އައިބީސީ ވޯލްޑް ޓުއާގެ ވިޒިޓް މޯލްޑިވްސް ޕްރޯގެ ތެރެއިން ޑްރޮޕް-ނީ ބައިގެ ދުނިޔޭގެ ޗެމްޕިއަންކަން ހަވާއީގެ ޑޭވިޑް ހަބާޑް ހޯދާ، އެ ޓްރޮފީ އޭނާއަށް ރާއްޖޭގައި ހަވާލުކުރި އިރު، މުބާރާތުގެ އެންމެ ފޯރިގަދަ ބައިކަމަށްވާ ފިރިހެން ޑިވިޝަންގެ ޗެމްޕިއަންކަން ހޯދީ ފްރާންސްގެ ޕިއޭ ލުއިސް ކޮސްޓޭސް (ޕީއެލްސީ) ހޯދައިފިއެވެ.
ޑްރޮޕް-ނީ ގެ ދުނިޔޭގެ ޗެމްޕިއަންކަން ހަބާޑް ހޯދި މާލޭގައި ނިމުނު ވިޒިޓް މޯލްޑިވްސް ޕްރޯގެ ޑްރޮޕް-ނީ ޑިވިޝަން ކާމިޔާބު ކޮށްގެންނެވެ. މިއީ ދުނިޔޭގެ ފެންވަރުގެ ޓްރޮފީއެއް އައިބީސީ ރޭންކިންގެ ކުޅުންތެރިއަކު ރާއްޖޭގައި އުފުލާލި ފުރަތަމަ ފަހަރެވެ.
މި މުބާރާތުގެ ނިންމުމުގެ ރަސްމިއްޔާތުގައި ހަބާޑް އަށް "ވޯލްޑް ޓައިޓްލް" ހަވާލުކޮށްދެއްވީ މުބާރާތުގެ ޝަރަފްވެރި މެހުމާން ރައީސުލްޖުމްހޫރިއްޔާގެ އަނބިކަނބަލުން، ފަޒްނާ އަހުމަދެވެ.
ވިޒިޓް މޯލްޑިވްސް ޕްރޯގެ ޑްރޮޕް ނީ ބައިގެ ޗެމްޕިއަންކަން ހަބާޑް ހޯދީ ފައިނަލުގައި ހަވާއީގެ ސެމީ މޮރެޓީނޯ ބަލިކޮށްގެންނެވެ. ފައިނަލް ހީޓު ޑޭވިޑް ކާމިޔާބުކުރީ 16.00ގެ ސްކޯ އަކުންނެވެ. ސެމީ އަށް ލިބުނީ 13.70ގެ ސްކޯ އެކެވެ.
ފިރިހެން ޑިވިޝަންގެ ޗެމްޕިއަންކަން ހޯދީ ފްރާންސްގެ ޕިއޭ ލުއިސް ކޮސްޓޭސް (ޕީއެލްސީ) ހޯދީ ފައިނަލުގައި ހަވާއީގެ ޓޭނާ މެކްޑެނިއެލްއާ ވާދަކޮށް ކުރި ހޯދައިގެންނެވެ. ފައިނަލުގައި ޕީއެލްސީ 13.60 ގެ ސްކޯއެއް ހޯދިއިރު، ދުނިޔޭގެ ރޭންކިންގެ ކުރީގައި އުޅޭ ޓެނާ އަށް ލިބުނީ 11.65 އެވެ.
އަންހެން ބައިގެ ޗެމްޕިއަންކަން ކެނެރީ އައިލެންޑްސްގެ ޓެރީސާ މިރާންޑާ ހޯދީ ފައިނަލުގައި ޖަޕާންގެ ސަރީ އޮހާރާ ބަލިކޮށްގެންނެވެ. އަންހެން ޑިވިޝަންގެ ޗެމްޕިއަންކަން ޓެރީސާ ހޯދީ ފައިނަލް ހީޓު 0.25ގެ ތަފާތަކުން ކާމިޔާބުކޮށްގެންނެވެ.
ޖޫނިއާ ބައިގެ ޗެމްޕިއަންކަން ސްޕެއިންގެ ހޯރްހޭ ހޯދީ ފައިނަލުގައި ބްރެޒިލްގެ ގުއިލާމޭ މޮންޓެނީގްރޯ ބަލިކޮށްގެންނެވެ. ފައިނަލުގައި ހޯރްހޭއަށް 13.75ގެ ސްކޯއެއް ހޯދިއިރު، ބްރެޒިލްގެ ގުއިލާމޭ އަށް ލިބުނީ 11.50 އެވެ.