ލިޔެކިޔުން ހަމަނުވެގެން އުވާލާން އިޢުލާންކޮށްފައިވާ ޖަމުޢިއްޔާތަކުގެ ތެރޭގައި ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އާއި ރާއްޖޭގެ ދުވަސްވީ ބައެއް ފުޓްބޯޅަ ކުލަބުތައް ހިމެނިއްޖެއެވެ.
ލިޔެކިޔުން ހަމަނުވެގެން ކުޅިވަރާ ބެހޭ ވުޒާރާއިން ވަނީ 1989 ޖަމުޢިއްޔާއެއް އުވާލަން އިޢުލާންކޮށްފައެވެ. އެ ވުޒާރާއިން ބުނެފައިވަނީ މިއީ 2022 ވަަނަ އަހަރުގެ ނިޔަލަށް ވިދިވިދިގެން ދެ އަހަރުގެ އަހަރީ ރިޕޯޓު ހުށަހަޅާފައި ނުވާތީ ނުވަތަ ހިންގާ ކޮމިޓީ ރަޖިސްޓްރީ ކޮށްފައިނުވާ ޖަމުޢިއްޔާތައް ކަމަށެވެ.
މި ލިސްޓުގައި ރާއްޖޭގެ ދެވަނައަށް އެންމެ ބޮޑު ކުޅިވަރު ކަމަށްވާ ވޮލީގެ ބެލެނިވެރި އެސޯސިއޭޝަން ހިމެނިއިރު، އެ އެސޯސިއޭޝަން ގަވާއިދާ ޚިލާފަށް ހިންގަމުން އަންނަ ކަމަށް މީގެ ކުރިންވެސް ގިނަ ބަޔަކު ވަނީ ބުނެފައެވެ. އެކަމަކު މި ކަމުގައި ކުޅިވަރާ ބެހޭ ވުޒާރާއިން މީގެ ކުރިން ފިޔަވަޅެއް އަޅާފައެއް ނުވެއެވެ. އަދި ވީއޭއެމުގެ ހިންގުން ދޯދިޔާވެ ވޮލީގެ ގިނަ ބަޔެއްގެ ފާޑުކިޔުން ވީއޭއެމަށް ވަނީ އަމާޒުވެފައެވެ.
ކުޅިވަރާ ބެހޭ ވުޒާރާއިން ނެރެފައިވާ އިޢުލާނުގައިވާ ގޮތުން ލިސްޓުގައި ނަން އޮތް ޖަމުޢިއްޔާއެއް އުވާލުން ހުއްޓުވުމަށް އެދޭ ފަރާތަކަށް އެ ފުރުސަތު އެބައޮތެވެ. އެއީ އެ ޖަމުޢިއްޔާގެ މެންބަރަކަށް ނުވަތަ މަސްލަހަތު އޮތް ތިންވަނަ ފަރާތަކަށް, ޖަމުޢިއްޔާތަކުގެ ރަޖިސްޓްރާއަށް ލިޔުމުން ހުށަހަޅައިގެންނެވެ. އެ ފުރުސަތު ދީފައި އޮތީ އަންނަ ސެޕްޓެމްބަރު މަހުގެ 24 ވަނަ ދުވަހުގެ މެންދުރުފަހު 14:00 ގެ ނިޔަލަށެވެ.
ވޮލީބޯޅަ އެސޯސިއޭޝަނުގެ އިތުރުން މި ލިސްޓުން ދެން ފާހަގަކޮށްލެވެނީ ރާއްޖޭގެ އެންމެ ދުވަސްވީ އެއް ފުޓްބޯޅަ ކުލަބު ކަމަށްވާ ވިކްޓަރީ ސްޕޯޓްސް ކުލަބާއި، ފުރަތަމަ ޑިވިޝަނުގެ ކުލަބު ވެލެންސިއާ އާއި، ޔުނައިޓެޑް ވިކްޓަރީ (ޔޫވީ) އާއި، ސުޕަ ޔުނައިޓެޑް ސްޕޯޓްސް (ސަސް) އާއި، ކުލަބު އީގަލްސް އަދި ކުލަބު ގްރީން ސްޓްރީޓްސްއެވެ.
މިކަމާ ގުޅިގެން ކުރެއްވި ޓްވީޓެއްގައި ކުޅިވަރާ ބެހޭ ވަޒީރު އަޙްމަދު މަޚްލޫފް ވިދާޅުވީ ޖަމުޢިއްޔާތައް އުވާލަން އާއްމުކޮށްފައިވާކަން ފެނުނީ ނޫސްތަކުން ކަމަށާއި، އޭގެ ތެރޭގައި ޖަމުޢިއްޔާތަކުގެ ރަޖިސްޓްރާގެ ދަށުގައި ނުހިމެނޭ ބައެއް ޤައުމީ ކުޅިވަރު އެސޯސިއޭޝަންތަކާއި ބައެއް ކުޅިވަރު ކުލަބުތައްވެސް ހިމެނޭ ކަމަށެވެ. އަދި ހަރަކާތްތެރިކޮށް ފެންނަ ބައެއް ޖަމުޢިއްޔާތައްވެސް ހިމެނޭ ކަމަށާއި، އެކަމާއި ގުޅިގެން ބައެއް ފަރާތްތަކުގެ ކަންބޮޑުވުންވެސް ލިބިފައިވާ ކަމަށެވެ. އެހެންކަމުން އެކަންކަން ބަލައި، ރަނގަޅުކުރުމަށް އެދިފައިވާނެ ކަމަށްވެސް ވަނީ ވިދާޅުވެފައެވެ.
އުވާލަން އިޢުލާންކުރި ލިސްޓުގައި ވީއޭއެމް ހިމެނޭއިރު، އެ އެސޯސިއޭޝަނުން މި ފަހުން އަހަރީ އާންމު ޖަލްސާވެސް ބާއްވާފައެއް ނުވެއެވެ. އެއާއެކު ސްޕޯޓްސް ކޮމިޝަނުން ވަނީ އެ އެސޯސިއޭޝަނާ މަޝްވަރާ ކުރުމަށްފަހު، އަހަރީ އާންމު ޖަލްސާ ބާއްވައިގެން ކުރިއަށްދާން ޖެހޭނެ ގޮތުގެ ޓައިމްލައިނަކާ މެދުވެސް އެއްބަސްވެފައެވެ. އެކަމަކު އެއްބަސްވެވުނު ޓައިމްލައިންތަކުގެ މުއްދަތު ފަހަނައަޅައި ދިޔައިރުވެސް، އެކަންކަމަށް ހައްލެއް ލިބިފައެއް ނުވެއެވެ.