މިހާރު ކުރިއަށްދާ ލީގްސް ކަޕުގެ ކުއާޓާ ފައިނަލުގައި ޝާލޮޓް އެފްސީ ބަލިކޮށް، މުބާރާތުގެ ސެމީ ފައިނަލުން އިންޓަރ މަޔާމީ ޖާގަ ހޯދައިފިއެވެ.
މަޔާމީގެ ދަނޑުގައި މިއަދު ކުޅުނު މެޗު އެ ޓީމުން ކާމިޔާބުކޮށްފައިވަނީ ފަސޭހަކަމާއެކު 4-0 ގެ ނަތީޖާއަކުންނެވެ.
މި މެޗުގައި މަޔާމީން މޮޅު ކުޅުމެއް ދެއްކިއިރު، މެޗު ފަށައިގެން 12 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޖޯސެފް މާޓިނޭޒެވެ. އަދި ފުރަތަމަ ހާފު ނިމުމުގެ ކުރިން މެޗުގެ 32 ވަނަ މިނެޓުގައި ރޮބާޓް ޓޭލާ ވަނީ ލަނޑެއް ޖަހައި، މަޔާމީގެ ލީޑު ފުޅާކޮށްދީފައެވެ.
މި މެޗުގައި މަޔާމީން ކާމިޔާބުކުރި ތިންވަނަ ލަނޑު ފެނިގެންދިޔައީ މެޗުގެ 78 ވަނަ މިނެޓުގައެވެ. މިއީ ޝާލޮޓުގެ ޑިފެންޑަރު އެޑިލްސަން މަލަންޑާ އަތުން ބައިކޮޅަށް ވަން ލަނޑެކެވެ. އަދި މެޗު ނިމެން ހަތަރު މިނެޓަށް ވެފައި ވަނިކޮށް މެސީ ވަނީ މަޔާމީގެ ހަތަރުވަނަ ލަނޑު ކާމިޔާބުކޮށްދީފައެވެ.
މިއީ މަޔާމީގެ ޖާޒީގައި މެސީ ކާމިޔާބުކުރި އަށްވަނަ ލަނޑެވެ. އަދި މެސީ ވަނީ މަޔާމީއަށް މިހާތަނަށް ކުޅެދިން ފަސް މެޗުގައިވެސް ލަނޑު ޖަހާފައެވެ.
މި މޮޅާއެކު މުބާރާތުގެ ސެމީއަށް މަޔާމީ ދަތުރުކުރިއިރު، ސެމީގައި އެ ޓީމު ބައްދަލުކުރަން ޖެހޭނީ ފިލަޑެލްފިއާ ޔޫނިއަންއާއެވެ. ސެމީ ފައިނަލުން ފިލަޑެލްފިއާ ޖާގަ ހޯދާފައިވަނީ ކުއާޓާ ފައިނަލް މެޗުގައި މެކްސިކޯގެ ކެރެޓާރޯ އަތުން 2-1 ގެ ނަތީޖާއަކުން މޮޅުވެގެންނެވެ.