ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ބޭއްވި ދެވަނަ ޓީ20 ޕްރެޒިޑެންޓް ކަޕުގެ ޗެމްޕިއަންކަން މިލާން ކްރިކެޓް އެކެޑަމީން ހޯދައިފިއެވެ.
ޓީ20 ޕްރިމިއާ ލީގުގެ ގަދަ ހަތަރު ޓީމާއެކު ކުރިއަށްދިޔަ ޕްރެޒިޑެންޓްސް ކަޕުގެ ޗެމްޕިއަންކަން މިލާނުން ހޯދީ މިއަދު ކުޅުނު ފައިނަލް މެޗުގައި މާލޭ ވެޓެރަންސް އަތުން އަށް ވިކެޓުން މޮޅުވެގެންނެވެ.
މި މެޗުގެ ގުރުދިމާވުމުން މިލާން ގަސްދުކުރީ ހޮވުމަށެވެ. އެއާއެކު މާލޭ ވެޓެރަންސް އެންމެ ފުރަތަމަ ކުޅެން އަރައި 20 އޯވަރު ހަމަވިއިރު ހަ ކުޅުންތެރިން ނުބައިވެގެން ހެދުނީ 122 ލަނޑެވެ. އެ ޓީމުން އެންމެ ރަނގަޅަށް ކުޅުނީ 40 ބޯޅައިން 43 ލަނޑު ހެދި ޗަންދަނާ އާއި 26 ބޯޅައިން 24 ލަނޑު އެއްކުރި ޕިޔާލެވެ. މި އިންނިންގްސްގައި މިލާނުގެ އަޙްމަދު އަމީލް ވަނީ ދެ ވިކެޓް ނަގާފައެވެ.
ޖަވާބުގައި މިލާން ކުޅެން އަރައި ވަނީ 18 ވަނަ އޯވަރުގައި ދެ ކުޅުންތެރިން ނުބައިވެގެން 125 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނު ނުބައިނުވެ 48 ބޯޅައިން 58 ލަނޑު ހެދި ޔޫސުފް އަޒިޔާން އާއި 27 ބޯޅައިން 39 ލަނޑު އެއްކުރި ވިރަންދީޕް ސިންގެވެ.
މި މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ އަޒިޔާނެވެ. ފައިނަލް މެޗަށްފަހު އިނާމުދެއްވީ ސީބީއެމްގެ ރައީސް މުޙައްމަދު ފައިސަލާއި ކުރީގެ ކްރިކެޓް ކުޅުންތެރިޔާ ހަސަން ހަބީބެވެ.
މި ފަހަރުގެ ޓީ20 ޕްރެޒިޑެންޓް ކަޕުގެ ޗެމްޕިއަންކަން މިލާނުން ހޯދިއިރު، އެ ޓީމުން ވަނީ ކުޅުނު ހުރިހާ މެޗަކުން މޮޅުވެ ޓީ20 ޕްރިމިއާ ލީގުގެ ޗެމްޕިއަންކަންވެސް ހޯދާފައެވެ.