އެފްރިކާ ބައްރުގައި އޮންނަ އެންމެ ބޮޑު ފެންގަނޑު ކަމުގައިވާ ލޭކް ވިކްޓޯރިޔާއަށް ބޯޓެއް ބަންޑުންޖަހައިލާ ޔުގާންޑާގެ 20 މީހުން މަރުވެއްޖެއެވެ. މި ހާދިސާ ހިނގި ވަގުތު ބޯޓުގައި ތިބި އިތުރު ނުވަ މީހަކު ސަލާމަތް ކޮށްފައިވާއިރު، އިތުރު ބަޔަކު ގެއްލިފައިވާ ކަމަށް ބެލެވޭ ކަމުގައި ވެރިރަށް ކަމްޕާލާގެ އޮފިޝަލުން ވިދާޅުވެއެވެ. އަދި، އެ މީހުން ހޯދުމަށް ޓީމުތަކުން މިހާރު ދަނީ މަސައްކަތް ކުރަމުންނެވެ.
ބަންޑުންޖަހައިލާފައި ވަނީ މުދާ އުފުލާ ބޯޓެކެވެ. އޭގައި ބޯޓުދެއްޔާއި، ކާނާގެ އިތުރުން މަހުގެ ބާވަތްތައް ހުރި ކަމުގައި ފުލުހުން ވިދާޅުވިއެވެ. މި ހާދިސާ ހިނގަން މެދުވެރިވި ސަބަބު ދެނެގަތުމަށް ތަހުޤީޤު ފަށާފައިވާއިރު، ބޯޓު ބަންޑުންޖަހައިލާފައި ވަނީ ބަރުކޮށް މުދާ އުފުލުމާއި މޫސުން ގޯސްވުމާ ގުޅިގެން ކަމަށް ބެލެވޭ ކަމުގައި ފުލުހުން ވިދާޅުވިއެވެ. މި ހާދިސާ ހިނގި ވަގުތު ބޯޓުގައި 34 މީހުން ތިބި ކަމަށް ބެލެވެއެވެ.
މިއީ، ލޭކް ވިކްޓޯރިޔާގައި ބޯޓެއް ބަންޑުންޖަހައިލުމުގެ ހާދިސާއެއް ހިނގާފައިވާ ފުރަތަމަ ފަހަރެއް ނޫނެވެ. މި ފަދަ ގިނަ ހާދިސާތައް ހިނގާފައި ވަނީ ޤަވާޢިދާ ޚިލާފަށް ގިނަ ޢަދަދެއްގެ ބަޔަކު އަރުވައިގެން ދަތުރުކުރުމުން ކަމަށް ރިޕޯޓުތަކުން ހާމަވެއެވެ. 2018 ވަނަ އަހަރުގެ ނޮވެންބަރު މަހު ޔުގާންޑާގެ އައްސޭރިފަށުގައި ހިނގި މި ފަދަ އެހެން ހާދިސާއެއްގައި 32 މީހުން މަރުވިއެވެ. އެ ހާދިސާ ހިނގި ވަގުތު ބޯޓުގައި 90 އަށްވުރެ ގިނަ ފަސިންޖަރުން ތިބި ކަމުގައި ޔުގާންޑާގެ ފުލުހުން ވިދާޅުވިއެވެ.
ހުސްވި އަހަރުގެ ސެޕްޓެންބަރު މަހު ޓެންޒެނިޔާގެ އައްސޭރިފަށަށް ފެރީއެއް ބަންޑުންޖަހައިލި ހާދިސާއެއްގައި ވެސް 100 ވަރަކަށް މީހުން މަރުވިއެވެ. ލޭކް ވިކްޓޯރިޔާއަކީ 70,000 އަކަ ކިލޯމީޓަރުގެ ބޮޑު ފެންގަނޑެކެވެ. އެ ފެންގަނޑުގެ އައްސޭރިފަށުގައި އޮންނަ ޤައުމުތަކުގެ ތެރޭގައި ޔުގާންޑާއާއި ޓެންޒެނިޔާގެ އިތުރުން ކެންޔާ ހިމެނެއެވެ. އެފްރިކާ ބައްރުގައި އޮންނަ އެހެން ފެންގަނޑެއް ކަމުގައިވާ ލޭކް އެލްބަރޓްގައި 2020 ވަނަ އަހަރުގެ ޑިސެންބަރު މަހު ހިނގި ހާދިސާއެއްގައި ވެސް 26 މީހުން މަރުވެފައިވެއެވެ.