މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ނައިޖީރިއާއިން ފަހަތުން އަރައި މުބާރާތުގެ އެއް ހޯސްޓް ކަަމަށްވާ އޮސްޓްރޭލިއާ ބަލިކޮށްފިއެވެ.
އޮސްޓްރޭލިއާގެ ބްރިސްބޭން ސްޓޭޑިއަމުގައި އިއްޔެ ކުޅުނު މެޗު ނައިޖީރިއާއިން ކާމިޔާބުކުރީ 3-2 ގެ ނަތީޖާއަކުންނެވެ.
މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ އޮސްޓްރޭލިއާއިންނެވެ. ފުރަތަމަ ހާފުގެ އިތުރު ވަގުތުގެ ފުރަތަމަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އެމިލީ ވޭން އެގްމޮންޑެވެ. އެކަމަކު އޭގެ ފަސް މިނެޓު ފަހުން ނައިޖީރިއާއިން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ޖަހައިދިނީ އުކެންނަ ކާނޫއެވެ.
މި މެޗުގެ ދެވަނަ ހާފު ފަށައިގެން ނައިޖީރިއާއިން މޮޅު ކުޅުމެއް ދެއްކިއިރު، މެޗުގެ 65 ވަނަ މިނެޓުގައި އެ ޓީމުން ވަނީ ފަހަތުން އަރައި ލީޑު ނަގާފައެވެ. މި ލަނޑު ނައިޖީރިއާއަށް ކާމިޔާބުކޮށްދިނީ އޮސިނާކީ އޮހާލޭއެވެ. އަދި އޭގެ ހަތް މިނެޓު ފަހުން އަސިސަޓް އޮޝޯލާ ވަނީ ލަނޑެއް ޖަހައި، ނައިޖީރިއާގެ ލީޑު ފުޅާކޮށްދީފައެވެ.
އޭގެ ފަހުން މި މެޗުގައި އޮސްޓްރޭލިއާއިން ލަނޑެއް ޖެހޭތޯ ގިނަ ހަމަލާތަކެއް އުފެއްދި ނަމަވެސް، އެ ޓީމަށް ފަރަގު ކުޑަކުރެވިފައިވަނީ މެޗުގެ އިތުރު ވަގުތުގެ 10 ވަނަ މިނެޓުގައެވެ. މި ލަނޑު އޮސްޓްރޭލިއާއަށް ކާމިޔާބުކޮށްދިނީ އަލާނާ ކެނެޑީއެވެ.
މި މެޗުން މޮޅުވެގެން ދެވަނަ ބުރުގެ ޖާގައެއް ހޯދުމުގެ ފުރުސަތު ދުނިޔޭގެ ރޭންކިންގެ 10 ވަނައިގައި އޮތް އޮސްޓްރޭލިއާއަށް އޮތް ނަމަވެސް، ރޭންކިންގެ 30 ވަނައިގައި އޮތް ޓީމެއް އަތުން ބަލިވުމުން އެ ޓީމަށް ވަނީ އިތުރު އިންތިޒާރެއް ކުރަން ޖެހިފައެވެ.
މި ވަގުތު ގްރޫޕް ބީގެ އެއްވަނައިގައި އޮތް ނައިޖީރިއާ އާއި ދެވަނައިގައި އޮތް ކެނެޑާއަށް ދެ މެޗުން ހަތަރު ޕޮއިންޓް ލިބިފައިވާއިރު، ތިންވަަނައިގައި އޮތް އޮސްޓްރޭލިއާއަށް ލިބިފައިވަނީ ތިން ޕޮއިންޓެވެ. ގްރޫޕް ސްޓޭޖުގެ ފަހު މެޗުގައި އޮލިމްޕިކްސްގެ ޗެމްޕިއަން ކެނެޑާއާ ދެކޮޅަށް އޮސްޓްރޭލިއާ ނުކުންނައިރު، ނައިޖީރިއާ ނުކުންނާނީ ވޯލްޑް ކަޕުން ކަޓާފައިވާ އަޔަލަންޑާ ދެކޮޅަށެވެ.