އެސް.އެސް.ސީ އަދި އެޗް.އެސް.ސީ އިމްތިޙާންގައި ދިވެހި އަދި އިސްލާމް މާއްދާގައި އޭ ސްޓަރ ދެއްވާނެ މިންގަނޑު ޑިޕާޓްމަންޓް އޮފް ޕަބްލިކް އެގްޒަމިނޭޝަނުން ޢާންމުކުރައްވައިފިއެވެ.
ގްރޭޑް 10 ނިންމާ ދަރިވަރުން ހަދަމުންދާ އެސް.އެސް.ސީ އިމްތިޙާންގައި އޭ ސްޓަރ ދެއްވަން ފަށްޓަވާނީ މިއަހަރު އޮކްޓޯބަރ އަދި ނޮވެމްބަރުގައި ބާއްވަވާ އިމްތިޙާނުން ފެށިގެންނެވެ. އަދި އޭލެވެލް ނިންމާ ދަރިވަރުން ބައިވެރިވާ އެޗް.އެސް.ސީ އިމްތިޙާންގައި އޭ ސްޓަރ އަންނަ އަހަރުގެ މެއި، ޖޫންގައި ބާއްވަވާ އިމްތިޙާނުން ފެށިގެން ގްރޭޑްކުރައްވަން ފެއްޓެވުމަށް ވަނީ ނިންމަވާފައެވެ.
މިބަދަލާއެކު އޭ ސްޓާރއެއް ލިބޭނީ އިމްތިޙާނުގައި ލިބޭ މާކްސް ނުވަދިހައަށްވުރެ މަތިވުމުންނެވެ. އަދި އޭ ގްރޭޑަށް ބަލަނީ އައްޑިހަ މާކްސްއާއި 89 އާދެމެދުގެ މާކްސް ހިމެނޭ ދަރިވަރުންނެވެ.
މިގޮތަށް ހަމަޖެއްސެވީ އެސްއެސްސީ އިމްތިޙާނާއި އެޗްއެސްސީ އިމްތިޙާނާ އެކުއެކީގައި ބާއްވަވާ ބައިނަލްއަޤްވާމީ އިމްތިޙާނުތަކުގައި ގްރޭޑް ދިނުމަށް ކަނޑައަޅާފައިވާ މިންގަނޑުތަކަށް ތަބާވުމުގެ ގޮތުންނާއި އެ އިމްތިޙާނުތަކާއި އެއް މިންގަނޑެއްގައި އެސްއެސްއީ އިމްތިޙާނާއި އެޗްއެސްސީ އިމްތިޙާނުގައިވެސް ގެންގުޅުއްވުމަށްޓަކައި ކަމަށް ޕަބްލިކް އެގްޒަމިނޭޝަނުން ވިދާޅުވެއެވެ.
***********