ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުން ކްރޮއޭޝިއާގެ ޑިފެންޑަރު ސެބަސްޓިޖާން އެންޓިކް އާއި ގާނާގެ މިޑްފީލްޑަރެއް ކަމަށްވާ ރޭގަން އޮބެންގުގެ ސޮއި ހޯދައިފިއެވެ.
މާޒިޔާއިން ގެނައި އުމުރުން 31 އަހަރުގެ އެންޓިކަކީ އިރާގުގެ އަލް-ޤުވާ އަލް-ޖަވިއްޔާ އާއެކު 2017 އަދި 2018 ވަނަ އަހަރުގެ އޭއެފްސީ ކަޕް ކާމިޔާބުކުރި ޑިފެންޑަރެކެވެ. އޭނާ އެ ޓީމާ ގުޅުނީ 2017 ވަނަ އަހަރުގެ އޭއެފްސީ ކަޕުގެ ކުއާޓާ ފައިނަލާ ހަމައަށް ޖޯޑަންގެ އަލް-ވަހުދަތަށް ކުޅެފައި، ސެމީ ފައިނަލަށެވެ. އަދި ޖެހިގެން އައި އަހަރުގެ މުބާރާތުގެ ކުއާޓާ ފައިނަލާ ހަމައަށް އޭނާ ވަނީ އޭއެފްސީ ކަޕުގެ ހުރިހާ މެޗެއްގައި ކުޅެފައެވެ.
އެންޓިކް ވަނީ ކްރޮއޭޝިއާ އާއި ޖޯޑަން އަދި އިރާގުގެ ސްލޮވީނިއާ އާއި ކަޒަކިސްތާން އަދި ގަތަރުގެ ފުރަތަމަ ޑިވިޝަނުގެ ކުލަބުތަކަށްވެސް ކުޅެފައެވެ.
މީގެ އިތުރުން މާޒިޔާއަށް ގެބައި ގާނާގެ މިޑްފީލްޑަރު، އުމުރުން 28 އަހަރުގެ ރޭގަން އޮބެންގް ވަނީ ސާބިއާ އާއި ކްރޮއޭޝިއާގެ ގިނަ ކުލަބުތަކަށް ކުޅެފައެވެ. އެގޮތުން ދެ ގައުމުގެ ފުރަތަމަ ޑިވިޝަނުގައިވެސް އޭނާ ގިނަ ދުވަސްތަކެއް ހޭދަކުރިއިރު، ސާބިއާގެ ޗުކާރިޗްކީ އާއެކު ވަނީ 2015 އަދި 2016 ވަނަ އަހަރު ޔުއެފާ ޔޫރޮޕާ ލީގު ކޮލިފައިން ކުޅެފައެވެ.
ދެން މި ހަފުތާގައި މާޒިޔާއިން ގެނައި އަނެއް ކުޅުންތެރިއަކީ ސާބިއާގެ ތަޖުރިބާކާރު ފޯވާޑެއް ކަމަށްވާ ވޮޖިސްލާވް ބަލަބަނޮވިޗެވެ. މި ތިން ކުޅުންތެރިންވެސް މާޒިޔާއަށް ގެނައީ މި ސީޒަނުގެ ނިޔަލަށެވެ.
މާޒިޔާއިން ބިދޭސީ ކުޅުންތެރިންނާއެކު މި ސީޒަން ފެށި ނަމަވެސް، އޭގެ ފަހުން އެ ޓީމުން ވަނީ ބޮސްނިއާގެ މިޑްފީލްޑަރު އެލްޑާ ހަސަނޮވިޗާއި ސާބިއާގެ ފޯވާޑް ސްޓެފަން މިހައިލޮވިޗް ދޫކޮށްލާފައެވެ. އެހެންކަމުން އަލަށް ގެނައި ތިން ކުޅުންތެރިންގެ އިތުރުން މިހާރު މާޒިޔާގައި ތިބި ބިދޭސީ ކުޅުންތެރިންނަކީ މިސްރުގެ މިޑްފީލްޑަރު ޚަލީލް ޖަމާލް އަދި ލިތުއޭނިއާގެ ޑިފެންޑަރު އެޑްގަރަސް ޒާސްކިސްއެވެ.