ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ކުއާޓާ ފައިނަލް ފަހު ޖާގަތައް ފްރާންސާއި ކޮލަމްބިއާއިން ހޯދައިފިއެވެ.
ކުއާޓާގެ ޖާގައެއް ފްރާންސުން ހޯދީ އިއްޔެ ކުޅުނު ގަދަ 16 ބުރުގެ މެޗުގައި މޮރޮކޯ އަތުން 4-0 ގެ ނަތީޖާއަކުން މޮޅުވެގެންނެވެ.
އޮސްޓްރޭލިއާގެ ހިންދްމާޝް ސްޓޭޑިއަމުގައި ކުޅުނު މެޗުގައި ފްރާންސުން ލީޑު ނަގާފައިވަނީ މެޗުގެ 15 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ކަޑިޑިއާޓޯ ޑިއާނީއެވެ. އަދި މެޗުގެ 20 ވަނަ މިނެޓުގައި ކެންޒާ ޑާލީ ފްރާންސުގެ ލީޑު ފުޅާކޮށްދިންއިރު، އޭގެ ތިން މިނެޓު ފަހުން އެ ޓީމުގެ ތިންވަނަ ލަނޑު ޖަހައިދިނީ ލެ ސޯމާއެވެ.
އަދި މި މެޗުގައި ފްރާންސްގެ ފަހު ލަނޑުވެސް ދެވަނަ ހާފުގައި ޖަހައިދިނީ މެޗުގައި މޮޅު ކުޅުމެއް ދެއްކި ލެ ސޯމާއެވެ. މިއީ މި ފަހަރުގެ މުބާރާތުގައި ލެ ސޯމާ ކާމިޔާބުކުރި ތިންވަނަ ލަނޑެވެ.
މީގެ އިތުރުން ކުއާޓާގެ ޖާގައެއް ކޮލަމްބިއާއިން ހޯދީ ވަރުގަދަ ބްރެޒިލް ކަޓުވާލުމަށްފަހު ގަދަ 16 ބުރުން ފުރުސަތު ހޯދި ޖެމެއިކާ އަތުން މޮޅުވެގެންނެވެ. އޮސްޓްރޭލިއާގެ މެލްބަން ރެކްޓޭންގިއުލަރ ސްޓޭޑިއަމުގައި އިއްޔެ ކުޅު7ނު މެޗު ކޮލަމްބިއާއިން ކާމިޔާބުކުރީ 1-0 ގެ ނަތީޖާއަކުންނެވެ.
މި މެޗުގައި ކޮލަމްބިއާއިން ކާމިޔާބުކުރި ހަމައެކަނި ލަނޑު ދެވަނަ ހާފު ފަށައިގެން ހަވަނަ މިނެޓުގައި ޖަހައިދިނީ ޓީމުގެ ކެޕްޓަން ކެޓަލީނާ އުސްމޭއެވެ. މިއީ މި ފަހަރުގެ މުބާރާތުގައި ޖެމެއިކާ ކޮޅަށް ވަން ހަމައެކަނި ލަނޑެވެ.
މި މޮޅާއެކު މުބާރާތުގެ ކުއާޓާއި ކޮލަމްބިއާ ޖާގައެއް ހޯދިއިރު، މިއީ ފީފާ ވިމެންސް ވޯލްޑް ކަޕެއްގެ ކުއާޓާ ފައިނަލަށް އެ ޓީމު ދަތުރުކުރި ފުރަތަމަ ފަހަރެވެ.