38 އަހަރުގެ ދިގު މުއްދަތެއްގައި ވެރިކަން ކުރެއްވުމަށް ފަހު ކެމްބޯޑިޔާގެ ބޮޑުވަޒީރު ކަމުގެ މަޤާމުން އިސްތިޢުފާ ދެއްވާފައިވާ ހުން ސެއިން، އޭނާގެ ދޮށީ ދަރިކަލުން ހުން މަނައެތާ ވެރިކަން ހަވާލު ކުރައްވައި، މަނައެތުގެ ސަރުކާރު އިޢުލާނު ކުރައްވައިފިއެވެ. ހުން ސެއިންއަކީ ދުނިޔޭގެ އެންމެ ގިނަ ދުވަހު ވެރިކަން ކުރައްވާފައިވާ އެއް ވެރިޔާއެވެ.
38 އަހަރު ބޮޑުވަޒީރު ކަމުގެ މަޤާމު ފުރުއްވުމަށް ފަހު އެ މަޤާމުން އިސްތިޢުފާ ދެއްވަން ނިންމަވާފައިވާ ކަން ހުން ސެއިން އިޢުލާނު ކުރައްވާފައި ވަނީ، ހުސްވި ޖުލައި މަހު އެ ޤައުމުގައި ބޭއްވި ޢާންމު އިންތިޚާބު އޭނާގެ ޕާޓީން ކާމިޔާބު ކުރުމުންނެވެ. އޭނާއަށް ފަހު ބޮޑުވަޒީރު ކަމުގެ މަސްއޫލިއްޔަތުތައް އޭނާގެ ދޮށީ ދަރިކަލުން ހުން މަނައެތާ ހަވާލު ކުރައްވާނެ ކަން ވެސް ހުން ސެއިން އިޢުލާނު ކުރެއްވިއެވެ.
ހުން މަނައެތުގެ އައު ސަރުކާރު އިޢުލާނު ކޮށްފައިވާއިރު، އެ ސަރުކާރުގެ އިސް މަޤާމުތަކުގައި ހުން ސެއިންގެ ޢާއިލާގެ އެހެން ބޭފުޅުން ހިމަނުއްވާފައިވެއެވެ. އޭގެ ތެރޭގައި އޭނާގެ އެންމެ ހަގު ދަރިކަލުންނާއި އޭނާގެ އެއްބަނޑު އެއްބަފާ އެހެން ބެއިންގެ ދަރިން ވެސް ހިމެނެއެވެ.
ޖުލައި މަހު ބޭއްވި ޢާންމު އިންތިޚާބުގައި ހުން ސެއިންގެ ކެމްބޯޑިޔަން ޕީޕަލްސް ޕާޓީ (ސީ.ޕީ.ޕީ)ން ވަނީ ބޮޑު އަޣުލަބިއްޔަތެއް ހޯދާފައެވެ. ޤާނޫނު ހަދާ މަޖިލީހުގެ ތިރިގޭގެ 125 ގޮނޑީގެ ތެރެއިން ސީ.ޕީ.ޕީން ވަނީ 120 ގޮނޑި ކާމިޔާބު ކޮށްފައެވެ. އެއީ އިންސާފުވެރި އިންތިޚާބެއް ނޫން ކަމުގައި ސަރުކާރާ ދެކޮޅު ފަރާތްތަކުން ދަނީ ތުހުމަތު ކުރަމުންނެވެ.
ހަތަރު ތަރި ހޯއްދަވާފައިވާ އަސްކަރީ އިސް ޖެނެރަލެއް ކަމުގައިވާ ހުން މަނައެތާ ބޮޑުވަޒީރު ކަމުގެ މަޤާމު ހަވާލު ކުރުމަށް އެ ޤައުމުގެ ރަސްގެފާނު ވަނީ ރުހުން ދެއްވާފައެވެ. ހުން މަނައެތުގެ ކެބިނެޓަށް 30 ބޭފުޅަކު ޢައްޔަންކޮށްފައިވެއެވެ. އޭގެ ތެރެއިން ހުން ސެއިންގެ އެންމެ ހަގު ދަރިކަލުން ހުން މަނީ ޢައްޔަން ކުރައްވާފައި ވަނީ ސިވިލް ސަރވިސްގެ ވަޒީރު ކަމުގެ މަޤާމެވެ.
