ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ކުއާޓާ ފައިނަލުން ވަރުގަދަ ޖަޕާން ކަޓުވާލައި، މުބާރާތުގެ ސެމީ ފައިނަލުން ސްވިޑެން ޖާގަ ހޯދައިފިއެވެ.
ނިއު ޒީލަންޑުގެ އެޑެން ޕާކުގައި މިއަދު ކުޅުނު މެޗު ސްވިޑެންއިން ކާމިޔާބުކުރީ 2-1 ގެ ނަތީޖާއަކުންނެވެ.
މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ސްވިޑެންއިންނެވެ. މެޗުގެ 32 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އަމަންޑާ އިލެސްޓެޑެވެ.
އަދި ދެވަނަ ހާދު ފަށައިގެން ހަވަނަ މިނެޓުގައި ލިބުނު ޕެނަލްޓީއަކުން ސްވިޑެންއިން ވަނީ ލީޑު ފުޅާކޮށްފައެވެ. މި ޕެނަލްޓީ އެ ޓީމަށް ކާމިޔާބުކޮށްދިނީ ފިލީޕާ އެންޖެލްޑާލެވެ. މިއީ އޭރިއާ ތެރެއިން ޖަޕާނުގެ ފޫކާ ނަގާނޯގެ އަތުގައި ބޯޅަ ޖެހުމުން, ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ދިން ޕެނަލްޓީއެކެވެ.
އެކަމަކު އޭގެ ފަހުން ޖަޕާނުން ކުޅުން ރަނގަޅުކުރިއިރު، މެޗުގެ 76 ވަނަ މިނެޓުގައި އެ ޓީމަށް ވަނީ ޕެނަލްޓީއެއް ލިބިފައެވެ. އެކަމަކު އެ ޓީމުގެ ރީކޯ އުއޭކީ ފޮނުވާލި ޕެނަލްޓީ އަމާޒުވީ ގޯލުގެ ހުރަސް ދަނޑިއަށެވެ. ނަމަވެސް މެޗު ނިމެން ތިން މިނެޓަށް ވެފައި ވަނިކޮށް ހޮނޯކާ ހަޔާޝީ ވަނީ ލަނޑެއް ޖަހައި، ޖަޕާނަށް ފަރަގު ކުޑަކޮށްދީފައެވެ.
2011 ވަނަ އަހަރުގެ ވިމެންސް ވޯލްޑް ކަޕުގެ ޗެމްޕިއަން ޖަޕާން އަތުން މޮޅުވެ މި ފަހަރުގެ މުބާރާތުގެ ސެމީއަށް ސްވިޑެން ދަތުރުކުރިއިރު، އެ ޓީމުން ވަނީ ގަދަ 16 ބުރުގައި މިދިޔަ ދެ ފަހަރުގެ ޗެމްޕިއަން، އެމެރިކާ އަތުންވެސް މޮޅުވެފައެވެ.