ލާ އިންސާނީ އަނިޔާ އާއި ގުޅޭ 68 މައްސަލައެއް ވޭތުވެދިޔަ އަހަރު ހިއުމަންރައިޓްސް ކޮމިޝަނަށް ހުށަހަޅާފައިވާކަމަށް އެކޮމިޝަނުން ވިދާޅުވެއްޖެއެވެ. ހިއުމަން ރައިޓްސް ކޮމިޝަނަށް ވޭތުވެދިޔަ އަހަރު ޖުމްލަ 592 މައްސަލައެއް ވަނީ ހުށަހަޅާފައެވެ.
ހިއުމަންރައިޓްސް ކޮމިޝަނަށް ވޭތުވެދިޔަ އަހަރު ޖުމްލަ 592 މައްސަލަ ހުށަހަޅާފައިވާއިރު، މީގެތެރޭގައި ހިމެނެނީ އެންޓި ޓޯޗަރ ނުވަތަ ލާއިންސާނީ އަނިޔާ އާއި ގުޅޭ 68 މައްސަލައެކެވެ. މީގެތެރެއިން 48 މައްސަލައެއް ނިންމާފައިވާއިރު، 3 މައްސަލައެއްގައި ދަޢުވާކުރުމަށް ޕްރޮސިކިއުޓަރ ޖެނެރަލް އޮފީހަށް ފޮނުވާފައިވާކަމަށް އެކޮމިޝަނުން ވިދާޅުވެއެވެ.
ހިއުމަން ރައިޓްސް ކޮމިޝަނަށް ލިބިފައިވާ ރިޕޯޓްތަކާއި ގުޅިގެން ވޭތުވެދިޔަ އަހަރުތެރޭގައި އެކި ދާއިރާތަކުން ހުށަހަޅާފައިވާ މައްސަލަތަކާ ގުޅިގެން 64 ޒިޔާރަތް ކޮށްފައިވާއިރު، ލާއިންސާނީ އަދި ދަށުދަރަޖައިގެ އަނިޔާއާ ގުޅުން ހުރި 17 މައްސަލައަކާއި ގުޅިގެން ތަހުޤީޤު މަރުޙަލާގައި އެކިތަންތަނަށް ވަނީ ޒިޔާރަތްކޮށްފައެވެ. މި މައްސަލަތަކުގައި ޖަލުތަކާއި، ޑިޓެންޝަން ސެންޓަރުތައް، އަދި ބައެއް ހޮސްޕިޓަލްތަކަށްވެސް ތަހުޤީޤުގައި ޒިޔާރަތްކޮށްފައިވެއެވެ.
ލާއިންސާނީ އަދަބާއި ގުޅޭގޮތުން ހުށަހަޅާފައިވާ މައްސަލަތަކުގެ ތެރޭގައި، ކުށެއްގެ ތުހުމަތުގައި ތަޙުޤީޤަށް ފުލުހުންގެ ބަންދަށް ގެންދެވޭ މީހުންނާއި އަދި ޖަލުތަކުގައި ޙުކުމް ތަންފީޛުކުރަމުންދާ ޤައިދީންނަށް އަނިޔާކުރާކަމަށް ބުނެ ހުށަހަޅާފައިވާ މައްސަލަތައް ހިމެނޭކަމަށް އެޗްއާރުސީއެމް އިން ވިދާޅުވެއެވެ. ހިއުމަންރައިޓްސް ކޮމިޝަންގެ މެމްބަރު އައިޝަތު އަފްރީން ވިދާޅުވީ އެކޮމިޝަންގެ ޒިޔާރަތުގައި އެތަންތަނަށް ހުށަހަޅާފައިވާ ހުށަހެޅުންތަކާއި އެއްގޮތަށް ޢަމަލުކުރަމުންދޭތޯ ބަލަމުންދާކަމަށެވެ.
ހިއުމަންރައިޓްސް ކޮމިޝަނުން ވިދާޅުވީ، މައްސަލަތައް ބެލުމުގެ ނިޒާމް އިތުރަށް ހަރުދަނާކުރުމަށް ކުރުމުގެ ގޮތުން ކޮށްފައިވާ މަސައްކަތްތަކުގެ ތެރެއިން އެންޓި ޓޯޗަރ ޤާނޫނުގައި ބަޔާންކުރާ މެޑިކަލް ރިޕޯޓް، 'އެންޓި ޓޯޗަރ މެޑިކޯ ލީގަލް ރިޕޯޓް' އެކުލަވާލައި، ޞިއްޙީ މަރުކަޒުތަކުން ލިބޭނެ އިންތިޒާމް ހަމަޖައްސާފައިވާކަމަށެވެ. އަދި ބަންދުކޮށްފައި ހުރި މަރުކަޒު ނޫން އެހެންތަނެއްގައި މަސައްކަތްކުރާ ޑޮކްޓަރަކަށް ދައްކައިދިނުމަށް އެދޭ ޙާލަތްތަކުގައި، ބޭސްފަރުވާއަށް ހިނގާ ޚަރަދު ދައުލަތުން ފޯރުކޮށްދޭން ޖެހޭ ޙާލަތްތަކުގައި، އެފަދަ އެހީތެރިކަން ފޯރުކޮށްދޭނެ ނިޒާމެއް އެކަށައެޅުމުގެ މަސައްކަތް ކުރިޔަށް ގެންދެވިފައިވާކަމަށްވެސް ހިއުމަންރައިޓްސް ކޮމިޝަނުން ވިދާޅުވެއެވެ.
އެކޮމިޝަނުން ވިދާޅުވީ މިފަދަ މައްސަލަތައް ބެލުމުގައި ދިމާވާ މައިގަނޑު ދަތިތަކަކީ، މައްސަލަތައް ސާބިތުކުރެވޭ މިންވަރަށް ހެއްކާއި ޤަރީނާ ނެތުމާއި، މައްސަލަތައް ބެލުމުގައި ކަމާބެހޭ ފަރާތްތަކުން ލިބެންޖެހޭ މަޢުލޫމާތު ލިބުމުގައި ދިމާވާ ދަތިތައް ކަމަށެވެ.