އެމްޑަބްލިއުއެސްސީ ދިވެހި ޕްރިމިއަރ ލީގުގެ ފުރަތަމަ ބުރުގައި ޓީސީ ސްޕޯޓްސް ކުލަބުން ކުޅުނު ފަހު މެޗު ކާމިޔާބުކޮށްފިއެވެ.
ޤައުމީ ފުޓްބޯޅަ ދަނޑުގައި މިރޭ ކުޅުނު މެޗުން ޓީސީ މޮޅުވީ ޔުނައިޓެޑް ވިކްޓަރީ (ޔޫވީ) އަތުން 3-0 ގެ ނަތީޖާއަކުންނެވެ.
މި މެޗު ފަށައިގެން ފުރަތަމަ ހަމަލާ އުފެއްދީ ޓީސީންނެވެ. އެގޮތުން އޭރިއާ ތެރެއިން އެ ޓީމުގެ ޒަޔާން ނަސީރު ފޮނުވާލި ހަމަލާ ޔޫވީގެ ގޯލްކީޕަރު އަލީ ނާޖިހު ވަނީ ދިފާއުކޮށްފައެވެ. އެކަމަކު މެޗުގެ 11 ވަނަ މިނެޓުގައި ޒަޔާން ވަނީ އޭރިއާ ތެރެއިން ފޮނުވާލި ރީތި ހަމަލާއަކުން ލަނޑެއް ޖަހައި، ޓީސީއަށް ލީޑު ނަގައިދީފައެވެ.
މި މެޗުގައި ޓީސީން ލީޑު ފުޅާކުރީ މެޗުގެ 21 ވަނަ މިނޓުގައެވެ. އަޙްމަދު އީރާސް ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ އަޙްމަދު ސާމިއުއެވެ.
މި މެޗުގެ ދެވަނަ ހާފު ފަށައިގެން ޓީސީގެ ޒަޔާން އޭރިއާ ތެރައަށް ވަދެ ފޮނުވާލި ބޯޅަ ކީޕަރު ވަނީ ދިފާއުކޮށްފައެވެ. އެކަމަކު މި ހާފު ފަށައިގެން ފަސްވަނަ މިނެޓުގައި ލިބުނު ޕެނަލްޓީއަކުން ޓީސީން ވަނީ ތިންވަނަ ލަނޑެއް ޖަހާފައެވެ. މި ފެނަލްޓީ ކާމިޔާބުކޮށްދިނީ އަހުނަފް މުޙައްމަދު ތަސްނީމެވެ. މިއީ އޭރިއާ ތެރެއިން ޓީސީގެ ޒަޔާނަށް ކުރި ފައުލަކާ ގުޅިގެން ދިން ޕެނަލްޓީއެކެވެ.
މި ލަނޑަށްފަހުވެސް ޓީސީއަށް ވަނީ ހުސް ދެ ފުރުސަތެއް ލިބިފައެވެ. އެކަމަކު މި ދެ ފުރުސަތުވެސް ސަލާމަތްކޮށްދިނީ ޔޫވީގެ ފަހަތަށް ކުޅުނު މުޙައްމަދު ފައިޒާން ފަޒީނެވެ. އެގޮތުން ފައިޒާން ދެ ބޯޅަވެސް ސަލާމަތްކޮށްފައިވަނީ ގޯލުގެ ރޮނގުމަތިންނެވެ.
މި މޮޅާއެކު ޓީސީ ވަނީ ކުޅުނު ހަތް މެޗުން ހޯދި 10 ޕޮއިންޓާއެކު, ތާވަލުގެ ހަތަރުވަނައިގައި އޮތް ބުރު ސްޕޯޓްސް ކުލަބާ ދެ ޕޮއިންޓް ގާތަށް ޖެހިލާފައެވެ. އަދި ޔޫވީން ލީގުގެ ފުރަތަމަ ބުރު ނިންމާލީ ކުޅުނު ހަތް މެޗުގެ ތެރެއިން އެންމެ މެޗަކުން މޮޅުވެ، ތިން ޕޮއިންޓާއެކުއެވެ.