އިންޓަރނޭޝަނަލް ބޮޑީބޯޑިން ކޯޕަރޭޝަން (އައިބީސީ) ވޯލްޑް ޓުއާގައި ހިމެނޭ ވިޒިޓް މޯލްޑިވްސް ޕްރޯ 2023، މާލޭ ވަރުނުލާ ރާޅުގަނޑު ސަރަޙައްދުގައި ފަށައިފިއެވެ.
ދުނިޔޭގެ ފެންވަރުގެ އެތުލީޓުންނާއެކު މި މުބާރާތް ރަސްމީކޮށް ފެށުމުގެ ގޮތުން މިއަދު ހަވީރު ބޭއްވި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދެވެ. މީގެއިތުރުން އައިބީސީގެ ސީއީއޯ އަދި ވޯލްޑް ޓުއާ މެނޭޖާ ގްލެން ކުއެވޭސް އާއި ފަތުރުވެރިކަމާ ބެހޭ ވަޒީރު ޑރ. އަބްދުﷲ މައުސޫމް ބައިވެރިވެވަޑައިގެންނެވިއެވެ.
މި މަހުގެ 12 ވަނަ ދުވަހުގެ ނިޔަލަށް ކުރިއަށްދާ މި މުބާރާތަކީ ވޯލްޑް ޓުއާގެ އިވެންޓްތަކުގެ ތެރެއިން ދެވަނައަކަށް އެންމެ ބޮޑު ފައިސާގެ އިނާމެއްވެސް ހުށަހަޅާފައިވާ އިވެންޓެވެ. ރާއްޖޭގައި ބާއްވާ މި އިވެންޓްގެ ޖުމްލަ ފައިސާގެ އިނާމަކީ ހަތްދިހަ ހާސް ޑޮލަރެވެ.
ރާއްޖެއިން މި އަހަރުގެ މުބާރާތުގައި ޖުމްލަ 14 އެތުލީޓަކު ވާދަކުރާނެއެވެ. އޭގެތެރޭގައި ރާއްޖޭގައި މުބާރާތް ބާއްވާތީ ލިބޭ ފްރީ ޕާސް ލިބޭ އެތުލީޓުންނާއި, ވައިލްޑް ކާޑް އެންޓްރީގެ ގޮތުގައި ޖާގަ ލިބޭ އެތުލީޓުން ހިމެނެއެވެ. ރާއްޖެއިން ވައިލްޑް ކާޑް ލިބުނު ދެ އެތުލީޓުންނަކީ ފިރިހެން ބައިން އަލީ ޚުޝްރުވާން އަޙްމަދު (ކުޑަ އައްޔަ) އާއި ޖޫނިއާ ބައިން އާމިން އުމަރު މޫސާއެވެ. އެ ދެ އެތުލީޓުންވެސް ވާދަކުރާނީ ސީޑްކޮށްފައިވާ ބޮޑީބޯޑަރުންނާއެކު ގަދަ 32 އާ ހިސާބުންނެވެ. މީގެ އިތުރުން ކޮންމެ ކެޓަގަރީއަކުން ހަތަރު އެތުލީޓަކަށް އެމްބީބީއޭއިން ވަނީ ފްރީ ޕާސް ދީފައެވެ.
ދުނިޔޭގެ ފެންވަރުގެ އެތުލީޓުންނަށް ބަލާއިރު މިދިޔަ އަހަރާ ޚިލާފަށް މިއަހަރު އިތުރު ބޮޑީބޯޑަރުން ވާދަކުރެއެވެ. އޭގެ ތެރޭގައި ދުނިޔޭގެ އެންމެ މަތީ ފެންވަރުގެ އެތުލީޓުންވެސް ހިމެނެއެވެ.
މުބާރާތް ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ވިދާޅުވީ މިފަދަ މުބާރާތެއް ރާއްޖޭގައި ބޭއްވުމަކީ ލިބޭ ބޮޑު ޝަރަފެއް ކަމަށާއި ދުނިޔޭގެ ޗެމްޕިއަނުންނާއެކު ރާއްޖޭގެ އެތުލީޓުންނަށް މިއީ ލިބޭ ރަނުގެ ފުރުސަތެއް ކަމަށެވެ. އަދި އަލަށް އަޅާ ރާޅާއެޅުންތެރިންނަށް ވީހާވެސް ރަނގަޅު ފުރުސަތުތަކެއް ތަނަވަސްވުމަކީ އުއްމީދު ކަމަށާއި އަދި އެއް ދުވަހުން އަނެއް ދުވަހަށް މި ކުޅިވަރު މަގުބޫލުވަމުން އަންނައިރު، މޫދު ކުޅިވަރުތަކެއް ކުރިއަށްގެންދަން ރަނގަޅު ވަސީލަތްތަކެއް ލިބެންޖެހޭ ކަމަށް ގަބޫލުކުރައްވާ ކަމަށްވެސް ވިދާޅުވިއެވެ.
އައިބީސީގެ ސީއީއޯ އަދި ވޯލްޑް ޓުއާ މެނޭޖާ ގްލެން ކުއެވޭސް ވިދާޅުވީ ދެވަނަ ފަހަރަށް މި މުބާރާތް ބާއްވަން ފުރުސަތު ލިބުމަކީ ލިބޭ ބޮޑު އުފަލެއް ކަމަށާއި ދިވެހި ސަރުކާރުގެ ބޮޑު އެއްބާރުލުމެއް މި ކުޅިވަރަށް ލިބުމަކީ މުޅި ކުޅިވަރަށް ލިބޭ ބޮޑު ކުރިއެރުމެއް ކަމަށެވެ.
މި މުބާރާތް ރާއްޖޭގައި ބާއްވަނީ ސަރުކާރުގެ ބޮޑު އެހީތެރިކަމަކާއެކު އެވެ. އެގޮތުން މިދިޔަ އަހަރުވެސް މި މުބާރާތް ރާއްޖޭގައި ބޭއްވިއިރު، މި މުބާރާތަށް ވަނީ ދުނިޔޭގެ ސަމާލުކަން ލިބިފައެވެ.