ޔޫކްރެއިންގެ ރައީސް ވޮލޮޑޮމީރް ޒެލެންސްކީ އަވަހާރަކޮށްލަން ރޭވި ރޭވުމެއްގައި ބައިވެރިވި ޔޫކްރެއިންގެ އަންހެނަކު ހައްޔަރުކޮށްފައިވާ ކަމުގައި އެ ޤައުމުގެ ސަލާމަތީ ޚިދުމަތްތައް (އެސް.ބީ.ޔޫ)ން ހާމަކޮށްފިއެވެ. އެ އިދާރާއިން ބުނީ އަންހެން މީހާ ހައްޔަރުކޮށްފައި ވަނީ ޒެލެންސްކީގެ ދަތުރުފުޅަކާ ގުޅޭ ސިއްރު މަޢުލޫމާތުތަކެއް ރަޝިޔާގެ ޖާސޫސުންނަން ފޯރުކޮށްދޭން މަސައްކަތް ކުރުމުގެ ތެރޭގައި ކަމުގައެވެ.
ޒެލެންސްކީ އަވަހާރަކޮށްލަން ރާވާފައި ވަނީ ރަޝިޔާއިން ކަމަށާއި، އެ އަންހެން މީހާ ހައްރުކޮށްފައި ވަނީ ޖޫން މަހުގެ ތެރޭގައި ޔޫކްރެއިންގެ ދެކުނުގައިވާ މިކޮލައިފަށް ޒެލެންސްކީ ކުރެއްވި ދަތުރުފުޅެއްގެ މަޢުލޫމާތު ރަޝިޔާގެ ޖާސޫސުންނާ ހިއްސާ ކުރަން މަސައްކަތް ކުރުމުގެ ތެރޭގައި ކަމަށް ވެސް އެ ޚިދުމަތްތަކުން ބުނެއެވެ. މި ކަމާ ގުޅިގެން ހައްޔަރުކޮށްފައިވާ މީހާގެ އިތުރު މަޢުލޫމާތު އެސް.ބީ.ޔޫން ހާމަކޮށްފައެއް ނުވެއެވެ.
ޒެލެންސްކީ މިކޮލައިފަށް ދަތުރުފުޅެއް ކުރައްވާފައި ވަނީ ފެންބޮޑުވެފައިވާ ސަރަޙައްދުތަކަށް ޒިޔާރަތް ކުރައްވާށެވެ. އެ ސަރަޙައްދުގައި ފެންބޮޑުވެފައި ވަނީ ކަޚޮވްކާގައި އޮންނަ ޑޭމެއްގައި ބާރު އެއްޗެއް ގޮއްވައިލައިގެން ދިން ހަމަލާގެ ސަބަބުންނެވެ. މި ހާދިސާއާ ގުޅޭ ގޮތުން ޒެލެންސްކީ ވިދާޅުވީ، އޭނާ އަވަހާރަކޮށްލަން ރޭވި ރޭވުމުގައި ބައިވެރިވެފައިވާ އަންހެން މީހާގެ މަޢުލޫމާތު އެސް.ބީ.ޔޫން އޭނާއާ ހިއްސާކުރި ކަމުގައެވެ.
މީގެ ކުރިން ވެސް، ޔޫކްރެއިންގެ ސިއްރު މަޢުލޫމާތު ރަޝިޔާގެ ޖާސޫސުންނާ ހިއްސާކުރަން މަސައްކަތް ކުރުމުގެ ކުށުގައި އިތުރު ބަޔަކު ހައްޔަރުކޮށްފައިވެއެވެ. މި ފަހަރު ހައްޔަރުކޮށްފައިވާ އަންހެން މީހާއާ ގުޅިގެން ރަޝިޔާއިން ވަކި އެއްޗެއް ހާމަކޮށްފައެއް ނުވެއެވެ. އަންހެން މީހާ ހައްޔަރު ކުރުމުގެ ކުރިން ޒެލެންސްކީގެ ސަލާމަތީ ކަންކަން އިތުރަށް ހަރުދަނާ ކޮށްފައިވާ ކަމުގައި ވެސް އެސް.ބީ.ޔޫން ބުނެއެވެ.
އެ އިދާރާއިން ބުނީ އެ އަންހެން މީހާ ރަޝިޔާއަށް ފޯރުކޮށްދޭން މަސައްކަތް ކޮށްފައި ވަނީ ޒެލެންސްކީ މިކޮލައިފަށް ކުރެއްވި ދަތުރުފުޅުގައި އޭނާ ވަޑައިގަންނަވަން ހަމަޖެހިފައިވާ ތަންތަނާއި ވަގުތުތައް ހިމެނޭ އައިޓިނަރީގެ މަޢުލޫމާތު ކަމުގައެވެ. އަދި، އޭނާ އަވަހާރަކޮށްލަން ބޭނުން ނަމަ ހަމަލަދެވޭނެ ތަންތަނުގެ މަޢުލޫމާތު ކަމުގައެވެ.
އެ އަންހެން މީހަކީ އޮޗާކިވް ކިޔާ ކުޑަ ރަށެއްގައި ހުންނަ އަސްކަރީ މަރުކަޒެއްގެ ފިހާރައެއްގައި މަސައްކަތް ކުރާ މީހެއް ކަމުގައި ވެސް އެސް.ބީ.ޔޫން ބުންޏެވެ. އެ ސަރަޙައްދުގައިވާ އަސްކަރީ މަރުކަޒުތަކުގެ ފޮޓޯ ފަދަ ތަކެތި ވެސް އޭނާ ރަޝިޔާގެ ޖާސޫސުންނާ ހިއްސާކުރަން މަސައްކަތް ކޮށްފައިވާ ކަމުގައި އެ އިދާރާއިން ބުނެއެވެ. އޭނާގެ މައްޗަށް ޖާސޫސީ މަޢުލޫމާތު ބޭރު ޤައުމަކާ ހިއްސާކުރަން މަސައްކަތް ކުރުމުގެ ކުށުގެ ދަޢުވާ އުފުލާނެ ކަމަށް ބެލެވެއެވެ. އެ ކުށުގެ އަދަބަކީ 12 އަހަރު ދުވަހުގެ މުއްދަތަކަށް ޖަލަށްލުމެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައިގައި ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.