީ ޢަރަބިއްޔާއަށް ބާރު އަޅަމުންނެވެ.
ސަޢޫދީ ޢަރަބިއްޔާއިން ފަލަސްޠީނަށް ކަނޑައަޅާފައިވާ ސަފީރުގެ މަޤާމަށް ޢައްޔަންކޮށްފައި ވަނީ ނާޔިފު އަލް-ސުދައިރީއެވެ. އޭނާގެ ސަފީރުކަމުގެ ފަތްކޮޅު ފަލަސްޠީނުގެ ރައީސް މަޙްމޫދު އައްބާސްގެ ޚާރިޖީ ދާއިރާގެ އިސް މުޝީރު މަޖުދު އަލް-ޚާލިދީގެ އަތްޕުޅަށް އަރުވާފައި ވަނީ އުރުދުނުގައި ބޭއްވި ޚާއްޞަ ރަސްމިއްޔާތެއްގައެވެ. އަލް-ސުދައިރީ ޢައްޔަން ކުރައްވާފައި ވަނީ ނަން-ރެޒިޑެންޓް ސަފީރެއްގެ ގޮތުގައެވެ.
އަލް-ޚާލިދީ ވިދާޅުވީ ސަޢޫދީ ސަފީރެއް ފަލަސްޠީނަށް ޢައްޔަން ކުރުމާ އެކު ދެ ޤައުމުގެ ދެމެދުގައި އޮތް އަޚުވަންތަ ގުޅުން އިތުރަށް ބަދަހި ކުރުމަށް މަގުފަހިވެގެން ގޮސްފައިވާ ކަމުގައެވެ. ނަމަވެސް، ޚާރިޖީ ދާއިރާ ދިރާސާކުރައްވާ ފަލަސްޠީނުގެ ބޭފުޅެއް ކަމުގައިވާ ޠަލާލް ޢޫކަލް ވިދާޅުވީ، މިއީ "ބައިކުޅަބައި" ފިޔަވަޅެއްގެ ގޮތުގައި ސިފަ ކުރެވޭ ކަމުގައެވެ. އަދި، އެންމެ ފުރިހަމަ ގޮތަކީ ޔަހޫދީން އަޅުވެތިކޮށްފައިވާ ހުޅަނގު އައްސޭރީގައި ސަޢޫދީ ޢަރަބިއްޔާގެ ޚާރިޖީ އޮފީހެއް ހުޅުވުން ކަމުގައެވެ.
ޔަހޫދީ އިސްރާޢީލާ ސިޔާސީ ގުޅުން ގާއިމުކުރުމާ މެދު ސަޢޫދީން ވިސްނަމުންދާ ކަމަށް ފެތުރޭ އަޑުތަކާ މެދު ފަލަސްޠީނުން ވަނީ ކަންބޮޑުވުން ފާޅުކޮށްފައެވެ. ފަލަސްޠީނުގެ ޚާރިޖީ ވަޒީރު ރިޔާޟް އަލް-މާލިކީ ވިދާޅުވީ މި ކަމާ ގުޅޭ ގޮތުން ސަޢޫދީ ޢަރަބިއްޔާއާ މަޝްވަރާ ކުރަން ރާވަމުންދާ ކަމުގައެވެ.
ނަމަވެސް، އިސްރާޢީލާއި ސަޢޫދީ ޢަރަބިއްޔާއާ ދެމެދު ސިޔާސީ ގުޅުން ގާއިމުކުރުމާ ގުޅޭ އެއްބަސްވުމެއް އެކުލަވައިލުމުގެ މަސައްކަތްތައް ފުރިހަމަވެފައި ނުވާ ކަމުގައި އެ ދެ ޤައުމުގެ އިތުރުން އެމެރިކާއިން ވެސް ބުނެއެވެ. އަދި، މަޝްވަރާ ކޮށްގެން ހައްލު ހޯދަން ޖެހޭ ގިނަ ކަންތައްތަކެއް ހުރި ކަމުގައި ސަޢޫދީން ދަނީ ބުނަމުންނެވެ. އެ ކަންކަމުގެ ތެރޭގައި ހުޅަނގު އައްސޭރީގައި ހަމަނުޖެހުން ހިންގުމަށް ނިމުމެއް ގެނައުން ހިމެނެއެވެ. އަދި، ކަރަންޓުގެ ޚިދުމަތް ފޯރުކޮށްދިނުމަށް ހުޅަނގު އައްސޭރީގައި ސަޢޫދީ ޢަރަބިއްޔާއިން ނިއުކްލިޔަރ ހަކަތަ އުފައްދާ ޕްލާންޓެއް ގާއިމުކުރުން ވެސް ހިމެނެއެވެ.
މީގައި ގިނައީ ފަލަސްޠީނުގެ މުސްލިމުންގެ ހައްޤުތައް ކަށަވަރު ކުރުމާ ގުޅޭ ކަންކަން ނަމަވެސް، ސަޢޫދީ ޢަރަބިއްޔާއިން އިސްރާޢީލާ އެކު ސިޔާސީ ގުޅުން ގާއިމު ކުރުމަކީ، ޢަރަބި ދުނިޔޭގައި ފަލަސްޠީނަށް އޮތް ތާޢީދު ކުޑަވެދާނެ ކަމެއްގެ ގޮތުގައި ފަލަސްޠީނުން ދެކެއެވެ. އަދި، އެ ފަދަ ގުޅުމެއްގެ ސަބަބުން ފަލަސްޠީނުގެ މިނިވަން ދަޢުލަތެއް ގާއިމުކުރުމަށް ކުރަމުންދާ މަސައްކަތްތަކަށް ހީނަރުކަން އަންނާނެ ކަމަށް ވެސް ފަލަސްޠީނުން ދެކެއެވެ.
އެމެރިކާއިން އަޑީގައި އޮވެ އެކުލަވައިލާފައިވާ އަބްރަހަމް އެއްބަސްވުމަށް ސަޢޫދީ ޢަރަބިއްޔާއިން ވެސް ވަނީ އާނބަސް ބުނެފައެވެ. އެއީ، ގަލްފުގެ ޤައުމުތައް ކަމުގައިވާ އެކުވެރި ޢަރަބި ޢިމާރާތް (ޔޫ.އޭ.އީ)އާއި ބަޙްރައިނާއި އިސްރާޢީލާ ދެމެދު ސިޔާސީ ގުޅުން ގާއިމުކޮށް، ގުޅުންތައް ބަދަހިކުރުމުގެ ނިޔަތުގައި އެކުލަވައިލާފައިވާ އެއްބަސްވުމެކެވެ.