ފީފާ ވިމެންސް ވޯލްޑް ކަޕް: ދެކުނު އެފްރިކާއާ އެއްވަރުކޮށް އާޖެންޓީނާއިން އުއްމީދު އައުކޮށްފި

ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ދެކުނު އެފްރިކާ އާއި އާޖެންޓީނާ ބައްދަލުކުރި މެޗު އެއްވަރުވެއްޖެއެވެ.

ނިއު ޒީލަންޑުގެ ޑުނެޑިން ސްޓޭޑިއަމުގައި ކުޅުނު މި މެޗު ނިމުނީ 2-2 ގެ ނަތީޖާއަކުން ދެ ޓީމު އެއްވަރުވެގެންނެވެ. މި މެޗުގައި ދެކުނު އެފްރިކާއިން ދެ ލަނޑު ޖަހާފަވަނިކޮށް, ފަހަތުން އަރައި އެއްވަރުކޮށް މުބާރަތުގެ ދެވަނަ ބުރުގެ އުއްމީދު އާޖެންޓީނާއިން ވަނީ ދަމަހައްޓާފައެވެ.

ފޯރިގަދަ ކުޅުމެއް ފެނިގެންދިޔަ މެޗުގައި އާޖެންޓީނާއިން ގިނައިރު ބޯޅަ ހިފަހައްޓައިގެން ކުޅުނު ނަމަވެސް، ގިނަ ހަމަލާ އުފައްދައިފަ ވަނީ ދެކުނު އެފްރިކާއިންނެވެ. މެޗުގެ ފުރަތަމަ ލަނޑު ފުރަތަމަ ހާފުގެ 30 ވަނަ މިނެޓުގައި ދެކުނު އެފްރިކާއަށް ކާމިޔާބުކޮށްދިނީ ސްކޮޓްލަންޑުގެ ގްލެސްގޯ ސިޓީއަށް ކުޅެމުން އަންނަ ލިންޑާ މޮތާލޯއެވެ. ދެކުނު އެފްރިކާއިން ލީޑު އިތުރަށް ފުޅާކުރީ މެޗުގެ ދެވަނަ ހާފުގައެވެ. މި ލަނޑު މެޗުގެ 66 ވަނަ މިނެޓުގައި އެ ޓީމަށް ކާމިޔާބުކޮށްދިނީ ތެންބީ ގަޓަލާނާއެވެ. މި ލަނޑު ބަލައިގަތީ ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހުއެވެ.

މި ލަނޑަށްފަހުވެސް ދެކުނު އެފްރިކާއިން ވަނީ ނުރައްކާތެރި ހަމަލާތަކެއް އާޖެންޓީނާގެ ގޯލާ އަމާޒުކޮށް ފޮނުވާލަފައެވެ. އެކަމަކު އާޖެންޓީނާއިން މެޗު ނަތީޖާ ހަމަހަމަކުރީ ފަހު 15 މިނިޓުގެ ތެރޭގައި ކާމިޔާބުކުރި ލަނޑުތަކުންނެވެ. އެގޮތުން އާޖެންޓީނާ މެޗުގެ ތެރެއަށް ވަނީ މެޗުގެ 74 ވަނަ މިނެޓުގައި ކެޕްޓަން ޔަމީލާ ރޮޑްރިގޭޒް ނަގައިން ހުރަހަކުން ސޯފިޔާ ބްރައުން ކާމިޔާބުކޮށްދިން ލަނޑުންނެވެ. އަދި އޭގެ ފަސް މިނެޓު ފަހުން އާޖެންޓީނާއަށް ނަތީޖާ ހަމަހަމަކޮށްދިނީ ރޮމިނާ ނުނޭޒްއެވެ.

މި ލަނޑާއެކު މުބާރަތުގެ ތާރީޚުގައި ފުރަތަމަ މެޗުން މޮޅުވާން ދެކުނު އެފްރިކާއިން ކުރަމުންދިޔަ މަސައްކަތަށް ހިޔަނި އެޅިގެންދިޔައެވެ. މި ނަތީޖާއެކު ދެ ޓީމަށް ޕޮއިންޓެއް ލިބުނުއިރު, އާޖެންޓީނާ އޮތީ ގުރޫޕް ޖީގެ ފުލުގައެވެ. މި ގުރޫޕުގައި ކުރީގަ އުޅޭ ސްވިޑަން އާއި އިޓަލީއަށް ލިބެނީ ތިން ޕޮއިންޓެވެ.