ޖަޕާނުގެ ފުކުއޯކާގައި ކުރިއަށްދިޔަ 20 ވަނަ ވޯލްޑް އެކުއަޓިކްސް ޗެމްޕިއަންޝިޕްސްގައި ވާދަކޮށް ދިވެހި ފެތުންތެރިން ޤާއިމުކުރި ރިކޯޑުތަކުން ފެންނަނީ ފެތުމުގައި ރާއްޖެ މަޑުމަޑުން ކުރިއަރަމުން އަންނަ ކަމުގެ ހެކިތައް ކަމަށް ޤައުމީ ޓީމުގެ ކޯޗު އިބްރާހީމް މޫސާ ބުނެފިއެވެ.
މި ފަހަރުގެ ވޯލްޑް އެކުއަޓިކްސް ޗެމްޕިއަންޝިޕްސްގައި ރާއްޖޭގެ ފެތުންތެރިން ވަނީ ޖުމްލަ ހަ ރިކޯޑެއް ޤާއިމުކޮށްފައެވެ. އެގޮތުން ދިވެހި ހަތަރު އެތުލީޓެއް މުބާރާތުގައި ވާދަކުރިއިރު، ޓީމުގައި ހިމެނުނު ޢަލީ އިމްޢާން ވަނީ ފިރިހެނުންގެ ލޯންގް ކޯސް 200 މީޓަރު ބެކްސްޓްރޯކުގެ އިތުރުން ފިރިހެނުންގެ ލޯންގް ކޯސް 100 މީޓަރު ބެކްސްޓްރޯކް އިވެންޓުގެ ޤައުމީ ރިކޯޑު އާކޮށްފައެވެ. އަދި އަންހެނުންގެ ލޯންގް ކޯސް 100 މީޓަރު ބެކްސްޓްރޯކް އިވެންޓުގެ ޤައުމީ ރިކޯޑު ހަމްނާ އަޙްމަދުވެސް ވަނީ އާކޮށްފައެވެ.
މީގެ އިތުރުން ފިރިހެނުންގެ ލޯންގް ކޯސް 200 މީޓަރު ބަޓަފްލައި އިވެންޓުގެ ޤައުމީ ރިކޯޑު މުޙައްމަދު ރިޙާން ޝިހާމް އައުކުރިއިރު، އަންހެނުންގެ ލޯންގްކޯސް 200 މީޓަރު ބަޓަފްލައި އިވެންޓުގެ ޤައުމީ ރިކޯޑު މިރާލް ޢައިން ލަތީފުވެސް ވަނީ އައުކޮށްފައެވެ. އަދި ލޯންގް ކޯސް ހަތަރެއް ގުނަ 100 މީޓަރު މިކްސްޑް މެޑްލޭ ރިލޭ އިވެންޓުގެ ޤައުމީ ރިކޯޑުވެސް ދިވެހި ޓީމުން ވަނީ އައުކޮށްފައެވެ.
މުބާރާތުގައި ރަނގަޅު ކުރިއެރުންތަކެއް ހޯދުމަށްފަހު އެނބުރި ރާއްޖެ އައިސް "ޕީއެސްއެމް ސްޕޯޓްސް" އަށް ދިން އިންޓަވިއުއެއްގައި ޓީމުގެ ކޯޗު އިބްރާހީމް މޫސާ ބުނީ މި ފެންނަނީ ފެތުމުގައި ރާއްޖެ ކުރިއަރައިގެން އަންނަކަމުގެ ހެކިތައް ކަމަށެވެ. އެގޮތުން މި ފަހަރުގެ މުބާރާތުގައި ވާދަކުރީ ވަރަށް ޒުވާން ފެތުންތެރިން ކަމަށާއި، އެންމެ އެކަތިގަނޑަކަށް ވެގެން މަސައްކަތް ކޮށްފިނަމަ، މިއަށްވުރެ ރަނގަޅު ނަތީޖާއެއް ފެނިގެންދާނެ ކަމަށެވެ. އެގޮތުން ކުލަބުތަކާއި އެސޯސިއޭޝަން މިހާރަށް ވުރެ ބޮޑަށް ގުޅިގެން މަސައްކަތް ކޮށްފިނަމަ، ކުރިއަށް އޮތް ތަނުގައި ކާމިޔާބީތަކެއް ފެނިގެންދާނެ ކަމަށްވެސް ވަނީ ބުނެފައެވެ.
މި ފަހަރުގެ ވޯލްޑް އެކުއަޓިކްސް ޗެމްޕިއަންޝިޕްސްގައި ޖުމްލަ ހަ ރިކޯޑެއް ޤާއިމުކުރިއިރު، މި ފަހަކަށް އައިސް ދިވެހި ފެތުންތެރިން އަންނަނީ ބައިނަލްއަޤުވާމީ މައިދާނުގައި ބޮޑެތި ކުރިއެރުންތަކެއް ހޯދަމުންނެވެ.