ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ކުއާޓާ ފައިނަލުގައި ނެދަލަންޑްސް ބަލިކޮށް، މުބާރާތުގެ ސެމީ ފައިނަލުގެ ޖާގައެއް ސްޕެއިނުން ހޯދައިފިއެވެ.
ނިއު ޒީލަންޑުގެ ވެލިންޓަން ރީޖަނަލް ސްޓޭޑިއަމުގައި މިއަދު ކުޅުނު މެޗު ސްޕެއިނުން ކާމިޔާބުކުރީ އިތުރު ވަގުތުގެ ދެ ހާފު ކުޅެ 2-1 ގެ ނަތީޖާއަކުންނެވެ.
މި މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ.
މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ސްޕެއިނުންނެވެ. މެޗުގެ 81 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ މަރިއޯނާ ކަލްޑެންޓޭއެވެ. މިއީ ޕެނަލްޓީ އޭރިއާ ތެރެއިން ނެދަލަންޑްސްގެ ސްޓެފަނީ ވެން ޑާ ގްރާޓުގެ އަތުގައި ބޯޅަ ޖެހުމުން ދިން ޕެނަލްޓީއެކެވެ.
އެކަމަކު މެޗުގެ އިތުރު ވަގުތުގެ ތިންވަނަ މިނެޓުގައި ނެދަލަންޑްސްއިން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ވެން ޑާ ގްރާޓެވެ.
އެއާއެކު މި މެޗުގައި އިތުރު ވަގުތުގެ ދެ ހާފު ކުޅުނުއިރު، މި މެޗުން ސްޕެއިން މޮޅުވި ލަނޑު ފެނިގެންދިޔައީ ދެވަނަ ހާފުގެ ހަވަނަ މިނެޓުގައެވެ. އުފެއްދި ކައުންޓަރ އެޓޭކެއްގައި މި ލަނޑު އެ ޓީމަށް ކާމިޔާބުކޮށްދިނީ އުމުރުން 19 އަހަރުގެ ސަލްމާ ޕަރަލުއޭލޯއެވެ.
މި މޮޅާއެކު މުބާރާތުގެ ސެމީއަށް ސްޕެއިން ދަތުރުކުރިއިރު، މިއީ ވިމެންސް ވޯލްޑް ކަޕެއްގެ ސެމީން ސްޕެއިން ޖާގަ ހޯދި ފުރަތަމަ ފަހަރެވެ. އަދި މިއީ ވޭތުވެދިޔަ 26 އަހަރު ތެރޭ ބޮޑު މުބާރާތެއްގެ ސެމީގައި ސްޕެއިން ކުޅޭނެ ފުރަތަމަ ފަހަރެވެ.