ސްރީ ލަންކާގައި ކުރިއަށްދިޔަ 101 ވަނަ ލަންކާ ނޭޝަނަލް އެތުލެޓިކްސް ޗެމްޕިއަންޝިޕުގެ އަންހެނުންގެ 400 މީޓަރު ރިލޭ އިވެންޓުގައި ވާދަކޮށް، ރާއްޖޭގެ އަންހެން ރިލޭ ޓީމުން ޤައުމީ ރިކޯޑު މުގުރާލައިފިއެވެ.
ރިކޯޑު މުގުރާލި 400 މީޓަރުގެ ރިލޭ އިވެންޓުގައި ވާދަކުރި ޤައުމީ އަންހެން ޓީމުގައި ހިމެނެނީ އައިމިނަތު ލަޔާނާ މުޙައްމަދާއި، ޙައްވާ މުޒްނާ ފާއިޒާއި، އައިޝަތު ނާދު އަސްއަދު ވަޖީހުގެ އިތުރުން ޒިވާ މޫސާ ޝަފީއުއެވެ. މި ޓީމުން ރިކޯޑު މުގުރާލީ ހަތަރު މިނެޓު 6.62 ސިކުންތުން ރޭސް ނިންމައިގެންނެވެ.
މީގެ ކުރިން މި ރިކޯޑު އޮތީ 2016 ވަނަ އަހަރު އިންޑިއާގެ ގުވަހާޓީގައި ބޭއްވި ސައުތު އޭޝިއަން ގޭމްސްގެ 400 ރިލޭ އިވެންޓުގައި ވާދަކުރި ޓީމު އަތުގައެވެ. އެ ޓީމުގައި ހިމެނުނީ އަފާ އިސްމާޢީލާއި، ޝަމްހާ އަޙްމަދާއި، އައިމިނަތު ނަޒްރާ އަދި މިރުފަތު އަޙްމަދެވެ. އެ ޓީމުން ރޭސް ނިންމާފައިވަނީ ހަތަރު މިނެޓު 18.11 ސިކުންތުންނެވެ.
މި ފަހަރުގެ ލަންކާ މުބާރާތުގައި އަންހެން ޓީމުގެ އިތުރުން ފިރިހެން ހަތަރު އެތުލީޓުންވެސް ވަނީ ވާދަކޮށްފައެވެ. އެއީ ހުސެއިން ޒީކް ސުއާދާއި، އާދަމް ރިފްއަތާއި، ޒުއިޒް މުޙައްމަދު ސުއާދު އަދި އަބްދުލް ރަޝީދު އިސްމާޢީލެވެ.
ލަންކާ ނޭޝަނަލް އެތުލެޓިކްސް ޗެމްޕިއަންޝިޕުގައި ޤައުމީ ޓީމު ވާދަކުރިއިރު، މި މަހުގެ 25 އިން ފެށިގެން އަންނަ ސެޕްޓެމްބަރު މަހުގެ ތިންވަނަ ދުވަހުގެ ނިޔަލަށް މަޑަގަސްކަރައިގައި އޮންނަ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަކީ ޤައުމީ އެތުލެޓިކްސް ޓީމުން އެންމެ ދުރާލާ ތައްޔާރުވާ އެއް މުބާރާތެވެ. އެގޮތުން މިދިޔަ ދެ ގޭމްސްގައިވެސް ރަނގަޅު ކާމިޔާބީތަކެއް ހޯދި އެތުލެޓިކްސް ޓީމުގެ އަމާޒަކީ މި އަހަރު އިތުރު މެޑެލްތަކެއް ހޯދުމެވެ.