ކުލަބު ފުޓްބޯޅައިގެ ރިކޯޑުތަކުގެ ތެރެއިން ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ހަދާފައިވާ ލީގުގައި ލަނޑު ޖެހި އެންމެ ޒުވާން ކުޅުންތެރިޔާގެ ރިކޯޑު، ކުލަބު ވެލެންސިއާގެ އުއްމީދީ ކުޅުންތެރިޔާ ޔޫސުފް އަޔާން އާމިރު މުގުރާލައިފިއެވެ.
އަޔާން މި ރިކޯޑު ހަދާފައިވަނީ އެމްޑަބްލިއުއެސްސީ ދިވެހި ޕްރިމިއާ ލީގުގައި ބަދަލު ކުޅުންތެރިއެއްގެ ގޮތުގައި ކުޅެން އަރާ މެޗުގެ 87 ވަނަ މިނެޓުގައި ކުލަބް ގްރީން ސްޓްރީޓްސް ކޮޅަށް ގޯލު ޖަހައިގެންނެވެ.
މި ރިކޯޑު އަޔާން ހެދީ 15 އަހަރުގައި ލަނޑު ޖަހައިގެންނެވެ. މި ރިކޯޑު މީގެކުރިން ދަގަނޑޭ އަތުގައި އޮތީ 16 އަހަރުގައި ލަނޑު ޖަހައިގެންނެވެ. އެފަހަރު ދަގަނޑޭ މި ރިކޯޑު ހަދާފައިވަނީ ވެސް ވެލެންސިއާގެ ޖާރޒީގައެވެ. މި ރިކޯޑު ދަގަނޑޭ އަތުގައި 20 އަަހަރުވަންދެން އޮތެވެ.
އަޔާން އަކީ ފުޓުބޯޅައިގެ އިތުރުން އެތްލެޓިކްސްގައި ވެސް ފާހަގަކޮށްލެވޭ މޮޅު އެތްލީޓެކެވެ. މީގެއިތުރުން އޭނާ ވަނީ މިދިޔަ އަހަރު ވެލެންސިއާ އިން 14 އަހަރުން ދަށުގެ ލީގު ޗެމްޕިއަންކަން ހޯދިއިރު އެ ޓީމުގެ ކެޕްޓަންކަން ކޮށްފައެވެ. އަދި 15 އަހަރުން ދަށުގެ އިންޓަ ސްކޫލް ފުޓްބޯޅަ މުބާރާތުގެ ޗެމްޕިއަންކަން ހޯދި އިސްކަންދަރު ސްކޫލުގެ ކެޕްޓަންކަން ވެސް ކޮށްފައިވެއެވެ.
އިސްމާއިލް އާސިފް (ކުޑަހީނާ)ގެ ކޯޗުކަމުގައި މި ފަހަރު ވެލެންސިއާ އިން ލީގުގައި ކުޅެމުން އަންނަނީ ޒުވާން ސްކޮޑަކާ އެކު އެވެ. އަދި މި ޓީމުގައި ގިނައިން ތިބީ ވެލެންސިއާގެ ޔޫތު ޓީމުގެ ކުޅުންތެރިންނެވެ. މީގެތެރޭގައި ފުޓުބޯޅައިގެ އެންމެ އުއްމީދީ ކުޅުންތެރިން ހިމެނެއެވެ.