ސިމްޑީ ގްރޫޕްގެ "ބިއޯންޑް" އެއަރލައިންގެ ޓެސްޓު ފްލައިޓް މިމަހުގެ 14 ގައި
-
މި އެއަރލައިންގެ ފުރަތަމަ އެއަރކްރާފްޓް މިއަދު ވަނީ ރާއްޖެ ގެނެސްފައި
-
ބިއޯންޑް އެއަރލައިންގެ ޓެސްޓު ފްލައިޓް މިމަހުގެ 14 ވަނަ ދުވަހު ބާއްވާނެ
-
ދުނިޔޭގެ 60 މަންޒިލަކަށް އުދުހުމަށް އަމާޒު ހިފާފައިވާ
ސިމްޑީ ގްރޫޕާއި ޔޫއޭއީގެ އަރަބެސްކް ގުޅިގެން ތަޢާރަފްކުރި ބިއޯންޑް އެއަރލައިންގެ ޓެސްޓު ފްލައިޓް މިމަހުގެ 14 ވަނަ ދުވަހު ބާއްވާނެކަމަށް އެ ކުންފުނިން ބުނެފިއެވެ.
މި އެއަރލައިންގެ ފުރަތަމަ އެއަރކްރާފްޓް މިއަދު ވަނީ ރާއްޖެ ގެނެސްފައެވެ. އެއީ އެއަރބަސް އޭ-319 މަރުކާގެ ބޯޓެކެވެ. މިބޯޓު ރާއްޖެ އައިސްފައިވަނީ ޔޫއޭއީގެ ދުބާއީއިންނެވެ.
ސިމްޑީން ބުނީ ބިއޯންޑް އެއަރލައިންގެ ޓެސްޓު ފްލައިޓް މިމަހުގެ 14 ވަނަ ދުވަހު ބާއްވާނެކަމަށެވެ. މިދަތުރު އޮންނާނީ މާލެއިން އައްޑޫއަށެވެ.
މިއަހަރުގެ ފަހުކޮޅު މިއެއަރލައިންގެ ދަތުރުތައް ފެށުމަށް ދަނީ ތައްޔާރުވަމުންނެވެ. އެގޮތުން ވަޒީފާތަކަށްވެސް މިހާރު ވަނީ މީހުން ނަގާފައެވެ.
ސިމްޑީ ގްރޫޕުން ބުނެފައިވަނީ ދިވެހި ރާއްޖެއިން ދުނިޔޭގެ ފުރަތަމަ "އޯލް ޕްރިމިއަމް" ނުވަތަ މަތީ ފެންވަރުގެ ދަތުރުތަކަށް ޚާއްސަ އެއަރލައިނެއް ތަޢާރަފް ކުރާއިރު ދުނިޔޭގެ 60 މަންޒިލަކަށް އުދުހުމަށް އަމާޒު ހިފާފައިވާ ކަމަށެވެ. ބިއޯންޑުން ދަތުރުތައް ފެށުމަށް ނިންމާފައިވާ މަންޒިލްތަކުގެތެރޭގައި، ޕެރިސް، ވިއެނާ، މިލާން، ދުބާއީ، ހޮންގް ކޮންގް، ޓައިޕޭ އަދި ސިންގަޕޫރު ހިމެނެއެވެ.
ޔޫއޭއީގެ އިންވެސްޓްމެންޓް ފާމެއް ކަމަށްވާ އަރަބެސްކް އާއި ގުޅިގެން މި އެއަރލައިން އުފައްދާފައިވާއިރު އެކުންފުންޏަކީ ލުފްތަންސާ އަދި ޤަތަރު ފަދަ އެއަރލައިންތަކުގައި އޭވިއޭޝަން އިންޑަސްޓްރީގެ އިސް މަޤާމުތަކުގައި މަސައްކަތް ކޮށްފައިވާ ގިނަ ބޭފުޅުން ގުޅިގެން އުފައްދާފައިވާ ކުންފުންޏެއް ކަމަށް ސިމްޑީން ބުނެއެވެ.