މީގެ އިތުރުން ދިފާޢީ ވަޒީރާއި ދާޚިލީ ވަޒީރު ކަމުގެ މަޤާމަށް ޢައްޔަން ކުރައްވާފައި ވަނީ އެ މަޤާމުތަކުގައި ތިއްބެވި ބޭފުޅުންގެ ދަރިކަލުންނެވެ. ބޮޑުވަޒީރުގެ ނައިބުގެ މަޤާމަށް ޢައްޔަން ކުރައްވާފައި ވަނީ ޤައުމީ ފުލުހުންގެ އިދާރާގެ އިސްވެރިޔާގެ މަޤާމު ކުރިން ފުރުއްވި ނެތް ސަވޫންއެވެ. އޭނާއަކީ ހުން ސެއިނަށް ބޮޑުބޭބެ ވިދާޅުވާ ބޭފުޅެކެވެ.
ކެމްބޯޑިޔާގައި ޖުލައި މަހު ބޭއްވި ޢާންމު އިންތިޚާބުގެ މިނިވަންކަމާ މެދު ބައިނަލްއަޤުވާމީ މުޖުތަމަޢުން ވެސް ވަނީ ސުވާލު އުފައްދާފައެވެ. އަދި، ޝަރުޢީ ނިޒާމު ބޭނުންކޮށްގެން އެ ޤައުމުގެ އިދިކޮޅު ފަރާތްތައް ނެތިކޮށްލަން ހުން ސެއިން މަސައްކަތް ކުރައްވަމުންދާ ކަމުގައި އިންސާނީ ހައްޤުތަކަށް ވަކާލާތުކުރާ ޖަމުޢިއްޔާތަކުން ވެސް ދަނީ ތުހުމަތު ކުރަމުންނެވެ.
ސަރިޔަތްކޮށް ސަރުކާރާ ދެކޮޅު ފަރާތްތައް ޖަލަށް ލާފައިވާ ކަމުގައި ވެސް އެ ޖަމުޢިއްޔާތަކުން ތުހުމަތު ކުރެއެވެ. ނަމަވެސް، 1985 ވަނަ އަހަރުން ފެށިގެން ކެމްބޯޑިޔާގައި ވެރިކަން ކުރައްވަމުން ގެންދަވާ ހުން ސެއިން ވަނީ މި ތުހުމަތުތައް ދޮގު ކުރައްވާފައެވެ.
ބޮޑުވަޒީރު ކަމުގެ މަޤާމުން އިސްތިޢުފާ ދެއްވާފައިވީ ނަމަވެސް، އެ ޤައުމުގެ ސެނެޓުގެ ރައީސްގެ މަޤާމާ އަންނަ އަހަރު ހުން ސެއިން ހަވާލުވެ ވަޑައިގަންނަވާނެއެވެ. އެއާއެކު، ރަސްގެފާނު ޤައުމުން ބޭރަށް ވަޑައިގަންނަވާ ވަގުތުތަކުގައި އޭނާއަށް ދަޢުލަތުގެ އެންމެ މަތީ ވެރިޔާގެ މަޤާމުގެ މަސްއޫލިއްޔަތުތައް ފުރިހަމަ ކުރައްވަން ޖެހިވަޑައިގަންނަވާނެއެވެ. 2033 ވަނަ އަހަރާ ޖެހެންދެން ސިޔާސީ މައިދާނުގައި ހަރަކާތްތެރިވެ ވަޑައިގަންނަވާނެ ކަމުގައި ވެސް ހުން ސެއިން ވަނީ ވިދާޅުވެފައެވެ.