އެމްޑަބްލިއުއެސްސީ ދިވެހި ޕްރިމިއަރ ލީގުގައި ޔުނައިޓެޑް ވިކްޓަރީ (ޔޫވީ) ކޮޅަށް ޖެހި ލަނޑާއެކު، ރާއްޖޭގެ ލީގުގައި ލަނޑު ޖެހި އެންމެ ހަގު ކުޅުންތެރިޔާގެ ޝަރަފު އުމުރުން އެންމެ 14 އަހަރުގެ އީތަން އިބްރާހީމް ޒަކީ ހޯދައިފިއެވެ.
މީގެ ތިން ދުވަސް ކުރިން މި ރިކޯޑު އޮތީ އެ ޓީމަށް ކުޅެމުން އަންނަ ޔޫސުފް އަޔާން އާމިރު އަތުގައެވެ. ކުލަބު ފުޓްބޯޅައިގެ ރިކޯޑުތަކުގެ ތެރެއިން ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) މީގެ ކުރިން ހެދި މި ރިކޯޑު އަޔާން އައުކުރީ ލީގުގެ ފުރަތަމަ ބުރުގައި ވެލެންސިއާއިން ކުޅުނު ފަހު މެޗުގައި ކުލަބު ގްރީން ސްޓްރީޓްސް ކޮޅަށް ލަނޑު ޖަހައިގެންނެވެ. އެ ލަނޑު ޖެހިއިރު އަޔާންގެ އުމުރަކީ 15 އަހަރާއި ހަ މަސް އަދި 13 ދުވަހެވެ.
އޭގެ ފަހުން މިއަދު އީތަން އެ ރިކޯޑު މުގުރާލިއިރު، އޭނާގެ އުމުރަކީ 14 އަހަރާއި ނުވަ މަސް އަދި ދެ ދުވަހެވެ. ޔޫވީ މެޗުގައި އީތަންއަށް ލަނޑު ޖެހުމުގައި އެހީތެރިވީ އިލާން އިމްރާނެވެ. އިލާންގެ އުމުރަކީ 14 އަހަރާއި ހަ މަސް އަދި 22 ދުވަހެވެ. އެއާއެކު އިލާން ވެފައިވަނީ ލީގުގައި ލަނޑު ޖެހުމުގައި އެހީތެރިވި އެންމެ ހަނގު ކުޅުންތެރިޔާއަށެވެ. މި ދެ ކުޅުންތެރިންނަކީ ލީގުގެ ތާރީޚުގައިވެސް ކުޅޭ އެންމެ ހަގު ދެ ކުޅުންތެރިންނެވެ.
ރާއްޖޭގެ ލީގުގައި ލަނޑު ޖެހި އެންމެ ހަގު ކުޅުންތެރިޔާގެ ޝަރަފު އެންމެ ގިނަ ދުވަސްތަކެއް ވަންދެން އޮތީ ދަގަނޑޭގެ އަތުގައެވެ. ވެލެންސިއާގެ ޖާޒީގައި ދަގަނޑޭ އެ ރިކޯޑު ހެދީ އޭނާގެ އުމުރުން 16 އަހަރާއި ނުވަ މަސް އަދި ދެ ދުވަހުގައެވެ. އެހެންކަމުން ދަގަނޑޭގެ ރިކޯޑު އެހެން ކުޅުންތެރިއަަކަށް މުގުރާލެވުނީ 20 އަހަރު ފަހުންނެވެ.