މިއަހަރުގެ ދެވަނަ ކުއާޓަރުގައި އެސްޓީއޯއަށް ލިބުނު އާމްދަނީ ފުރަތަމަ ކުއާޓަރާއި އަޅާބަލާއިރު ދަށަށް ގޮސްފައިވާކަމަށް އެ ކުންފުނީގެ ހިސާބުތަކުން ދައްކައިފިއެވެ.
އެސްޓީއޯއިން އާއްމުކޮށްފައިވާ މާލީ ހިސާބުތައް ދައްކާގޮތުން މި އަހަރުގެ ދެ ވަނަ ކުއާޓަރުގައި އެސްޓީއަށް އާމްދަނީގެ ގޮތުގައި ލިބިފައިވަނީ 3.8 ބިލިއަން ރުފިޔާއެވެ. މިއީ މިއަހަރުގެ ފުރަތަމަ ކުއާޓަރުގައި އާމްދަނީގެ ގޮތުގައި ލިބުނު 4.4 ބިލިއަން ރުފިޔާއާ އަޅާބަލާއިރު ދަށް އަދަދެކެވެ.
ދެވަނަ ކުއާޓަރުގައި އެސްޓީއޯޢަށް ފައިދާގެ ގޮތުގައި ލިބުނީ 303 މިލިއަން ރުފިޔާއެވެ. މިއީ ފުރަތަމަ ކުއާޓަރުގައި ލިބުނު 368 މިލިއަން ރުފިޔާއާ އަޅާބަލާއިރު ދަށް އަދަދެކެވެ.
އެސްޓީއޯއިން ބުނީ ދުނިޔޭގެ ބާޒާރުގައި ތެލުގެ އަގަށް އައި ބަދަލާއި ގުޅިގެން ކުންފުނިން ވިއްކަމުން ދިޔަ ތެލުގެ އަގު ދަށްކުރުމާއެކު ތެލުގެ ވިޔަފާރިން ލިބުނު އާމްދަނީ 15 އިންސައްތަ ދަށްވެފައިވާކަމަށެވެ.
ދެވަނަ ކުއާޓާރގައި އޭގެ ކުރީ ކުއާޓަރާއާއި އަޅާބަލައި ފައިދާ ދަށްވި ކަމުގައިވިޔަސް މިއަހަރުގެ ޖޫން މަހުގެ ނިޔަލަށް ވަނީ ޓެކުހަށް ކެނޑުމަށްފަހު ސާފު ފައިދާގެ ގޮތުގައި އެސްޓީއޯއަށް 671 މިލިއަން ރުފިޔާ ލިބިފައެެވެ. މިއީ މިދިޔަ އަހަރުގެ ފުރަތަމަ ހަ މަހާއި އަޅާބަލާއިރު 366 މިލިއަން ރުފިޔާގެ ކުރިއެރުމެކެވެ.