އަފްޣާނިސްތާނުގައި ވެރިކަންކުރާ ޠާލިބާން ސަރުކާރުގެ އިސްވެރިންނާ އެމެރިކާގެ ޚާރިޖީ ވުޒާރާގެ އިސްވެރިން ބައްދަލު ކުރައްވައިފިއެވެ. ޤަޠަރުގެ ވެރިރަށް ދޯހާގައި ކުރިއަށް ދިޔަ މި ބައްދަލުވުންތަކުގައި އަފްޣާނިސްތާނުގެ އަންހެނުންނާއި އަންހެން ކުދިންގެ ހައްޤުތައް ކަށަވަރު ކޮށްދިނުމަށް އެމެރިކާއިން ވަނީ ޠާލިބާނުންނަށް ބާރު އަޅާފައެވެ. އަދި، ޠާލިބާނުން ހައްޔަރުކޮށްފައިވާ އެމެރިކާގެ ރައްޔިތުން މިނިވަން ކުރުމަށް ވެސް ގޮވައިލާފައެވެ.
އަފްޣާނިސްތާނުގެ އިންތިޚާބީ ސަރުކާރު ވައްޓައިލުމަށް ފަހު ޠާލިބާނުން އެ ޤައުމުގެ ވެރިކަން ފޭރިގަނެފައި ވަނީ 2021 ވަނަ އަހަރުގެ އޮގަސްޓު މަހުގައެވެ. ޠާލިބާނުން އަފްޣާނިސްތާނުގެ ވެރިކަން ވައްޓައިލާފައި ވަނީ އެ ޤައުމުގައި ތިބި އެމެރިކާ ސިފައިން ފޭބި ފަހުންނެވެ. އެމެރިކާގެ ޚާރިޖީ ވުޒާރާގެ އިސްވެރިންނާ އެކު ބޭއްވި ބައްދަލުވުމުގައި ޠާލިބާނުން ވަނީ އެ ޖަމާޢަތުގެ އިސްވެރިންނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ތެރެއިން ބޭރު ޤައުމުތަކަށް ދަތުރު ކުރުމަށް އޮތް ހުރަސްތައް އުވައިލަން އެދިފައެވެ.
އެމެރިކާގެ ޚާރިޖީ ވުޒާރާއިން ބުނީ ދެ ދުވަހުގެ މުއްދަތަށް ދޯހާގައި ކުރިއަށް ދިޔަ މަޝްވަރާތަކުގައި އަފްޣާނިސްތާނުގެ އަންހެނުންނާއި އަންހެން ކުދިންނަށް ޠާލިބާނުން ޖައްސަމުން ނިކަމެތި ހާލުން އެ މީހުން ސަލާމަތްކޮށް، އެ މީހުންގެ ހައްޤުތައް ހިމާޔަތް ކުރަން ބާރު އަޅާފައިވާނެ ކަމުގައެވެ. ޚާއްޞަކޮށް، އަންހެން ކުދިންނަށް ތަޢުލީމު ހާސިލުކުރުމާއި ސްކޫލްތަކާއި ކޮލެޖު އަދި ޔުނިވަރސިޓީތަކަށް ދިޔުން މަނާކޮށްފައި އޮތް އޮތުން އުވައިލުމަށާއި، އަންހެނުންނަށް ވަޒީފާގެ މައިދާނަށް ނުކުތުމަށް އޮތް ހުރަސްތައް ނައްތައިލުމަށް ގޮވައިލާފައިވާނެ ކަމުގައެވެ.
އަދި، ޠާލިބާނުން އަފްޣާނިސްތާނުގެ ވެރިކަން ފޭރިގަތް ފަހުން އެ ޤައުމަށް ނިސްބަތްވާ ޓެރެރިސްޓު ޖަމާޢަތްތަކުން އެމެރިކާއާއި އެ ޤައުމުގެ އެކުވެރިންނާ ދެކޮޅަށް ދޭ ބޮޑެތި ހަމަލަތަކުގެ ޢަދަދު މަދުވެފައިވާ ކަން ވެސް އެމެރިކާގެ ޚާރިޖީ ވުޒާރާއިން ފާހަގަކޮށްފައިވެއެވެ. ޠާލިބާނުން އެދެނީ އެމެރިކާއިން ހިފަހައްޓާފައިވާ އެ ޤައުމުގެ ފައިސާތައް ދޫކޮށްލުމަށެވެ. އެމެރިކާއިން ވަނީ އަފްޣާނިސްތާނުގެ މަރުކަޒީ ބޭންކުގެ 10 ބިލިޔަނެއްހާ އެމެރިކާ ޑޮލަރު ފްރީޒްކޮށްފައި ނުވަތަ ހިފަހައްޓާފައެވެ.
އެމެރިކާއިން އަފްޣާނިސްތާނަށް އަރައި އަލްޤައިދާއާ ދެކޮޅަށް ހަނގުރާމަ އިޢުލާނުކޮށްފައި ވަނީ 2001 ވަނަ އަހަރުގެ ސެޕްޓެންބަރު މަހުގެ 9 ވަނަ ދުވަހު ނިއު ޔޯކްގައި ހުންނަ ވޯލްޑް ޓްރޭޑް ސެންޓަރަށް ދިން ޓެރެރިސްޓު ހަމަލައާ ގުޅިގެންނެވެ. އެ ހަނގުރާމައިގައި އަފްޣާނިސްތާން އޮތީ ސުންނާފަތިކޮށްލާފައެވެ. އަދި، އެ ޤައުމުގެ އިޤުތިޞާދު އޮތީ ވަޅުގަނޑަކަށް ވެއްޓިފައެވެ.
އެމެރިކާ ސިފައިން އަފްޣާނިސްތާނުން ފައިބާފައި ވަނީ މީގެ ދެ އަހަރެއްހާ ދުވަސް ކުރިންނެވެ. އެމެރިކާ ސިފައިން އަފްޣާނިސްތާނުން ފޭބުމުން ޠާލިބާނުން އެ ޤައުމު ވެރިކަން ފޭރިގަނެފައިވީ ނަމަވެސް، އެއްވެސް ޤައުމަކުން އަދި މިހާތަނަށް ޠާލިބާނުންގެ ސަރުކާރު ބަލައިގަނެފައެއް ނުވެއެވެ.