ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 އިން މުބާރާތުގެ ޗެމްޕިއަންކަން ދެ ފަހަރު ހޯދާފައިވާ ޖަރުމަން ކެޓިއިރު، ދެވަނަ ބުރުގެ ފަހު ޖާގަ މޮރޮކޯއިން ހޯދައިފިއެވެ.
މި މުބާރާތުން ޖަރުމަން ކެޓީ މިއަދު ދެކުނު ކޮރެއާއާ ވާދަކޮށް 1-1 ގެ ނަތީޖާއަކުން އެއްވަރުވެ، މޮރޮކޯއިން ކުޅުނު މެޗުގައި 1-0 ގެ ނަތީޖާއަކުން ކޮލަމްބިއާ ބަލިކުރުމުންނެވެ.
އެހެންކަމުން ގްރޫޕް އެޗްއިން ދެވަނަ ބުރަށް ދަތުރުކުރީ އެއްވަނަ ހޯދި ކޮލަމްބިއާ އާއި ދެވަނައަށް ދިޔަ މޮރޮކޯއެވެ. އެ ދެ ޓީމަށްވެސް ކުޅުނު ތިން މެޗުން ހަ ޕޮއިންޓް ލިބުނުއިރު، ޖަރުމަނަށް ލިބުނީ ހަތަރު ޕޮއިންޓާއެކު ތިންވަނައެވެ. އަދި އެންމެ ފުލުގައި ނިންމި ދެކުނު ކޮރެއާއަށް ލިބުނީ އެންމެ ޕޮއިންޓެކެވެ.
މި ފަހަރުގެ ވޯލްޑް ކަޕުން ޖަރުމަން ކެޓިއިރު، މުބާރާތުގެ ފުރަތަމަ މެޗުގައި ފަސޭހަކަމާއެކު 6-0 ގެ ނަތީޖާއަކުން މޮރޮކޯ އަތުން މޮޅުވި ނަމަވެސް، ދެވަނަ މެޗުން ވަނީ ކޮލަމްބިއާ އަތުން 2-1 ގެ ނަތީޖާއަކުން ބަލިވެފައެވެ.
މީގެ އިތުރުން މުޅިން އަލަށް އަންހެނުންގެ ވޯލްޑް ކަޕެއްގައި ކުޅޭ މޮރޮކޯއިން ކޮލަމްބިއާ ބަލިކުރިއިރު، އެ މެޗުގައި ފެނިގެންދިޔަ ހަމައެކަނި ލަނޑު ފުރަތަމަ ހާފުގެ އިތުރު ވަގުތުގައި މޮރޮކޯއަށް ކާމިޔާބުކޮށްދިނީ އަނީސާ ލަހްމާރީއެވެ.
މިއަދުގެ މެޗުތަކާއެކު ވިމެންސް ވޯލްޑް ކަޕުގެ ގްރޫޕް ސްޓޭޖުގެ ކުޅުން ވަނީ ނިމިފައެވެ. މި މުބާރާތުގެ ދެވަނަ ބުރުގައި ޖެމެއިކާއާ ދެކޮޅަށް ކޮލަމްބިއާ ނުކުންނައިރު، މޮރޮކޯ ނުކުންނާނީ ފްރާންސާ ދެކޮޅަށެވެ.